ಬಿಲಾಸ್ಪುರ (ಪಿಟಿಐ): ಹದಿಮೂರು ಮಹಿಳೆಯರ ಜೀವ ಬಲಿಪಡೆದ ಸಂತಾನ-ಶಕ್ತಿ ಹರಣ ಶಸ್ತ್ರಚಿಕಿತ್ಸೆ ದುರಂತದ ವಾರದ ಬಳಿಕ ಔಷಧಿಗಳಲ್ಲಿ ವಿಷಕಾರಿ ಅಂಶಗಳಿರುವುದು ವೈದ್ಯಕೀಯ ಪರೀಕ್ಷೆಯಿಂದ ದೃಢಪಟ್ಟಿದೆ.
ಸಂತಾನಶಕ್ತಿ ಹರಣ ಶಸ್ತ್ರಚಿಕಿತ್ಸೆಗೆ ಒಳಗಾದ ಮಹಿಳೆಯರಿಗೆ ನೀಡಿದ ಮಾತ್ರೆ ಮತ್ತು ಔಷಧಗಳು ಕಳಪೆ ದರ್ಜೆಯಿಂದ ಕೂಡಿದ್ದು ಅದರಲ್ಲಿ ಜೀವಕ್ಕೆ ಮಾರಕವಾದ ವಿಷಕಾರಿ ವಸ್ತುಗಳಿರುವುದು ವೈದ್ಯಕೀಯ ಪರೀಕ್ಷೆಯಿಂದ ದೃಢಪಟ್ಟಿರುವುದಾಗಿ ಆರೋಗ್ಯ ಸಚಿವ ಅಮರ್ ಅಗರವಾಲ್ ತಿಳಿಸಿದ್ದಾರೆ.
ಎಲ್ಲ ಪ್ರಯೋಗಾಲಯಗಳ ವರದಿಗಳು ಕೈಸೇರಿದ್ದು ಔಷಧಿಗಳಲ್ಲಿದ್ದ ವಿಷಕಾರಿ ವಸ್ತುಗಳು ಶಸ್ತ್ರಚಿಕಿತ್ಸೆಗೆ ಒಳಗಾದ ಮಹಿಳೆಯರ ಸಾವಿಗೆ ಕಾರಣ ಎಂಬುದು ಪರೀಕ್ಷೆಯಿಂದ ದೃಢಪಟ್ಟಿದೆ ಎಂದು ಸಚಿವರು ತಿಳಿಸಿದರು.
ಆದರೆ, ಯಾವ ಔಷಧದಲ್ಲಿ ಎಷ್ಟು ಪ್ರಮಾಣದಲ್ಲಿ ವಿಷಕಾರಿ ವಸ್ತುಗಳಿದ್ದವು ಮತ್ತು ಆ ವಿಷಕಾರಿ ವಸ್ತುಗಳು ಯಾವುವು ಎಂಬ ಮಾಹಿತಿಯನ್ನು ಸಚಿವರು ಬಹಿರಂಗಪಡಿಸಲಿಲ್ಲ.