ನವದೆಹಲಿ (ಪಿಟಿಐ): ಕಾಂಗ್ರೆಸ್‌ ಸಂಸದೀಯ ಪಕ್ಷದ (ಸಿಪಿಪಿ) ಸಭೆ ಶನಿವಾರ (ಮೇ 24) ಇಲ್ಲಿ ನಡೆಯಲಿದ್ದು, ಇದರ ಅಧ್ಯಕ್ಷೆಯಾಗಿ ಸೋನಿಯಾ ಗಾಂಧಿ ಪುನರಾಯ್ಕೆ ಆಗುವ ನಿರೀಕ್ಷೆಯಿದೆ.
ಇದೇ ಸಂದರ್ಭದಲ್ಲಿ ಪಕ್ಷದ ಲೋಕಸಭಾ ಮತ್ತು ರಾಜ್ಯಸಭಾ ನಾಯಕರನ್ನು ಆರಿಸಲಾಗುತ್ತದೆೆ. ಕಾಂಗ್ರೆಸ್‌ಗೆ ಲೋಕಸಭೆಯಲ್ಲಿ ಅಗತ್ಯ 55 ಸ್ಥಾನ ಲಭ್ಯವಿಲ್ಲದ ಕಾರಣ ವಿರೋಧಪಕ್ಷದ ನಾಯಕನ ಆಯ್ಕೆ ಪ್ರಶ್ನಾರ್ಥಕವಾಗಿದೆ.
ಸೋನಿಯಾ ರಾಜೀನಾಮೆ: ಈ ಮಧ್ಯೆ, ಕೇಂದ್ರ ಸಂಸ್ಕೃತಿ ಸಚಿವಾಲಯದಡಿ ಬರುವ ನೆಹರೂ ಸ್ಮಾರಕ ವಸ್ತು ಸಂಗ್ರಹಾಲಯ ಮತ್ತು ಗ್ರಂಥಾಲಯದ ಸದಸ್ಯತ್ವ ಹಾಗೂ ನವೆಂಬರ್‌ 24ರಂದು ನಡೆಯುವ ನೆಹರೂರವರ 125ನೇ ಜನ್ಮದಿನೋತ್ಸವ ಆಚರಣಾ ಸಮಿತಿ ಸದಸ್ಯತ್ವಕ್ಕೆ ಸೋನಿಯಾ ಗಾಂಧಿ ರಾಜೀನಾಮೆ ಸಲ್ಲಿಸಿದ್ದಾರೆ ಎಂದು ಕಾಂಗ್ರೆಸ್‌ ಮೂಲಗಳು ತಿಳಿಸಿವೆ.
ರಾಜೀನಾಮೆ ನಿರಾಕರಣೆ: ಲೋಕಸಭಾ ಚುನಾವಣೆಯಲ್ಲಿ ಪಕ್ಷದ ಸೋಲಿನ ಹಿನ್ನೆಲೆಯಲ್ಲಿ ಅಸ್ಸಾಂ ಮುಖ್ಯಮಂತ್ರಿ ತರುಣ್‌ ಗೊಗೊಯ್‌ ರಾಜೀನಾಮೆ ನೀಡಬೇಕಿಲ್ಲ ಎಂದು ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ ಹೇಳಿದ್ದಾರೆ. ಸೋನಿಯಾ ಮತ್ತು ರಾಹುಲ್ ಗಾಂಧಿ ಅವರನ್ನು ಗೊಗೊಯ್‌ ಗುರುವಾರ ಭೇಟಿಯಾಗಿದ್ದು, ಜೂನ್‌ 1ರ ನಂತರ ಸಂಪುಟ ಪುನರ್‌ರಚಿಸಲಿದ್ದಾರೆ. ಎಂದು ಕೃಷಿ ಸಚಿವ ನಿಲೊಮಣಿ ಸೇನ್‌ ತಿಳಿಸಿದ್ದಾರೆ.
