ತಿರುಚನಾಪಳ್ಳಿ, ತಮಿಳುನಾಡು (ಪಿಟಿಐ): ಹಿರಿಯ ಸಿಪಿಎಂ ನಾಯಕ ಆರ್‌. ಉಮಾನಾಥ್‌ (93) ಕೆಲಕಾಲದ ಅಸ್ವಸ್ಥತೆಯ ನಂತರ ಬುಧವಾರ ಇಲ್ಲಿನ ಆಸ್ಪತ್ರೆಯಲ್ಲಿ ನಿಧನರಾದರು.
ಎಡಪಕ್ಷ ನಾಯಕಿಯಾಗಿದ್ದ ಪತ್ನಿ ಪಪ್ಪಾ ಮತ್ತು ಒಬ್ಬ ಪುತ್ರಿ ನೇತ್ರಾವತಿ ಈ ಹಿಂದೆಯೇ ಮೃತಪಟ್ಟಿದ್ದಾರೆ. ಪುತ್ರಿಯರಾದ ವಾಸುಕಿ ಮತ್ತು ನಿರ್ಮಲರಾಣಿ ಸಿಪಿಎಂ ಪಕ್ಷದಲ್ಲಿ ಸಕ್ರಿಯರಾಗಿದ್ದಾರೆ. ಕಾರ್ಮಿಕ ಮುಖಂಡರಾಗಿದ್ದ ಉಮಾನಾಥ್‌, ಕಮ್ಯುನಿಸ್ಟ್‌ ಐಕ್ಯರಂಗ ಸದಸ್ಯರಾಗಿ ರಾಜಕೀಯ ಜೀವನ ಆರಂಭಿಸಿದರು.
ನಂತರ ಸಿಪಿಎಂ ಪಾಲಿಟ್‌ ಬ್ಯೂರೋ ಸದಸ್ಯ, ಸಿಐಟಿಯುನ ಅಖಿಲ ಭಾರತೀಯ ಉಪ ಪ್ರಧಾನ ಕಾರ್ಯದರ್ಶಿ ಆಗಿದ್ದರು. 1962 ಮತ್ತು 1967ರಲ್ಲಿ ಪುದುಕೊಟ್ಟೈ ಲೋಕಸಭೆ ಕ್ಷೇತ್ರದಿಂದ ಎರಡು ಬಾರಿ ಸಂಸದರಾಗಿ ಆಯ್ಕೆಯಾಗಿದ್ದರು. ಬ್ರಿಟಿಷರ ವಿರುದ್ಧದ ಸ್ವಾತಂತ್ರ್ಯ ಹೋರಾಟದಲ್ಲಿ ಜೈಲುಶಿಕ್ಷೆ ಅನುಭವಿಸಿದ್ದರು.
