ಸ್ಕಾಟ್ಲೆಂಡ್‌: ಏಕತೆಗೆ ಬಲ
ಬ್ರಿಟನ್‌ನಿಂದ ಸ್ಕಾಟ್ಲೆಂಡ್‌ನ ವಿಮೋಚನೆಗಾಗಿ ಇತ್ತೀಚೆಗೆ ನಡೆದ ಜನಮತಗಣನೆಯಲ್ಲಿ ಪ್ರತ್ಯೇಕತಾವಾದಿಗಳಿಗೆ ಸೋಲುಂಟಾಗಿದೆ. ಅಖಂಡ ಯುನೈ-ಟೆಡ್‌ ಕಿಂಗ್‌ಡಂನ ಭಾಗವಾಗಿಯೇ ಇರುವುದರ ಪರವಾಗಿ ಶೇ 55ಕ್ಕೂ ಹೆಚ್ಚು ಜನ ಮತ ಚಲಾಯಿಸಿದ್ದಾರೆ. ಅವರ ಈ ನಡೆ ಬ್ರಿಟನ್‌ ಮಾತ್ರವಲ್ಲ, ವಿಮೋಚನೆಯ ಕೂಗು ಕೇಳಿಬರುತ್ತಿರುವ ವಿಶ್ವದ ಇತರ ಭಾಗಗಳಿಗೂ ತಕ್ಕ ಸಂದೇಶವನ್ನೇ ರವಾನಿಸಿದೆ.
ಬ್ರಿಟನ್‌ ಪ್ರಧಾನಿ ಡೇವಿಡ್‌ ಕ್ಯಾಮರಾನ್‌ ಬೀಸುವ ದೊಣ್ಣೆಯಿಂದ ಪಾರಾಗಿದ್ದಾರೆ. ಒಂದು ವೇಳೆ ಜನಾಭಿಪ್ರಾಯ ವಿಮೋಚನೆಯ ಪರವಾಗಿಯೇ ಇದ್ದಿದ್ದರೆ ಬ್ರಿಟನ್‌ ಐತಿಹಾಸಿಕ ಬದಲಾವಣೆಗಳಿಗೆ ಸಾಕ್ಷಿಯಾಗುತ್ತಿತ್ತು. ದೇಶದ ಆರ್ಥಿಕ ಸ್ಥಿತಿಗತಿಗೆ ಹೊಡೆತ ಬೀಳುತ್ತಿತ್ತು. ಅಷ್ಟೇ ಅಲ್ಲ, ಸ್ಕಾಟ್ಲೆಂಡ್‌ ಸಹ ಸ್ವಾತಂತ್ರ್ಯ ಸಿಕ್ಕ ಖುಷಿಯನ್ನು ಮುಕ್ತವಾಗಿ ಅನುಭವಿಸಲು ಸಾಧ್ಯವಾಗುತ್ತಿರಲಿಲ್ಲ.
ಹೊಸ ರಾಷ್ಟ್ರವಾಗಿ ಅಸ್ತಿತ್ವಕ್ಕೆ ಬಂದಾಗ ಎದುರಿಸಬೇಕಾದ ಆರ್ಥಿಕ ಅಡಚಣೆಗಳು, ಅಂತರರಾಷ್ಟ್ರೀಯ ಬಿಕ್ಕಟ್ಟುಗಳನ್ನು ಎದುರಿಸುವಷ್ಟು ಮಾನಸಿಕ ಸಿದ್ಧತೆಯನ್ನು ಅದಿನ್ನೂ ಮಾಡಿಕೊಂಡಿರಲಿಲ್ಲ. ಹೀಗಾಗಿ ಜನಾಭಿಪ್ರಾಯದ ಫಲಿತಾಂಶವನ್ನು ಇಡೀ ದೇಶ ಕಾತರದಿಂದ ಎದುರು ನೋಡುತ್ತಿತ್ತು. ಬ್ರಿಟನ್‌ ಮತ್ತು ಸ್ಕಾಟ್ಲೆಂಡ್‌ನ ಸಂಬಂಧಕ್ಕೆ ಶತಮಾನಗಳ ಇತಿಹಾಸ ಇದೆ.
1706ರ ತನಕ ಸ್ವತಂತ್ರ ದೇಶವಾಗಿದ್ದ ಸ್ಕಾಟ್ಲೆಂಡ್‌ ವಿವಿಧ ಸ್ಥಿತ್ಯಂತರಗಳಿಂದ ತೀವ್ರ ಆರ್ಥಿಕ ಸಂಕಷ್ಟಕ್ಕೆ ತುತ್ತಾಗಿ, ಮುನ್ನೂರು ವರ್ಷಗಳ ಹಿಂದೆ ಯುನೈಟೆಡ್‌ ಕಿಂಗ್‌ಡಂನ ತೆಕ್ಕೆಗೆ ಬಂತು. ಆದರೆ ನಂತರದ ದಿನಗಳಲ್ಲಿ ಅಲ್ಲಿನ ಆರ್ಥಿಕತೆ ಗರಿಗೆದರಿತು. ಬೌದ್ಧಿಕ ವಲಯ ಮತ್ತು ಪ್ರವಾಸಿ ತಾಣಗಳು ಬೆಳಕಿಗೆ ಬಂದವು. ಲೇಬರ್‌ ಪಕ್ಷದ ಪ್ರಭಾವದಿಂದ ರಾಜಕೀಯವಾಗಿಯೂ ಈ ಪ್ರದೇಶ ಪ್ರಬಲವಾಯಿತು. ಇಲ್ಲಿನ ಖ್ಯಾತ ತೈಲ ಭಂಡಾರಗಳು ಹಾಗೂ ಪರಮಾಣು ಘಟಕಗಳ ಮೇಲೆ ಬ್ರಿಟನ್‌ನ ಹಿಡಿತ ಇದ್ದರೂ ಶಿಕ್ಷಣ, ಪೊಲೀಸ್‌, ನ್ಯಾಯಾಂಗ ವ್ಯವಸ್ಥೆ, ನೀರು ಪೂರೈಕೆ ಎಲ್ಲವನ್ನೂ ಸ್ಕಾಟ್ಲೆಂಡ್‌ ಸ್ವತಂತ್ರವಾಗಿಯೇ ನಿರ್ವಹಿಸುತ್ತಿದೆ.
ಒಂದು ವೇಳೆ ಪ್ರತ್ಯೇಕಗೊಂಡರೆ ಬ್ರಿಟನ್‌ನ ಆರ್ಥಿಕ ಸ್ಥಿತಿಯನ್ನೇ ದುರ್ಬಲಗೊಳಿಸುವಷ್ಟು ಪ್ರಭಾವ ಈಗ ಅದಕ್ಕಿದೆ. ಆದರೂ ಬ್ರಿಟನ್‌ ತಮ್ಮ ಇತರ ಬೇಡಿಕೆಗಳನ್ನು ಅಲಕ್ಷಿಸುತ್ತಿದೆ ಎಂಬ ಕೊರಗು ಮೂಲನಿವಾಸಿಗಳಿಗೆ ಇದ್ದೇ ಇದೆ. ಅದರಿಂದಲೇ ಸ್ಕಾಟ್ಲೆಂಡ್‌ನ ಆಂತರ್ಯದಲ್ಲಿ ಆಗಾಗ್ಗೆ ಪ್ರತ್ಯೇಕತೆಯ ಕೂಗು ಕೇಳಿಬರುತ್ತಲೇ ಇರುತ್ತದೆ.
ಈ ಬಾರಿ ಪ್ರತ್ಯೇಕ ರಾಷ್ಟ್ರದ ಪರ ಮತ್ತು ವಿರೋಧಿ ಗುಂಪಿನ ನಡುವೆ ಹೆಚ್ಚಿನ ಅಂತರ ಇಲ್ಲದಿದ್ದುದು ಗಮನಾರ್ಹ. ಇಂತಹದ್ದೊಂದು ಆತಂಕ ಇದ್ದುದರಿಂದಲೇ ಆಡಳಿತಾರೂಢ ಕನ್ಸರ್ವೆಟಿವ್‌ ಪಕ್ಷ, ವಿರೋಧಿ ಲೇಬರ್‌ ಪಕ್ಷ ಮತ್ತು ಲಿಬರಲ್‌ ಡೆಮೊಕ್ರಾಟ್‌ ಪಕ್ಷಗಳು ಒಗ್ಗಟ್ಟಿನಿಂದ ಪ್ರತ್ಯೇಕತಾ ವಿರೋಧಿಗಳ ಗುಂಪನ್ನು ಮುನ್ನಡೆಸಿದ್ದವು. ಆದರೆ ಈಗ ತಮಗೆ ಸಿಕ್ಕ ಗೆಲುವನ್ನು ಅವು ಶಾಶ್ವತ ಎಂದುಕೊಳ್ಳುವಂತೇನೂ ಇಲ್ಲ. ಇನ್ನು ಒಂದು ವರ್ಷದಲ್ಲಿ ದೇಶ ಮಹಾ ಚುನಾವಣೆ ಎದುರಿಸಲಿದೆ. ಹೀಗಾಗಿ ವಿಕೇಂದ್ರೀಕರಣ ಮತ್ತು ಇನ್ನಷ್ಟು ಸ್ವಾಯತ್ತತೆಗೆ ಬದ್ಧವಾಗುವುದಾಗಿ ಸ್ಕಾಟ್ಲೆಂಡ್‌ಗೆ ನೀಡಿದ್ದ ಭರವಸೆಯನ್ನು ಈಡೇರಿಸಲೇಬೇಕಾದ ಅತಿ ದೊಡ್ಡ ಸವಾಲು ಈಗ ಅವುಗಳ ಮುಂದೆ ಇದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.