ಹೈದರಾಬಾದ್ (ಪಿಟಿಐ): ಸಾರ್ವತ್ರಿಕ ಚುನಾವಣೆಗೆ ಸೆಮಿಫೈನಲ್ ಎಂದೇ ಕರೆಯಲಾಗಿದ್ದ ಆಂಧ್ರ ಪ್ರದೇಶ ಸ್ಥಳೀಯ ಸಂಸ್ಥೆಗಳ ಚುನಾವಣೆ ಫಲಿತಾಂಶ ಸೋಮವಾರ ಪ್ರಕಟವಾಗಿದ್ದು, ಸೀಮಾಂಧ್ರದಲ್ಲಿ ಟಿಡಿಪಿ ಮೇಲುಗೈ ಸಾಧಿಸಿದ್ದರೆ ತೆಲಂಗಾಣದಲ್ಲಿ ಕಾಂಗ್ರೆಸ್ ಹಿಡಿತ ಸಾಧಿಸಿದೆ. ಆದರೆ ಸೀಮಾಂಧ್ರದಲ್ಲಿ ಕಾಂಗ್ರೆಸ್ ಮುಖಭಂಗ ಅನುಭವಿಸಿದೆ.
ತೆಲಂಗಾಣದಲ್ಲಿ ತೆಲಂಗಾಣ ರಾಷ್ಟ್ರಸಮಿತಿಗೆ (ಟಿಆರ್ಎಸ್) ಮತ್ತು ಸೀಮಾಂಧ್ರದಲ್ಲಿ ವೈಎಸ್ಆರ್ ಕಾಂಗ್ರೆಸ್ಗೆ ಹಿನ್ನಡೆಯಾಗಿದೆ. ಗಜ್ವೆಲ್ ಮುನ್ಸಿಪಾಲಿಟಿಯಲ್ಲಿ ಟಿಡಿಪಿ ಜಯ ಸಾಧಿಸಿದೆ. ತೆಲಂಗಾಣದ ಬಹುತೇಕ ನಗರ ಸಭೆ ಮತ್ತು ಪಾಲಿಕೆಗಳಲ್ಲಿ ಕಾಂಗ್ರೆಸ್ ಜಯಸಾಧಿಸಿದೆ.
ಸೀಮಾಂಧ್ರ ಭಾಗದಲ್ಲಿ ಚಂದ್ರಬಾಬು ನಾಯ್ದು ನೇತೃತ್ವದ ಟಿಡಿಪಿ 60 ಕ್ಕೂ ಹೆಚ್ಚು ಪುರಸಭೆಗಳಲ್ಲಿ ಜಯಸಾಧಿಸಿದೆ. ಆಂಧ್ರಪ್ರದೇಶ ವಿಭಜನೆ ವಿರೋಧಿಸಿ ಹೋರಾಟ ನಡೆಸುತ್ತಾ ಬಂದಿದ್ದ ವೈಎಸ್ಆರ್ ಕಾಂಗ್ರೆಸ್ನ ವೈ.ಎಸ್.ಜಗನ್ ಮೋಹನ್ ರೆಡ್ಡಿ ನೇತೃತ್ವದ ವೈಎಸ್ಆರ್ಸಿ 17 ಪುರಸಭೆಗಳನ್ನು ತನ್ನ ತೆಕ್ಕೆಗೆ ಪಡೆದಿದೆ.
ಸೀಮಾಂಧ್ರದಲ್ಲಿ ವಿಜಯವಾಡ ಸೇರಿದಂತೆ ಟಿಡಿಪಿ ಐದು ಪಾಲಿಕೆಗಳಲ್ಲಿ ಜಯ ಸಾಧಿಸಿದೆ. ಕಡಪ ಸೇರಿ ಎರಡು ಪಾಲಿಕೆಗಳಲ್ಲಿ ವೈಎಸ್ಆರ್ ಕಾಂಗ್ರೆಸ್ ಅಧಿಕಾರ ಹಿಡಿಯಲಿದೆ. ತೆಲಂಗಾಣದ ಕರೀಂನಗರ ಪಾಲಿಕೆ ಟಿಆರ್ಎಸ್ ಪಾಲಾಗಿದೆ. ಇಲ್ಲಿನ 56 ನಗರಸಭೆಗಳಲ್ಲಿ ಕಾಂಗ್ರೆಸ್ 23 ರಲ್ಲಿ ಗೆಲುವು ಸಾಧಿಸಿದೆ.
ಇಲ್ಲಿ ಟಿಆರ್ಎಸ್ಗೆ 9, ಟಿಡಿಪಿಗೆ 4, ಬಿಜೆಪಿಗೆ 2ರಲ್ಲಿ ಗೆಲುವು ದಕ್ಕಿದೆ. ಉಳಿದ ನಗರಸಭೆಗಳಲ್ಲಿ ಯಾವುದೇ ಪಕ್ಷಗಳು ಬಹುಮತ ಪಡೆದಿಲ್ಲ. ಸೀಮಾಂಧ್ರದಲ್ಲಿ ಗೆಲುವಿಗೆ ಟಿಡಿಪಿ ಸಿಹಿಹಂಚಿ ವಿಜಯೋತ್ಸಾಹ ಆಚರಿಸಿತು. ಟಿಡಿಪಿ ಜಯ ಭ್ರಷ್ಟಾಚಾರ ವಿರುದ್ಧದ ಜಯ ಎಂದು ಸಿಂಗಪುರದಿಂದ ಚಂದ್ರಬಾಬು ನಾಯ್ಡು ಸಂದೇಶ ಕಳುಹಿಸಿದ್ದಾರೆ.
ಫಲಿತಾಂಶವನ್ನು ಪರಿಶೀಲಿಸುವುದಾಗಿ ವೈಎಸ್ಆರ್ ಕಾಂಗ್ರೆಸ್ ಹೇಳಿದೆ.