ವೇಶ್ಯಾವಾಟಿಕೆಗೆ ಕಾನೂನಿನ ರಕ್ಷಣೆ ನೀಡಬೇಕು ಎಂಬ ಕೆಲ ಪ್ರಜ್ಞಾವಂತರ ಸದುದ್ದೇಶದ ಸಲಹೆಗಳನ್ನು, ವೇಶ್ಯಾವಾಟಿಕೆಗೆ ಪ್ರೋತ್ಸಾಹ ನೀಡುವುದು ಎಂದು ಕೆಲವರು ತಪ್ಪಾಗಿ ಅರ್ಥೈಸುತ್ತಿರುವುದು ದುರದೃಷ್ಟಕರ ಸಂಗತಿ.
ವೇಶ್ಯಾವಾಟಿಕೆಗೆ ಪ್ರೋತ್ಸಾಹ ನೀಡದಿರುವುದು, ಆ ನರಕದಲ್ಲಿ ಸಿಕ್ಕಿಹಾಕಿಕೊಂಡಿರುವವರನ್ನು ಹೊರಗೆ ತರಲು ಯತ್ನಿಸುವುದು ಮತ್ತು ಇನ್ನೂ ಮುಖ್ಯವಾಗಿ ಹೆಣ್ಣುಮಕ್ಕಳನ್ನು ಮೋಸಗೊಳಿಸಿಯೋ, ಬಲವಂತದಿಂದಲೋ ಅಲ್ಲಿಗೆ ಸೇರಿಸುವುದನ್ನು ತಡೆಯಲು ಗಂಭೀರ ಪ್ರಯತ್ನ ಮಾಡಬೇಕಾದುದು ಒಂದು ಭಾಗ (ಹೆಣ್ಣುಮಕ್ಕಳ ಕಣ್ಮರೆ ಪ್ರಕರಣಗಳಿಗೂ ವೇಶ್ಯಾವೃತ್ತಿಗೂ ನೇರ ಸಂಬಂಧವಿದ್ದು ಇಂದಿಗೂ ಯಾವ ಸರ್ಕಾ-ರವೂ ಇದನ್ನು ಗಂಭೀರವಾಗಿ ಪರಿಗಣಿಸಿಲ್ಲ).
ಲೈಂಗಿಕ ವೃತ್ತಿಯಲ್ಲಿ ತೊಡಗಿರುವವರ ಸಾಂವಿಧಾನಿಕ ಮತ್ತು ಮಾನವಹಕ್ಕುಗಳನ್ನು ಗೌರವಿಸುವುದು, ಅದರಲ್ಲಿ ತೊಡಗಿಕೊಂಡಿರುವರನ್ನು ಕಾನೂನಿನ ರಕ್ಷಣೆಯ ಮೂಲಕ ತಲೆಹಿಡುಕರು ಮತ್ತು ಪೊಲೀಸರ ವಿಪರೀತ ಶೋಷಣೆಯಿಂದ ಕಾಪಾಡುವುದು ಇನ್ನೊಂದು ಭಾಗ.
ವೇಶ್ಯಾವೃತ್ತಿಯನ್ನು ಕಾನೂನು ವ್ಯಾಪ್ತಿಗೆ ತಂದಾಗ ಏಡ್ಸ್ ಮತ್ತಿತರ ಲೈಂಗಿಕ ರೋಗಗಳು ಹರಡದಂತೆ ಅವರಿಗೆ ಆರೋಗ್ಯ ರಕ್ಷಣೆ ಒದಗಿಸುವುದೂ ಹೆಚ್ಚು ಸುಲಭವಾಗುತ್ತದೆ. ವೇಶ್ಯಾವೃತ್ತಿಗೆ ಸಹಸ್ರಾರು ವರ್ಷಗಳ ಇತಿಹಾಸವಿದೆ ಮತ್ತು ಅದನ್ನು ಸಂಪೂರ್ಣ ನಿಲ್ಲಿಸುವುದು ಎಂದೆಂದಿಗೂ ಸಾಧ್ಯ ಇಲ್ಲ ಎಂಬ ವಾಸ್ತವ ಗೊತ್ತಿದ್ದೂ ಇಡೀ ಸಮಾಜವೇ ಈ ವಿಚಾರದಲ್ಲಿ ತೀರಾ ಸೋಗಲಾಡಿತನದಿಂದ ವರ್ತಿಸುತ್ತಿದೆ ಯೇನೋ ಎಂದು ಭಾಸವಾಗುತ್ತಿದೆ.