ನವದೆಹಲಿ (ಪಿಟಿಐ): ಹಂದಿಜ್ವರದಿಂದ ಬಳಲುತ್ತಿದ್ದ ಗಾಜಿಯಾಬಾದ್‌ನ ಮಹಿಳೆಯೊಬ್ಬರು ಬುಧವಾರ ದೆಹಲಿ ಆಸ್ಪತ್ರೆಯಲ್ಲಿ ಮೃತಪಟ್ಟಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಎಚ್‌1ಎನ್‌1 ವೈರಾಣು ಸೋಂಕು ತಗುಲಿದ್ದ ಗಾಜಿಯಾಬಾದ್‌ನ 51 ವರ್ಷದ ಶೀಲಾ ಗೋಯಲ್‌ ಎಂಬುವವರು ಡಿ.21ರಂದು ಇಲ್ಲಿನ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಆಸ್ಪತ್ರೆಗೆ ದಾಖಲಾಗುವಾಗಲೇ ರೋಗಿಯ ಸ್ಥಿತಿ ಗಂಭೀರವಾಗಿತ್ತು ಎಂದು ವೈದ್ಯರು ತಿಳಿಸಿದ್ದಾರೆ.
ಇದು ಈ ವರ್ಷ ದೆಹಲಿ ಸುತ್ತಮುತ್ತ ಹಂದಿಜ್ವರಕ್ಕೆ ಬಲಿಯಾದ ಮೊದಲ ಪ್ರಕರಣ. ದೆಹಲಿ ಹಾಗೂ ಸುತ್ತಮುತ್ತ ಜನವರಿಯಿಂದ ಇದುವರೆಗೆ ಒಟ್ಟು 32 ಜನರಲ್ಲಿ ಎಚ್‌1ಎನ್‌1 ವೈರಾಣು ಸೋಂಕು ಪತ್ತೆಯಾಗಿದೆ.
