ಸಂಕಷ್ಟಗಳಿಗೆ ಒಗ್ಗಿಕೊಂಡು...

ಬೆಂಗಳೂರು ಮೂಲದ ಅಪೂರ್ವ ಗಿರಿ ಅವರಿಗೆ ಮಹಿಳೆಯರು ಸ್ವಾವಲಂಬಿಗಳಾಗಬೇಕು ಮತ್ತು ತಮ್ಮ ಸುರಕ್ಷತೆ ಬಗ್ಗೆ ಜಾಗೃತರಾಗಿರಬೇಕು ಎಂಬ ಆಸೆ. ಈ ನಿಟ್ಟಿನಲ್ಲಿ ಗೆಳತಿಯರ ಜೊತೆ ಸೇರಿಕೊಂಡು ಮಹಿಳೆಯರ ಸುರಕ್ಷತೆ ಕುರಿತು ವಿಚಾರ ಸಂಕಿರಣಗಳು, ಕಾರ್ಯಾಗಾರಗಳನ್ನು ನಡೆಸುತ್ತಿದ್ದಾರೆ.

ಮಹಿಳಾ ಸುರಕ್ಷತೆ ಅಭಿಯಾನದಲ್ಲಿ ತೊಡಗಿರುವ ಅಪೂರ್ವ ದೇಶ ಸುತ್ತುತ್ತ ಜಾಗೃತಿ ಮೂಡಿಸುವ ಕಾಯಕದಲ್ಲಿ ನಿರತರಾಗಿದ್ದಾರೆ. ಅಪೂರ್ವಗೆ ಚಿಕ್ಕ ವಯಸ್ಸಿನಲ್ಲಿ ಮಾಜಿ ರಾಷ್ಟ್ರಪತಿ ಅಬ್ದುಲ್‌ ಕಲಾಂ ಅವರನ್ನು ಭೇಟಿ ಮಾಡುವ ಅವಕಾಶ ಲಭಿಸಿತ್ತು. ಈ ಸಂದರ್ಭದಲ್ಲಿ ನಾನು ಲಾಯರ್‌ ಆಗುತ್ತೇನೆ ಎಂದು ಅಪೂರ್ವ ಕಲಾಂ ಅವರಿಗೆ ಹೇಳಿದ್ದರು. ಆದರೆ  ಲಾಯರ್‌ ಆಗುವ ಬದಲಿಗೆ ಎಂಜಿನಿಯರ್‌ ಆದರು. ಅಪೂರ್ವ ತಂದೆ ಎರಡು ಮೂರು ವರ್ಷಕ್ಕೆ ವರ್ಗವಾಗುತ್ತಿದ್ದರಿಂದ ದೇಶ ಸುತ್ತುವ ಅವಕಾಶ ಸಿಕ್ಕಿತು. ಹಲವು ರಾಜ್ಯಗಳಲ್ಲಿ ವಿದ್ಯಾಭ್ಯಾಸ ಪಡೆದರು. ಅಲ್ಲಿನ ಜನ ಜೀವನ, ಸಂಸ್ಕೃತಿ ಜೊತೆಗೆ ಮಹಿಳೆಯರ ಸ್ಥಿತಿಗತಿಗಳನ್ನು ಅರಿತು ಮಹಿಳೆಯರಿಗಾಗಿ ದುಡಿಯುವ ಸಂಕಲ್ಪ ಮಾಡಿದರು. ಪ್ರಸ್ತುತ ಕ್ಲೌಡಿಂಗ್‌ ತಂತ್ರಜ್ಞಾನದ ಐವಿಜ್‌ ಕಂಪೆನಿಯಲ್ಲಿ ಸೆಕ್ಯೂರಿಟಿ ವಿಶ್ಲೇಷಕಿಯಾಗಿ ಕೆಲಸ ಮಾಡುತ್ತಿದ್ದಾರೆ.

ಏನನ್ನಾದರೂ ಸಾಧಿಸಬೇಕು ಎಂಬ ತುಡಿತವಿರುವ ಅಪೂರ್ವ ಸಣ್ಣದೊಂದು ಸಂಸ್ಥೆ ಕಟ್ಟಿಕೊಂಡು ಮಹಿಳೆಯರ ಸುರಕ್ಷತೆ ಕುರಿತಂತೆ ಜಾಗೃತಿ ಮೂಡಿಸುವ ಅಭಿಯಾನದಲ್ಲಿ ತೊಡಗಿಕೊಂಡಿದ್ದಾರೆ. ವಾರಾಂತ್ಯ ಮತ್ತು ರಜ ದಿನಗಳಲ್ಲಿ ಕಾರ್ಯಾಗಾರಗಳು, ವಿಚಾರಣ ಸಂಕಿರಣಗಳನ್ನು ನಡೆಸುತ್ತಿದ್ದಾರೆ.

ಹಲವಾರು ಮಹಿಳಾ ಮತ್ತು ಪ್ರಗತಿಪರ ಸಂಘಟನೆಗಳ ಜೊತೆ ಗುರುತಿಸಿಕೊಂಡಿರುವ ಅಪೂರ್ವ ಸಾಮಾಜಿಕ ಚಳವಳಿಗಳಲ್ಲಿ ಸಕ್ರಿಯವಾಗಿ ಭಾಗವಹಿಸುತ್ತಾರೆ. ಇತ್ತೀಚೆಗೆ ಕೇರಳ ಮತ್ತು ಬೆಂಗಳೂರಿನಲ್ಲಿ ಮಹಿಳಾ ಜಾಗೃತಿ ಸಮ್ಮೇಳನಗಳನ್ನು ನಡೆಸಿದ್ದಾರೆ. ವಿಶ್ವ ಆರ್ಥಿಕತೆ ಅಧ್ಯಯನ ಮಾಡುತ್ತಿರುವ ಅಪೂರ್ವ ಭಾರತದಲ್ಲಿನ ಹಣದುಬ್ಬರಕ್ಕೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಹೊಸ ವ್ಯಾಖ್ಯೆ ಅಥವಾ ಸೂತ್ರವೊಂದನ್ನು ಆವಿಷ್ಕರಿಸುವ ಕನಸು ಹೊಂದಿದ್ದಾರೆ.

ಅವಿರಾಲ್‌ ಗಾರ್ಗ್‌

ಪ್ರಧಾನಿ ನರೇಂದ್ರ ಮೋದಿ ಅವರ ಸ್ವಚ್ಛಭಾರತ ಅಭಿಯಾನ ದೇಶದಲ್ಲಿ ಹೊಸ ಆಯಾಮ ಕಲ್ಪಿಸಿದೆ. ಈ ಅಭಿಯಾನವನ್ನು ನಿರಂತರವಾಗಿ ನಡೆಸಲು ಹಲವಾರು ಸಂಘ ಸಂಸ್ಥೆಗಳು ಹುಟ್ಟಿಕೊಂಡಿವೆ. ಇನ್ನು ಕೆಲವರು ವಾರಾಂತ್ಯದ ದಿನಗಳಲ್ಲಿ ಸ್ವಯಂ ಪ್ರೇರಿತರಾಗಿ ಸ್ವಚ್ಛ ಭಾರತ ಅಭಿಯಾನದಲ್ಲಿ ತೊಡಗಿಸಿಕೊಂಡವರು ಇದ್ದಾರೆ. ಬುದ್ಧಿಜೀವಿಗಳು, ಯುವಕರು ಮತ್ತು ಹಿರಿಯ ನಾಗರಿಕರು ಈ ಅಭಿಯಾನದಲ್ಲಿ ಹೆಚ್ಚು ಹೆಚ್ಚಾಗಿ ಭಾಗವಹಿಸುತ್ತಿದ್ದಾರೆ. ಕಾನ್ಪುರದ ಪಿಯುಸಿ ವಿದ್ಯಾರ್ಥಿ ವಿಭಿನ್ನ ರೀತಿಯಲ್ಲಿ ಸ್ವಚ್ಛ ಭಾರತ ಅಭಿಯಾನದಲ್ಲಿ ತೊಡಗಿಕೊಂಡಿರುವುದು ವಿಶೇಷ.  ವಿದ್ಯಾರ್ಥಿ ಅವಿರಾಲ್‌ಗೆ ಕಾರು ಮತ್ತು ಜೀಪುಗಳ ಮೇಲೆ ಹದ್ದಿನ ಕಣ್ಣು. ಸ್ವಂತ ವಾಹನಗಳಲ್ಲಿ ಪ್ರಯಾಣಿಸುವವರು ತಿಂಡಿ ಪೊಟ್ಟಣಗಳು ಮತ್ತು ತಂಪು ಪಾನೀಯಗಳ ಡಬ್ಬಿಗಳನ್ನು ಕಾರಿನ ಕಿಟಿಕಿಯ ಮೂಲಕ ಎಲ್ಲೆಂದರಲ್ಲಿ ಬಿಸಾಡುತ್ತಾರೆ. ಇದರಿಂದ ಪರಿಸರ ಹಾಳಾಗುವುದಲ್ಲದೆ ನಗರದ ಸೌಂದರ್ಯ ಹದಗೆಡುತ್ತದೆ. ಇದನ್ನು ತಪ್ಪಿಸಲು ಆ ವಾಹನಗಳಲ್ಲಿ ಕಸದ ಚೀಲ ಇಡುವ ಬಗ್ಗೆ ಅವಿರಾಲ್‌ ಯೋಚಿಸಿದರು. ಕಾರಿನಲ್ಲಿ ಇಡಬಹುದಾದ ಕಸದ ಬುಟ್ಟಿ ಅಥವಾ ಪ್ಲಾಸ್ಟಿಕ್‌ ಚೀಲದ ತಯಾರಿಕೆ ಬಗ್ಗೆ ಆನ್‌ಲೈನ್‌ನಲ್ಲಿ ತಿಳಿದುಕೊಂಡು ನೂರು ಚೀಲಗಳನ್ನು ತಯಾರಿಸಿದರು. ಆಕರ್ಷಕವಾಗಿ ವಿನ್ಯಾಸಗೊಂಡ ಚೀಲಗಳನ್ನು ಕಾರಿನ ಮಾಲೀಕರಿಗೆ ಉಚಿತವಾಗಿ ನೀಡಿ ಅವುಗಳನ್ನು ಬಳಸುವ ಬಗ್ಗೆ ಅವಿರಾಲ್‌ ಹೇಳಿ ಕೊಡುತ್ತಾರೆ.

ಈ ವಿಷಯ ಪರಿಸರ ಸ್ನೇಹಿ ಸಂಘಟನೆಗಳಿಗೆ ಗೊತ್ತಾಗಿ ಅವರು ಕೂಡ  ಹತ್ತು ಸಾವಿರ ಚೀಲಗಳನ್ನು ಅವಿರಾಲ್‌ ನೆರವಿನೊಂದಿಗೆ ತಯಾರಿಸುತ್ತಾರೆ. ರಜ ದಿನಗಳಲ್ಲಿ ವಾಹನಗಳ ಮಾಲೀಕರಿಗೆ ನೀಡಿ ಅವುಗಳ ಬಳಕೆ ಬಗ್ಗೆ ವಿವರಿಸುವುದು ಅವಿರಾಲ್‌ ಮುಖ್ಯ ಕೆಲಸ. ಕಾನ್ಪುರದಲ್ಲಿ ನಡೆದ ಮ್ಯಾರಥಾನ್‌ ಸಂದರ್ಭದಲ್ಲಿ ಸುಮಾರು ಐವತ್ತು ಸಾವಿರ ಚೀಲಗಳನ್ನು ಉಚಿತವಾಗಿ ಹಂಚಲಾಗಿದೆ. ಕಾನ್ಪುರದ ಬಹುತೇಕ ಎಲ್ಲಾ ವಾಹಗಳಲ್ಲೂ ಇಂತಹ ಚೀಲಗಳಿವೆ. ಅವಿರಾಲ್‌ ಅವರ ಒಂದು ಸಣ್ಣ ಐಡಿಯಾ ದೊಡ್ಡ ಮಟ್ಟದಲ್ಲಿ ಯಶಸ್ಸು ಕಂಡಿದ್ದು ವಿಶೇಷ.