ಸೀಮಾತೀತ ಸಸ್ಯ ಜಗತ್ತು

ಹಿಂದೆ ಕ್ಯಾರೆಟ್‌ನ ಮೂಲಬಣ್ಣ ನೇರಳೆಯದಾಗಿತ್ತಂತೆ. ಮಿದುಳನ್ನು ಹೋಲುವ ಅಣಬೆಗಳಿವೆ, ಹಾಗೆಯೇ ಹವಳಗಳಿವೆ. ಮುಳ್ಳುಹಂದಿಯನ್ನು ಅಣಕಿಸುವಂತಹ ಅಣಬೆಗಳೂ ಉಂಟು. ನಾಗಲಿಂಗ ಪುಷ್ಟದ ಕಾಯಿ ಬಂದೂಕಿನ ಗುಂಡಿನಂತಿರುವುದರಿಂದ ನಸುಗೆಂಪು ಕೇಸರಗಳು ಹೂವಿನ ತಳಭಾಗದಿಂದ ಮೇಲೇರಿ, ಹಾವಿನ ಹೆಡೆಯಂತೆ ಬಾಗಿರುತ್ತದೆ. ಘನಾಕೃತಿಯ ಕಲ್ಲಂಗಡಿ ಹಣ್ಣನ್ನು ಬೆಳೆಯಲು ಹೀಚುಗಾಯಿಯನ್ನು ಗಾಜಿನ ಅಥವಾ ಸಿಂಡರ್ ಪೆಟ್ಟಿಗೆಯೊಳಗೆ ತೂರಿಸಿ ಬೆಳೆಯಲು ಬಿಡುತ್ತಾರೆ. ಹೀಚು ಬಲಿತಂತೆ ಅದು ಪೆಟ್ಟಿಗೆಯ ಆಕಾರವನ್ನು ಪಡೆಯುತ್ತದೆ. ವಿಕ್ಟೋರಿಯ ರೆಜಿಯ ಎಂಬ ಜಲಸಸ್ಯವನ್ನು ಮೊದಲಿಗೆ ಕೃಷಿ ಮಾಡಿದ ಕೀರ್ತಿ ಜೋಸೆಫ್ ಪಾಕ್ಸ್‌ಟನ್‌ಗೆ ಸೇರುತ್ತದೆ. ಸುಮಾರು ಒಂದೂವರೆ ಮೀಟರ್‌ನಷ್ಟು ಅಗಲ ಹರಡಿದ ಎಲೆಗಳ ದೃಢತೆಯನ್ನು ಪರೀಕ್ಷಿಸಲು ಆತ ಇಪ್ಪತ್ತು ಕಿಲೋ ಗ್ರಾಂ ತೂಕದ ಎಂಟು ವರ್ಷದ ಮಗಳನ್ನು ಅದರ ಮೇಲೆ ಕೂಡಿಸಿದ್ದನಂತೆ.

ಈ ಕೃತಿಯ ಪ್ರತಿ ಅಧ್ಯಾಯವೂ ವಿಸ್ಮಯಗಳಿಗೆ ತೆರೆದಿದೆ. ಡಾ. ಲೀಲಾ, ಸಸ್ಯಗಳ ವೈಶಿಷ್ಟ್ಯವನ್ನು ಪರಿಚಯಿಸುವಾಗ, ವೈಜ್ಞಾನಿಕ ವಿವರಗಳನ್ನು ಕೊಡುವುದರಿಂದಲೇ ಸೋಜಿಗಕ್ಕೆ ಒಂದು ಅರ್ಥಬರುತ್ತದೆ; ಮತ್ತಷ್ಟು ಓದಲು ಕುತೂಹಲ ಹುಟ್ಟುತ್ತದೆ. ಈ ಲೇಖಕಿ ಧಾರಾಳವಾಗಿ ‘ಮಂಕುತಿಮ್ಮನ ಕಗ್ಗ’, ವಚನಗಳು, ದಾಸರ ಕೀರ್ತನೆಗಳು, ಪುರಾಣೋಕ್ತಿಗಳನ್ನು ಇಲ್ಲಿನ ಅನೇಕ ಲೇಖನಗಳಲ್ಲಿ ಬಳಸಿದ್ದಾರೆ. ಅವು ವಿಷಯಕ್ಕೆ ಪೂರಕವಾಗಿವೆಯೇ ವಿನಾ ಭಾರವಾಗಿಲ್ಲ. ಬಹುಶಃ ವಿಜ್ಞಾನ ಲೇಖಕರು ತಮ್ಮ ಬರಹಗಳನ್ನು ಸಮೃದ್ಧಗೊಳಿಸಲು ತಮ್ಮ ಓದನ್ನು ಹೇಗೆ ವಿಸ್ತರಿಸಿಕೊಳ್ಳಬಹುದು ಎಂಬುದಕ್ಕೂ ಈ ಕೃತಿ ಉದಾಹರಣೆಯಾಗುತ್ತದೆ.