ಸಾವನದುರ್ಗ ಹತ್ತಿದಷ್ಟೂ ಹತ್ತಿರ

ಬೆಂಗಳೂರಿನ ಆಸುಪಾಸಿನಲ್ಲಿರುವ ಚಾರಣಿಗರ ನೆಚ್ಚಿನ ಪ್ರವಾಸಿ ತಾಣಗಳಲ್ಲಿ ಸಾವನದುರ್ಗವೂ ಒಂದು. ಒಂದು ದಿನದ ಪ್ರವಾಸಕ್ಕೆ, ಚಾರಣದ ಹಿತ ಅನುಭವಕ್ಕೆ ಸಾವನದುರ್ಗ ಹೇಳಿ ಮಾಡಿಸಿದ ಸ್ಥಳ.

ಬೆಂಗಳೂರಿನಿಂದ ಸುಮಾರು 50 ಕಿ.ಮೀ ದೂರದಲ್ಲಿರುವ ಸಾವನದುರ್ಗ, ಐತಿಹಾಸಿಕ ಸ್ಥಳವೂ ಹೌದು. ಹೊಯ್ಸಳರ ಅರಸ ಮೂರನೇ ಬಲ್ಲಾಳ 1340ರಲ್ಲಿ ಇಲ್ಲಿಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಈ ಬೆಟ್ಟಕ್ಕೆ ‘ಸಾವಂದಿ’ ಎಂದು ಹೆಸರನಿಟ್ಟ ಎಂಬ ಐತಿಹ್ಯವಿದೆ.

ಅಚ್ಯುತರಾಯನ ಕಾಲದಲ್ಲಿ ಮಾಗಡಿಯ ಸಾಮಂತನೊಬ್ಬನ ಆಳ್ವಿಕೆಗೆ ಒಳಪಟ್ಟಿದ್ದ ಈ ದುರ್ಗಕ್ಕೆ ‘ಸಾಮಂತದುರ್ಗ’ ಎಂಬ ಹೆಸರು ಬಂದು ಕ್ರಮೇಣ ಅದು ಸಾವನದುರ್ಗ ಎಂದಾಗಿದೆ ಎಂದೂ ಹೇಳುತ್ತಾರೆ.

ಬೆಟ್ಟ ಹತ್ತುವ ಕಡಿದಾದ ಹಾದಿಯಲ್ಲಿ ಹಲವರು ಆಯತಪ್ಪಿ ಬಿದ್ದು ಸಾವನ್ನಪ್ಪಿರುವುದರಿಂದ ಈ ಬೆಟ್ಟಕ್ಕೆ ಸಾವಿನದುರ್ಗ ಎಂಬ ಹೆಸರು ಬಂದು ಕಾಲಾನಂತರ ಅದು ಸಾವನದುರ್ಗವಾಗಿದೆ ಎಂದು ಹೇಳುವುವರೂ ಉಂಟು. ಮಾಗಡಿಯ ನಾಡಪ್ರಭು ಕೆಂಪೇಗೌಡ ಸಾವನದುರ್ಗವನ್ನು ತನ್ನ ಎರಡನೇ ರಾಜಧಾನಿಯಾಗಿ ಮಾಡಿಕೊಂಡಿದ್ದ ಎನ್ನುತ್ತದೆ ಚರಿತ್ರೆ.

ಹಲವು ಐತಿಹ್ಯಗಳನ್ನು ಹೊಂದಿರುವ ಸಾವನದುರ್ಗ ಸಮುದ್ರ ಮಟ್ಟದಿಂದ 1,226 ಮೀಟರ್‌ ಎತ್ತರದಲ್ಲಿದೆ. ಹಲವು ಅಪರೂಪದ ಹಾಗೂ ಔಷಧೀಯ ಸಸ್ಯ ಪ್ರಭೇದಗಳಿಗೆ ಪ್ರಸಿದ್ಧಿಯಾಗಿರುವ ಸಾವನದುರ್ಗವು ನೂರಾರು ಪ್ರಭೇದದ ಸುಂದರ ಹೂಗಿಡಗಳಿಗೂ ಹೆಸರಾಗಿದೆ.

ದುರ್ಗ ಏರುವ ಮುನ್ನ ಬೆಟ್ಟದ ಬುಡದಲ್ಲಿರುವ ವೀರಭದ್ರೇಶ್ವರ ಸ್ವಾಮಿ ಮತ್ತು ಲಕ್ಷ್ಮೀನರಸಿಂಹ ಸ್ವಾಮಿ ದೇವಸ್ಥಾನಗಳು ನಿಮಗೆ ಎದುರಾಗುತ್ತವೆ. ಧಾರ್ಮಿಕ ನಂಬಿಕೆಗಳು ಇಲ್ಲವಾದರೂ ಪುರಾತನವಾದ ಇಲ್ಲಿನ ವಾಸ್ತುಶಿಲ್ಪದ ಸೊಬಗನ್ನು ಕಣ್ತುಂಬಿಕೊಳ್ಳಲಾದರೂ ಈ ದೇವಾಲಯಗಳಿಗೆ ಭೇಟಿ ನೀಡಬಹುದು.

ದೇವಾಲಯಗಳನ್ನು ಸುತ್ತಾಡಿ, ಬೆಟ್ಟದ ಪಾದ ತಲುಪಿ ಮುಂದೆ ವಿಶಾಲವಾದ ಹಾಸು ಬಂಡೆ ಏರುತ್ತಾ ಹೋದಂತೆ ಬೆಟ್ಟ ನಿಮಗೆ ಹತ್ತಿರವಾಗುತ್ತದೆ. ಬೆಟ್ಟದ ತುದಿ ತಲುಪುವ ಮಾರ್ಗ ಮಧ್ಯೆ ಅಲ್ಲಲ್ಲಿ ಇರುವ ಮರಗಳು ಬೆಟ್ಟ ಹತ್ತಿದ ದಣಿವನ್ನು ನೀಗಿಸುತ್ತವೆ. ಬೆಟ್ಟದ ತುದಿ ತಲುಪಿ, ಸುತ್ತಲಿನ ಹಸಿರನ್ನು ಕಂಡ ಮೇಲೆ ಬೆಟ್ಟ ಹತ್ತಿದ ಸುಸ್ತು ಎಷ್ಟೋ ದೂರಕ್ಕೆ ಓಡಿರುತ್ತದೆ.

ಬೆಟ್ಟದ ಮೇಲಿನ ತಣ್ಣನೆಯ ಗಾಳಿಗೆ ಮೈಯೊಡ್ಡಿ ಒಂದಷ್ಟು ಹೊತ್ತು ವಿರಮಿಸಿದ ಮೇಲೆ ಬೆಟ್ಟ ಇಳಿಯುವ ಸವಾಲು. ಸಾವನದುರ್ಗ ಬೆಟ್ಟದ ವೈಶಿಷ್ಟ್ಯವೇ ಅದು. ಹತ್ತುವಾಗ ಹತ್ತಿರ ಹತ್ತಿರವಾಗುವ ಬೆಟ್ಟ ಇಳಿಯುವಾಗ ದುರ್ಗಮವೆನಿಸುತ್ತದೆ. ಸಪಾಟಾದ ಮೆಟ್ಟಿಲುಗಳ
ಜಾರುವ ಹಾದಿಯಲ್ಲಿ ಇಳಿಯುವುದು ಕಾಲುಗಳ ಸತ್ವ ಪರೀಕ್ಷೆ ಮಾಡಿದಂತೆಯೇ ಸರಿ.