ಸಿಹಿ ನೆನಪು ಹೊತ್ತು ಹಾರಿದ ಒಬಾಮ–ಮಿಷೆಲ್‌
ನವದೆಹಲಿ (ಪಿಟಿಐ): ಮೂರು ದಿನಗಳ ಯಶಸ್ವಿ ಭಾರತ ಪ್ರವಾಸ ಮುಗಿಸಿದ ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮ ಹಾಗೂ ಮಿಷೆಲ್‌ ಒಬಾಮ ಮಂಗಳವಾರ ಅವಿಸ್ಮರಣೀಯ ಸಿಹಿ ನೆನಪುಗಳನ್ನು ಹೊತ್ತು ಸೌದಿಗೆ ತೆರಳಿದರು.
ಇಲ್ಲಿಯ ಪಾಲಂ ವಿಮಾನ ನಿಲ್ದಾಣದಲ್ಲಿದ್ದ ಏರ್‌ಫೋರ್ಸ್‌ ಒನ್‌ ವಿಶೇಷ ವಿಮಾನ ಮೆಟ್ಟಿಲಲ್ಲಿ ನಿಂತು ಅಪ್ಪಟ ಭಾರತೀಯ ಶೈಲಿಯಲ್ಲಿ ತಮ್ಮ ಎರಡೂ ಕೈ ಜೋಡಿಸಿ ‘ನಮಸ್ತೆ’ ಎಂದು ಒಬಾಮ ಕೃತಜ್ಞತೆ ಸಲ್ಲಿಸಿದರು. ಕೇಂದ್ರ ಸಚಿವ ಪಿಯೂಷ್‌ ಗೋಯಲ್‌, ವಿದೇಶಾಂಗ ಕಾರ್ಯದರ್ಶಿ ಸುಜಾತಾ ಸಿಂಗ್‌ ಸೇರಿದಂತೆ ಅನೇಕ ಹಿರಿಯ ಅಧಿಕಾರಿಗಳು ಒಬಾಮ ದಂಪತಿಯನ್ನು ಬೀಳ್ಕೊಟ್ಟರು.
ಪೂರ್ವ ನಿಗದಿತ ಕಾರ್ಯಕ್ರಮದಂತೆ ಒಬಾಮ ದಂಪತಿ ಮಂಗಳವಾರ ವಿಶ್ವ ಪ್ರಸಿದ್ಧ ತಾಜ್‌ ಮಹಲ್‌ಗೆ ಭೇಟಿ ನೀಡಬೇಕಿತ್ತು. ಆದರೆ, ಇತ್ತೀಚೆಗೆ ನಿಧನರಾದ ಸೌದಿ ದೊರೆ ಅಬ್ದುಲ್ಲಾ ಕುಟುಂಬದ ಸದಸ್ಯರಿಗೆ ಸಾಂತ್ವನ ಹೇಳಲು ಆಗ್ರಾ ಪ್ರವಾಸ ಮೊಟಕುಗೊಳಿಸಿದ ಅವರು ದೆಹಲಿಯಿಂದ ನೇರವಾಗಿ ಸೌದಿಗೆ ತೆರಳಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.