ನವದೆಹಲಿ (ಪಿಟಿಐ): ‘ಸಂಭಾವಿತ’ ಮನಮೋಹನ್ ಸಿಂಗ್ ಅವರೊಂದಿಗಿನ ನಾಲ್ಕು ದಶಕಗಳ ಒಡನಾಟವನ್ನು ಸ್ಮರಿಸುವ ಮೂಲಕ ರಾಷ್ಟ್ರಪತಿ ಪ್ರಣವ್ ಮುಖರ್ಜಿ ಅವರು ಅಧಿಕಾರದಿಂದ ನಿರ್ಗಮಿಸುತ್ತಿರುವ ಪ್ರಧಾನಿಗೆ ಹೃದಯಸ್ಪರ್ಶಿ ಬೀಳ್ಕೊಡುಗೆ ನೀಡಿದರು.
ಶನಿವಾರ ರಾತ್ರಿ ಆಯೋಜಿಸಿದ್ದ ಔತಣಕೂಟದಲ್ಲಿ ಮಾತನಾಡಿದ ಪ್ರಣವ್, ‘ಇಂತಹ ಸಂದರ್ಭದಲ್ಲಿ ಮಾತನಾಡುವುದು ಪದ್ಧತಿಯಲ್ಲ, ಆದರೆ, ನಾಲ್ಕು ದಶಕಗಳ ಕಾಲ ನನ್ನ ಜೊತೆ ಕೆಲಸ ಮಾಡಿದ ಸಭ್ಯ ವ್ಯಕ್ತಿಯೊಬ್ಬರಿಗೆ ವಿದಾಯ ಹೇಳುವಾಗ ಸಂಪ್ರದಾಯ ಮೀರುತ್ತೇನೆ’ ಎಂದರು.
1974ರಲ್ಲಿ ತಾವು ಕಿರಿಯ ಹಣಕಾಸಿ ಸಚಿವರಾಗಿದ್ದಾಗ ಮೊದಲ ಬಾರಿ ಸಿಂಗ್ ಅವರನ್ನು ಭೇಟಿಯಾಗಿದ್ದಾಗಿ ಪ್ರಣವ್ ತಿಳಿಸಿದರು. ಪ್ರಮುಖ ಆರ್ಥಿಕ ವಿಷಯಗಳಲ್ಲಿ ಸಿಂಗ್ ಅವರಿಗಿದ್ದ ಜ್ಞಾನದ ಆಳವನ್ನು ಕಂಡು ಸಂತಸ ಪಟ್ಟಿದ್ದಾಗಿಯೂ ಅವರು ಹೇಳಿದರು.
ಭಾಷಣದುದ್ದಕ್ಕೂ ಮನಮೋಹನ್ ಸಿಂಗ್ ಅವರನ್ನು ಶ್ಲಾಘಿಸಿದ ಪ್ರಣವ್,
‘ 1991ರಲ್ಲಿ ನೀವು ಆರ್ಥಿಕ ಸುಧಾರಣೆಗಳ ಹಾದಿಯನ್ನು ಆಯ್ಕೆ ಮಾಡಿಕೊಂಡ ಸಂದರ್ಭದಲ್ಲಿನ ನಿಮ್ಮ ಕೊಡುಗೆಗಳನ್ನು ಇಡೀ ರಾಷ್ಟ್ರ ನೆನಪಿನಲ್ಲಿಟ್ಟುಕೊಳ್ಳುತ್ತದೆ. 1990ರ ದಶಕದಲ್ಲಿ ದೇಶವು ಪ್ರಗತಿ ದರದಲ್ಲಿ ಮೈಲಿಗಲ್ಲು ಸಾಧಿಸಿದಾಗ ರಾಷ್ಟ್ರದ ಅಭಿವೃದ್ಧಿಯು ಹೊಸ ಮಜಲಿಗೆ ತೆರೆದುಕೊಂಡಿತ್ತು’ ಎಂದು ಹೇಳಿದರು.
ಪ್ರಣವ್ ಮುಖರ್ಜಿ ಅವರ ಮಾತಿಗೆ, ಶ್ಲಾಘನೆಗೆ ಮನಮೋಹನ್ ಸಿಂಗ್ ಸಮ್ಮತಿ ಸೂಚಿಸಿದರು.
‘ಒಂದು ವೇಳೆ ನಾನು ಇಲ್ಲಿ ಭಾವುಕನಾದರೆ ಕ್ಷಮಿಸಿ’ ಎಂದು ಮನವಿ ಮಾಡಿದ ಸಿಂಗ್, ಪ್ರಣವ್ ಅವರೊಂದಿಗಿನ ಗೆಳೆತನ ಹಾಗೂ ಒಡನಾಟಗಳನ್ನು ಸ್ಮರಿಸಿದರು.