ಸಂಬಳ ತರುವ ಬರವಣಿಗೆಯ ನೆಚ್ಚಿ...

* ಪುಸ್ತಕ ಸಾಹಿತ್ಯ, ಸಿನಿಮಾ, ಭಾಷಾಂತರ, ರಂಗಭೂಮಿ ಹೀಗೆ ನೀವು ಅನೇಕ ಪ್ರಕಾರಗಳಲ್ಲಿ ಸಕ್ರಿಯರಾಗಿದ್ದೀರಿ. ನಿಮ್ಮ ನೆಚ್ಚಿನ ಪ್ರಕಾರ ಯಾವುದು?
ಯಾವುದೇ ಒಂದು ಅಂತಿಲ್ಲ. ಪ್ರತಿ ಪ್ರಕಾರಕ್ಕೂ ಅದರದ್ದೇ ಆದ ಶಕ್ತಿ ಮತ್ತು ಮಿತಿಗಳಿರುತ್ತವೆ. ನನ್ನ ಅದೃಷ್ಟ, ನಾನು ಎಲ್ಲ ಪ್ರಕಾರಗಳಲ್ಲಿಯೂ ಕೆಲಸ ಮಾಡುತ್ತಿದ್ದೇನೆ.

* ರಂಗಭೂಮಿ ಮತ್ತು ಸಾಹಿತ್ಯ, ಇವೆರಡರ ನಡುವಣ ಸಾಮ್ಯತೆ ಮತ್ತು ವ್ಯತ್ಯಾಸಗಳೇನು?
ಬಹುತೇಕ ಜನರು ಅಂದುಕೊಂಡಿರುವುದಕ್ಕಿಂತ ಆ ಎರಡು ಪ್ರಕಾರಗಳಲ್ಲಿ ವ್ಯತ್ಯಾಸಗಳಿವೆ. ಸಾಹಿತ್ಯ ಹೆಚ್ಚು ನಿಕಟವಾದದ್ದು. ಆದರೆ ಹಲವು ಜನರ ಸಂವಾದಗಳು ಒಟ್ಟಿಗೇ ಸೇರಿ ಕಥೆಯನ್ನು ಹುಟ್ಟಿಸುವುದು ರಂಗಭೂಮಿ.

* ನಿಮಗೆ ಹೊಳೆದ ವಿಷಯಕ್ಕೆ ನಾಟಕರೂಪ ಕೊಡಬೇಕೋ, ಕಾದಂಬರಿ ಬರೆಯಬೇಕೋ ಎಂಬ ಪ್ರಕಾರದ ಆಯ್ಕೆಯನ್ನು ನೀವು ಹೇಗೆ ಮಾಡಿಕೊಳ್ಳುತ್ತೀರಿ?
ಪ್ರಕಾರವನ್ನು ನಾನು ಆಯ್ಕೆ ಮಾಡಿಕೊಳ್ಳುವುದಿಲ್ಲ. ಕತೆಯೇ ಅದನ್ನು ಹೇಗೆ ಹೇಳಬೇಕು ಎಂಬುದನ್ನು ನಿರ್ಧರಿಸುತ್ತದೆ.

* ನೀವು ಭಾರತದತ್ತ ಆಕರ್ಷಿತರಾದದ್ದು ಹೇಗೆ?
ಆ ಕುರಿತು ಹೇಳಲು ತುಂಬ ವಿಷಯಗಳಿವೆ. ಎಲ್ಲಕ್ಕಿಂತ ಮುಖ್ಯ ಕಾರಣ ನನ್ನ ಪತ್ನಿ ಸಾಸ್ಕ್ಯಾ ಜೈನ್. ಅವಳೂ ಲೇಖಕಿ. ದೆಹಲಿಯವಳು. ನಾವು ಅರ್ಧ ವರ್ಷವನ್ನು ದೆಹಲಿಯಲ್ಲಿ ಕಳೆದರೆ ಇನ್ನರ್ಧ ವರ್ಷವನ್ನು ಬರ್ಲಿನ್‌ನಲ್ಲಿ ಕಳೆಯುತ್ತೇವೆ.

* ನಿಮ್ಮನ್ನು ಅತಿಯಾಗಿ ಪ್ರಭಾವಿಸಿದ ಲೇಖಕ ಯಾರು?
ಸ್ಟಿಫನ್‌ ಕಿಂಗ್‌! ನಾನು ಚಿಕ್ಕವನಾಗಿದ್ದಾಗ ಅವರ ಬರವಣಿಗೆಯಲ್ಲಿನ ಸೂಕ್ಷ್ಮ ವಿವರಗಳನ್ನು ತುಂಬ ಎಂಜಾಯ್‌ ಮಾಡ್ತಿದ್ದೆ. ನೂರಾರು ಪುಟಗಳಷ್ಟು ಸುದೀರ್ಘ ಅವಧಿಯಲ್ಲಿ ಅವರು ಓದುಗರ ಗಮನವನ್ನು ಕೊಂಚವೂ ಅತ್ತಿತ್ತ ಹೋಗದಂತೆ ಹಿಡಿದಿಡುತ್ತಿದ್ದ ರೀತಿ ತುಂಬ ಇಷ್ಟವಾಗುತ್ತಿತ್ತು. ಈಗೀಗ ಅವರ ಕೃತಿಗಳನ್ನು ಹೆಚ್ಚಾಗಿ ಓದುವುದಿಲ್ಲ. ಅವರ ಹೊರತಾಗಿಯೂ ನನ್ನನ್ನು ಪ್ರಭಾವಿಸಿದ ಲೇಖಕರ ಪಟ್ಟಿ ಇಲ್ಲಿ ಉಲ್ಲೇಖಿಸಲಾಗದಷ್ಟು ದೊಡ್ಡದಿದೆ.

* ಭಾರತ ಸಾಹಿತ್ಯ ಜಗತ್ತಿನ ಬಗ್ಗೆ ನಿಮ್ಮ ಅನಿಸಿಕೆ ಏನು?
ಜರ್ಮನಿಗಿಂತ ತುಂಬ ಭಿನ್ನವಾಗಿ ಇಲ್ಲಿನ ಸಾಹಿತ್ಯ ಜಗತ್ತು ಇನ್ನೂ ಬೆಳೆಯುತ್ತಲೇ ಇರುವುದನ್ನು ನೋಡಿದಾಗ ನನಗಂತೂ ಹೊಟ್ಟೆಕಿಚ್ಚಾಗುತ್ತದೆ. ಹೊಸಹೊಸ ಸಾಹಿತ್ಯೋತ್ಸವಗಳು, ಪ್ರಕಾಶಕರು ಇವೆಲ್ಲ ಇಲ್ಲಿನ ಸಮಾಜದ ಮುಖ್ಯ ಅಂಗವಾಗಿ ಬೆಳೆಯುತ್ತಿವೆ.

* ಬೆಂಗಳೂರಿನ ಬಗ್ಗೆ ಏನನಿಸುತ್ತದೆ? ಕನ್ನಡದ ಯಾವುದಾದರೂ ಲೇಖಕರ ಪರಿಚಯ ಇದೆಯಾ?
ಭಾರತದಲ್ಲಿರುವ ಸಮಯದಲ್ಲಿ ದೆಹಲಿಯನ್ನು ಬಿಟ್ಟರೆ ನಾನು ಹೆಚ್ಚು ಕಾಲ ಕಳೆದಿದ್ದು ಬೆಂಗಳೂರಿನಲ್ಲಿಯೇ. ಈ ನಗರವನ್ನು ಪ್ರೀತಿಸಲು ನನಗೆ ಸಾಕಷ್ಟು ಕಾರಣಗಳಿವೆ. ವಿಶೇಷವಾಗಿ ವ್ಯಾಪಕವಾಗಿ ಕಾಣಸಿಗುವ ವೈವಿಧ್ಯಮಯ ಮರಗಳು ಮತ್ತು ದಕ್ಷಿಣ ಭಾರತ ತಿನಿಸುಗಳು. ಕನ್ನಡದಲ್ಲಿ ನನಗೆ ವೈಯಕ್ತಿಕವಾಗಿ ತಿಳಿದಿರುವ ಮತ್ತು ನಾನು ಇಷ್ಟಪಡುವ ಸಾಹಿತಿ ಎಚ್‌.ಎಸ್‌. ಶಿವಪ್ರಕಾಶ್‌.

* ಜರ್ಮನಿ ಸಾಹಿತ್ಯ ಜಗತ್ತಿನಲ್ಲಿ ಸಮಕಾಲೀನ ವಿದ್ಯಮಾನಗಳ ಬಗ್ಗೆ ಕೊಂಚ ವಿವರಿಸುತ್ತೀರಾ?
ಈ ಪ್ರಶ್ನೆಗೆ ದೀರ್ಘವಾಗಿಯೇ ಉತ್ತರಿಸಬೇಕು. ಸಂಕ್ಷಿಪ್ತವಾಗಿ ಹೇಳುವುದಾದರೆ ಜರ್ಮನಿ ಸಾಹಿತ್ಯ ಜಗತ್ತು ಹೊರಪ್ರಪಂಚಕ್ಕೆ ಹೆಚ್ಚು ಹೆಚ್ಚು ತೆರೆದುಕೊಳ್ಳುತ್ತಿದೆ. ಓದುಗರೂ ಹೊರಜಗತ್ತಿನ ಲೇಖಕರ ಪುಸ್ತಕಗಳನ್ನು ಓದಲು ಆಸಕ್ತಿ ತೋರಿಸುತ್ತಿದ್ದಾರೆ.

* ಬರವಣಿಗೆಯ ಪ್ರಕ್ರಿಯೆಯಲ್ಲಿ ನಿಮಗೆ ಸವಾಲೆನಿಸುವ ಹಂತ ಯಾವುದು?
ಬರವಣಿಗೆಯಲ್ಲಿ ನಿರಂತರವಾಗಿ ಆತ್ಮವಿಶ್ವಾಸವನ್ನು ಸಂಭಾಳಿಸಿಕೊಂಡು ಹೋಗುವುದೇ ದೊಡ್ಡ ಸವಾಲು. ಅದೇ ಸಮಯದಲ್ಲಿ ನನ್ನ ಬೆಳವಣಿಗೆಗೆ ಪೂರಕವಾಗುವಂತೇ ನನ್ನನ್ನು ನಾನೇ ವಿಮರ್ಶಿಸಿಕೊಳ್ಳುವುದು.

* ಈಗ ಪ್ರದರ್ಶಿತವಾಗಲಿರುವ ‘ಸ್ಟಾಲೋವಾ ವೋಲಾ’ ನಾಟಕದ ಕುರಿತು ಹೇಳಿ.
‘ಸ್ಟಾಲೋವಾ ವೋಲಾ’ ಇದು ಪೋಲೆಂಡ್‌ನ ಸ್ಥಳವೊಂದರ ಹೆಸರು. ಅದು ಪೂರ್ವ ಜರ್ಮನಿಯಲ್ಲಿ ವಾಸಿಸುವ ಇತ್ತೀಚೆಗೆ ಹೆಂಡತಿಯನ್ನು ಕಳೆದುಕೊಂಡಿರುವ ಕಾರ್ಲ್‌ನ ನಿಗೂಢ ಪ್ರಯಾಣದ ಗುರಿಯೂ ಹೌದು. ಆ ಪಯಣದಲ್ಲಿ ಅವನು ಅನೇಕ ಅಡಚಣೆಗಳು ಮತ್ತು ವಿಚಿತ್ರ ವ್ಯಕ್ತಿಗಳನ್ನು ಭೇಟಿಯಾಗುತ್ತಾನೆ. ಇದೇ ಈ ನಾಟಕದ ಕಥನದ ಎಳೆ.

* ನಿಮ್ಮ ಮುಂದಿನ ಯೋಜನೆಗಳ ಬಗ್ಗೆ ಹೇಳುತ್ತೀರಾ?
ನಾನು ಇಂಗ್ಲಿಷ್‌ನಲ್ಲಿ ಬರೆದಿರುವ ಕಾದಂಬರಿಯೊಂದನ್ನು ತಿದ್ದುತ್ತಿದ್ದೇನೆ. ಅದು ಮುಂದಿನ ವರ್ಷ ಅಮೆರಿಕದಲ್ಲಿ ಪ್ರಕಟವಾಗಲಿದೆ. ಜರ್ಮನ್‌ ಭಾಷೆಯ ನನ್ನ ಹೊಸ ಕಾದಂಬರಿಯೂ ಅಂತಿಮ ಹಂತದಲ್ಲಿದೆ. ಅಲ್ಲದೇ ಹಲವಾರು ಸಿನಿಮಾಗಳಿಗೂ ಕೆಲಸ ಮಾಡುತ್ತಿದ್ದೇನೆ. ವಿಶೇಷವಾಗಿ ನನ್ನದೇ ಒಂದು ಕಾದಂಬರಿಗೆ ಸಿನಿಮಾ ರೂಪು ಕೊಡುವ ಕೆಲಸದಲ್ಲಿ ನಿರತನಾಗಿದ್ದೇನೆ.