ಮುಂಬೈ(ಪಿಟಿಐ): ಮುಂಬೈ ಷೇರು ವಿನಿಮಯ ಕೇಂದ್ರದ (ಬಿಎಸ್ಇ) ಸಂವೇದಿ ಸೂಚ್ಯಂಕ ಶುಕ್ರವಾರದ ವಹಿವಾಟಿನಲ್ಲಿ 29,844 ಅಂಶಗಳ ಹೊಸ ಮಟ್ಟಕ್ಕೆ ತಲುಪಿತ್ತು. ಆದರೆ, ಹೂಡಿಕೆದಾರರು ಲಾಭ ಗಳಿಕೆ ಉದ್ದೇಶದಿಂದ ಷೇರುಗಳ ಮಾರಾಟಕ್ಕೇ ಆದ್ಯತೆ ನೀಡಿದ್ದರಿಂದ ದಿಢೀರ್ ಉಂಟಾದ ಒತ್ತಡದಲ್ಲಿ 499 ಅಂಶಗಳಷ್ಟು ಭಾರಿ ಕುಸಿತ ಕಂಡಿತು. ನಂತರ 29,183 ಅಂಶಗಳಲ್ಲಿ ವಹಿವಾಟು ಕೊನೆಗೊಳಿಸಿತು.
ಇದು 2015ರಲ್ಲಿ ಈವರೆಗಿನ ವಹಿವಾಟಿನಲ್ಲಿ ದಾಖಲಾಗಿರುವ ದಿನವೊಂದರ ಎರಡನೇ ಅತಿ ದೊಡ್ಡ ಸೂಚ್ಯಂಕ ಕುಸಿತವಾಗಿದೆ.
ಬ್ಯಾಂಕಿಂಗ್, ಫಾರ್ಮಾ ಮತ್ತು ಆಟೊ ವಲಯದ ಷೇರುಗಳಲ್ಲಿ ಲಾಭ ಗಳಿಕೆ ಉದ್ದೇಶದಿಂದ ಹೂಡಿಕೆದಾರರು ಮಾರಾಟಕ್ಕೆ ಮುಗಿಬಿದ್ದಿದ್ದರ ಫಲವಾಗಿ ಸಂವೇದಿ ಸೂಚ್ಯಂಕ ಈ ಪ್ರಮಾಣದ ಕುಸಿತ ಅನುಭವಿಸಿದೆ.
ವಿನಿಮಯ ಮಾರುಕಟ್ಟೆಯಲ್ಲಿ ಡಾಲರ್ ಎದುರು ರೂಪಾಯಿ ಮೌಲ್ಯ ತಗ್ಗಿದೆ. ಒಂದು ಡಾಲರ್ಗೆ ₨62ರಂತೆ ವಿನಿಮಯಗೊಂಡಿದೆ. ಇದೂ ಕೂಡಾ ಸೂಚ್ಯಂಕ ಕುಸಿತಕ್ಕೆ ಕಾರಣವಾಗಿದೆ.
ಇದಕ್ಕೂ ಮುನ್ನ, ದಿನದ ಆರಂಭದಲ್ಲಿ ಸೂಚ್ಯಂಕ ಸಾರ್ವಕಾಲೀನ ದಾಖಲೆ ಮಟ್ಟವಾದ 29,844 ಅಂಶಗಳನ್ನು ತಲುಪಿತ್ತು.
ಬಿಎಸ್ಇ ಸಂವೇದಿ ಸೂಚ್ಯಂಕವು ಕಳೆದ 10 ವಹಿವಾಟುಗಳಲ್ಲಿ 2,346 ಅಂಶಗಳಷ್ಟು ಏರಿಕೆ ದಾಖಲಿಸಿದೆ.
ನಿಫ್ಟಿಯಲ್ಲೂ ಕುಸಿತ
ರಾಷ್ಟ್ರೀಯ ಷೇರು ವಿನಿಮಯ ಕೇಂದ್ರದ (ಎನ್ಎಸ್ಇ) ಸೂಚ್ಯಂಕ ‘ನಿಫ್ಟಿ’ ಕೂಡಾ ಆರಂಭದ ವಹಿವಾಟಿನಲ್ಲಿ 8,996 ಅಂಶಗಳಿಗೆ ಏರಿಕೆ ಕಾಣುವ ಮೂಲಕ ಸಾರ್ವಕಾಲೀನ ಗರಿಷ್ಠ ಮಟ್ಟಕ್ಕೆ ತಲುಪಿತ್ತು.
ನಂತರದಲ್ಲಿ 8,809 ಅಂಶಗಳಿಗೆ ಕುಸಿದು ವಹಿವಾಟು ಅಂತ್ಯಗೊಳಿಸಿತು. ದಿನದ ವಹಿವಾಟಿನಲ್ಲಿ ‘ನಿಫ್ಟ’ 143 ಅಂಶಗಳಷ್ಟು ಹಾನಿ ಅನುಭವಿಸಿದೆ.
ಬ್ಯಾಂಕಿಂಗ್ ವಲಯದ ಷೇರುಗಳು ಶೇ 3ಕ್ಕೂ ಅಧಿಕ ನಷ್ಟ ಅನುಭವಿಸಿದವು. ಗ್ರಾಹಕ ಬಳಕೆ ವಸ್ತುಗಳು ಮತ್ತು ವಾಹನ ಉದ್ಯಮ ವಲಯದ ಷೇರುಗಳು ಸಹ ಹೆಚ್ಚಿನ ಹಾನಿ ಅನುಭವಿಸಿದವು. ಉಳಿದಂತೆ ಪ್ರಧಾನ ಸರಕುಗಳು, ಲೋಹ ಹಾಗೂ ತೈಲ ಮತ್ತು ಅನಿಲ ಕಂಪೆನಿಗಳ ಷೇರುಗಳು ನಷ್ಟ ಅನುಭವಿಸಿವೆ.