ಸಂಸದರಿಗೇಕೆ ಹೆಚ್ಚು ವೇತನ?

ಬಿಜೆಪಿ ಸಂಸದ ಪ್ರತಾಪ್‌ ಸಿಂಹ ಅವರು ನೀಡಿರುವ ಸಂಸದರ ಖರ್ಚುವೆಚ್ಚದ ವಿವರಣೆ ಹಾಗೂ ಅವರ ದುಃಸ್ಥಿತಿ (ಸಂಗತ, ಅ. 7) ಓದಿದವರಿಗೆ ಮರುಕ ಉಂಟಾಗಲೇಬೇಕು. ಪಾಪ, ಸಮಾಜ ಸೇವೆಗೆಂದು ಹೋಗುವವರದ್ದು ಎಂಥ ಪಾಡು! ಎಲ್ಲವನ್ನೂ ನಮ್ಮ ಮುಂದಿರಿಸಿದ ಅವರ ಪ್ರಾಮಾಣಿಕತೆಯನ್ನು ಮೆಚ್ಚಲೇಬೇಕಲ್ಲವೇ?

ಪತ್ನಿ, ಮಕ್ಕಳನ್ನು ಅಧಿವೇಶನಕ್ಕೆ ಕರೆದೊಯ್ಯಲು, ಅತಿಥಿ ಸೇವೆ ಮಾಡಲು, ಮದುವೆ-ಮುಂಜಿ ಇತ್ಯಾದಿಗಳಿಗೆ ಉಡುಗೊರೆ ಕೊಡಲು ತಗಲುವ ಖರ್ಚನ್ನು  ಅವರನ್ನು ಆರಿಸಿ ಕಳಿಸಿದ ನಾವಲ್ಲದೆ ಯಾರು ಭರಿಸಬೇಕು ಸ್ವಾಮಿ? ಸರ್ಕಾರಿ ಶಾಲಾ ಕಾಲೇಜು ಜನಸಾಮಾನ್ಯರಿಗೆ ಸರಿಯಪ್ಪ. ಅಲ್ಲಿಗೆ ತಮ್ಮ ಮಕ್ಕಳನ್ನು ಕಳುಹಿಸಿದರೆ, ಎಲ್ಲರಿಗಿಂತ ಮೇಲಿರುವ ಸಂಸದರ ಪ್ರತಿಷ್ಠೆ ಏನಾಗಬೇಡ?

ಸಂಸದರಾಗಿ ವೈಯಕ್ತಿಕ ಬದುಕನ್ನೇ ಕಳೆದುಕೊಳ್ಳುವವರಿಗೆ ₹ 3 ಲಕ್ಷ ಮಾಸಿಕ ವೇತನ  ಏನೇನೂ ಸಾಲದು. ದೇಶಕ್ಕೆ ಅನ್ನ ಕೊಡುವ ರೈತ ಆತ್ಮಹತ್ಯೆ ಮಾಡಿಕೊಂಡರೇನು? ದೇಶದ ಸಂಪತ್ತು ಸೃಷ್ಟಿಸುವ ಕಾರ್ಮಿಕ ಎರಡು ಹೊತ್ತು ಉಣ್ಣದಿದ್ದರೇನು? ಅವರಿಲ್ಲದಿದ್ದರೂ ಯಾವ ನಷ್ಟವೂ ಇಲ್ಲ. ಆದರೆ ಎಲ್ಲವನ್ನೂ ತ್ಯಜಿಸಿ ಸಂಸದರಾಗಿರುವವರು ಚೆನ್ನಾಗಿ ಬಾಳಿ ಬದುಕ ಬೇಡವೇ? ಹಾಗಾಗಿ ನಂತರವೂ ಅವರಿಗೆ ಪಿಂಚಣಿ ಬೇಕೇ ಬೇಕು. ಇದನ್ನು ನಾವೆಲ್ಲರೂ ಸಮರ್ಥಿಸಲೇಬೇಕು.

ಈ ಹಿಂದೆ ಸಂಸದರಾಗಿದ್ದ, ಪಶ್ಚಿಮ ಬಂಗಾಳದ ನನ್ನ ವೈದ್ಯ ಮಿತ್ರರೊಬ್ಬರು ಅಮಾಯಕರು. ಅವರು ಹೀಗೆಲ್ಲ ಯೋಚಿಸಲೇ ಇಲ್ಲ. ಎಲ್ಲರೂ ವೇತನ ಹೆಚ್ಚು ಮಾಡಿ ಎಂದಾಗ, ಖಂಡಿತ ಬೇಡ ಎಂದದ್ದು ಮಾತ್ರವಲ್ಲದೆ, ಕೊನೆಗೂ ಹೆಚ್ಚಾದಾಗ, ಆ ಹೆಚ್ಚುವರಿಯನ್ನು ತಮ್ಮ ಕ್ಷೇತ್ರದ ಮಕ್ಕಳಿಗೆ ವಿದ್ಯಾರ್ಥಿ ವೇತನವನ್ನಾಗಿ ನೀಡಿದರು. ಅವರಿಗೆ ಅದು ಸಮಾಜ ಸೇವೆಯಾಗಿರಲಿಲ್ಲ, ಕರ್ತವ್ಯವಾಗಿತ್ತು. ಎಲ್ಲರೂ ಹೀಗಿರಲು ಸಾಧ್ಯವಿಲ್ಲ ಬಿಡಿ. ಆದರೂ ಪ್ರತಾಪ್‌ ಸಿಂಹ ಅವರ ಬಿಚ್ಚು ನುಡಿಗಳನ್ನು ಮೆಚ್ಚಿಕೊಳ್ಳಲೇಬೇಕಾಗುತ್ತದೆ.
-ಡಾ. ಕೆ.ಸುಧಾ,
ಬೆಂಗಳೂರು

***
ಕೇಳಿದ್ದು ತಪ್ಪಲ್ಲ; ಹಕ್ಕು
ಸಿಂಹ ಅವರು ಹೆಚ್ಚಿನ ಸಂಬಳ ಕೇಳಿರುವ ವಿಷಯದ ಬಗ್ಗೆ ಚರ್ಚಿಸುವುದು ಅಥವಾ ಟೀಕಿಸುವಂತಹುದು ಏನೂ ಇಲ್ಲ. ಅವರು ಪ್ರಾಮಾಣಿಕವಾಗಿ ತಮ್ಮ ಭತ್ಯೆಹೆಚ್ಚಿಸಬೇಕೆಂದು ಕೇಳಿದ್ದಾರೆ. ಅದು ಅವರ ಹಕ್ಕು ಕೂಡ. ಒಬ್ಬ ಶಾಸಕ ಅಥವಾ ಸಂಸತ್ ಸದಸ್ಯ ಎಂದಾಕ್ಷಣ ಅವರು ಒಂದು ಕ್ಷೇತ್ರವನ್ನು, ಅಲ್ಲಿಯ ಜನರನ್ನು ಪ್ರತಿನಿಧಿಸುವ ಪ್ರತಿನಿಧಿ. ಅವರು ಪ್ರಾಮಾಣಿಕವಾಗಿ ಇರಬೇಕೆಂದು ಜನ ಬಯಸುವುದು ಸಹಜ. ಹಾಗೆ ಇರಬೇಕೆಂದರೆ ಅವರಿಗೆ ಹಣದ ಕೊರತೆ ಇರಬಾರದು.

ಜನಪ್ರತಿನಿಧಿಯನ್ನು ಜನ ನೋಡುವ ದೃಷ್ಟಿಯೇ ಬೇರೆ. ಅವರಿಗೂ ಸಾಮಾನ್ಯರಂತೆ ಬದುಕು ಇದೆ ಎಂದು ಯಾರೂ ತಿಳಿದುಕೊಳ್ಳುವುದಿಲ್ಲ. ಸಿಂಹ ಅವರು ಹೇಳಿದಂತೆ ಒಬ್ಬ ಜನಪ್ರತಿನಿಧಿ ಕೌಟುಂಬಿಕ ಜೀವನದೊಂದಿಗೆ ದಿನನಿತ್ಯ ಅನೇಕರನ್ನು ವಿವಿಧ ರೀತಿಯಲ್ಲಿ ನಿಭಾಯಿಸಬೇಕಾಗುತ್ತದೆ. ಇದಕ್ಕೆಲ್ಲ ಹಣ ಬೇಕು. ಕ್ಷೇತ್ರದ ಜನ ಹಬ್ಬ, ಹರಿದಿನ, ಸಾರ್ವಜನಿಕ ಉತ್ಸವ, ಸಮಾರಂಭದ ಹೆಸರಿನಲ್ಲಿ  ದೇಣಿಗೆ ಅಥವಾ ಇತರ ರೂಪದಲ್ಲಿ ಸಹಾಯ ಕೋರಿ ಬರುತ್ತಾರೆ. ಯಾರನ್ನೂ ಬರಿಗೈಯಲ್ಲಿ ಕಳುಹಿಸಲು ಸಾಧ್ಯವಿಲ್ಲ. ಕ್ಷೇತ್ರದ ಅಭಿವೃದ್ಧಿಗೆ ಮೀಸಲಿರುವ ಅನುದಾನದಿಂದ ಇದನ್ನೆಲ್ಲ ಬಯಸುವುದು ಹಾಗೂ ಅವರು ಕೊಡುವುದು ತಪ್ಪು. ಇಂತಹ ಸಂದಿಗ್ಧ ಪರಿಸ್ಥಿತಿ ಬರುವುದರಿಂದಲೇ ರಾಜಕಾರಣಿಯೊಬ್ಬ  ಭ್ರಷ್ಟನಾಗುವುದು.

ಜನರಿಂದ ಚುನಾಯಿತನಾಗುವ ಒಬ್ಬ ಪ್ರತಿನಿಧಿ ಜನಸೇವಕನ ಹೆಸರಿನಲ್ಲಿ ಬಿಟ್ಟಿಯಾಗಿ ಜನಸೇವೆ ಮಾಡಬೇಕೇ? ಅನುದಾನ ಕೊಳ್ಳೆ ಹೊಡೆದು ಜನಸೇವೆಗೆ ಮುಂದಾಗಬೇಕೇ? ಸೇನೆಯಲ್ಲಿ ಸೇವೆ ಸಲ್ಲಿಸುವ ಯೋಧನದು ದೇಶಸೇವೆ ಎಂದು ಕರೆದರೂ ಆತ ತನ್ನ ಕರ್ತವ್ಯಕ್ಕಾಗಿ ಸಂಬಳ ಪಡೆಯುತ್ತಾನೆ. ಜನಪ್ರತಿನಿಧಿಗಳೂ ಅಷ್ಟೆ, ಜನಸೇವೆ ಹೆಸರಿನಲ್ಲಿ ತಮ್ಮ ಕರ್ತವ್ಯವನ್ನು ಪ್ರಾಮಾಣಿಕವಾಗಿ ಮಾಡಬೇಕಾದರೆ ತೃಪ್ತಿಕರ ವೇತನ ಅಗತ್ಯ. ಅವಶ್ಯಕತೆಗಿರುವಷ್ಟು ಸಂಬಳ ಕೇಳಿರುವುದರಲ್ಲಿ ಅನ್ಯಥಾ ಭಾವಿಸುವ ಅಥವಾ ಹೀಯಾಳಿಸುವ ಅವಶ್ಯಕತೆಯಿಲ್ಲ.
-ವಸಂತ್ ಕುಮಾರ್ ಕೆ.,
ಸಿದ್ಧಾಪುರ, ಕೊಡಗು ಜಿಲ್ಲೆ