ನವದೆಹಲಿ (ಪಿಟಿಐ): ಹಳೆಯ ಕಡತಗಳನ್ನು ವಿಲೇವಾರಿ ಮಾಡುತ್ತಿರುವ ಸರ್ಕಾರ, ಆಯ್ಕೆ ಆಧಾರಿತ ಹುದ್ದೆಗಳಲ್ಲಿ ಸೇವೆ ಸಲ್ಲಿಸಿ ನಿವೃತ್ತರಾಗಿ ಐದು ವರ್ಷಗಳಾಗಿರುವ ಅಧಿಕಾರಿಗಳಿಗೆ ಸಂಬಂಧಿಸಿದ ಗೋಪ್ಯ ಮಾಹಿತಿಯ ಕಡತಗಳನ್ನು ನಾಶ ಮಾಡಲು ನಿರ್ಧರಿಸಿದೆ.
ವಿವಿಧ ಇಲಾಖೆ ಮತ್ತು ಸಚಿವಾಲಯಗಳ ಆಪ್ತ ಕಾರ್ಯದರ್ಶಿಗಳು, ಪ್ರಧಾನ ಆಪ್ತ ಕಾರ್ಯದರ್ಶಿಗಳು, ಹಿರಿಯ ಪ್ರಧಾನ ಆಪ್ತ ಕಾರ್ಯದರ್ಶಿಗಳ ವಾರ್ಷಿಕ ಗೋಪ್ಯ ವರದಿ (ಎಸಿಆರ್‌) ಅಥವಾ ವಾರ್ಷಿಕ ಸಾಧನೆ ನಿರ್ಣಯದ ವರದಿಗಳನ್ನು(ಎಪಿಎಆರ್) ಕಲೆ ಹಾಕಲಾಗಿರುತ್ತದೆ. ನಿಯಮಾನುಸಾರ ಈ ಅಧಿಕಾರಿಗಳು ಸೇವೆಯಿಂದ ನಿವೃತ್ತರಾದ ಮೇಲೂ ಐದು ವರ್ಷಗಳ ಕಾಲ ಅವರಿಗೆ ಸಂಬಂಧಿಸಿದ ಈ ವರದಿಗಳನ್ನು ಕಾದಿರಿಸಲಾಗುತ್ತದೆ. ನಿವೃತ್ತ ಅಧಿಕಾರಿಗಳು ತಮಗೆ ಸಂಬಂಧಿಸಿದ ಗೋಪ್ಯ ವರದಿಯನ್ನು ನೀಡುವಂತೆ ಕೋರಿದರೆ ಅದನ್ನು ಒದಗಿಸಲಾಗುತ್ತದೆ.
ನಿಗಧಿತ ಅವಧಿ ಮುಗಿದ ಮೇಲೆ ಇಂತಹ ಕಡತಗಳನ್ನು ನಾಶ ಮಾಡಬಹುದು ಎಂದು ವಿವಿಧ ಇಲಾಖೆ ಮತ್ತು ಸಚಿವಾಲಯಗಳಿಗೆ ಸಿಬ್ಬಂದಿ ಮತ್ತು ತರಬೇತಿ ಇಲಾಖೆ (ಡಿಒಪಿಟಿ) ಈಗ ಸುತ್ತೋಲೆ ಹೊರಡಿಸಿದೆ.
