ಹುದ್ದೆ ಭರ್ತಿಗೆ ಕೆಪಿಎಸ್‌ಸಿಗೆ ಪ್ರಸ್ತಾವ
ಬೆಂಗಳೂರು: ಎ ಮತ್ತು ಬಿ ಗುಂಪಿನ ಒಟ್ಟು 452 ಮಂದಿ ಗೆಜೆಟೆಡ್‌ ಪ್ರೊಬೇಷನರಿ ಅಧಿಕಾರಿಗಳನ್ನು ನೇಮಕ ಮಾಡಿಕೊಡುವಂತೆ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆಯು ಕರ್ನಾಟಕ ಲೋಕಸೇವಾ ಆಯೋಗವನ್ನು (ಕೆಪಿಎಸ್‌ಸಿ) ಕೇಳಿದೆ. ಈ ಸಂಬಂಧದ ಪ್ರಸ್ತಾವ ಮಂಗಳವಾರ ಕೆಪಿಎಸ್‌ಸಿ ಕಚೇರಿ ತಲುಪಿದೆ.
ಇದರಲ್ಲಿ ‘ಎ’ ಗುಂಪಿನ 202 ಮತ್ತು ಬಿ ಗುಂಪಿನ 250 ಹುದ್ದೆಗಳಿವೆ. ಸಂವಿಧಾನದ 371 ಜೆ ಪ್ರಕಾರ ಮೀಸಲಾತಿ ಹಾಗೂ ಇತರ ಮೀಸಲಾತಿಗಳನ್ನು ಸರ್ಕಾರವೇ ನಿಗದಿ ಮಾಡಿದೆ.
2011ರ ನಂತರ ಗೆಜೆಟೆಡ್‌ ಪ್ರೊಬೇಷನರಿ ಹುದ್ದೆಗಳಿಗೆ ನೇಮಕಾತಿ ನಡೆದಿರಲಿಲ್ಲ. 2011ನೇ ಸಾಲಿನ ನೇಮಕಾತಿ ಪಟ್ಟಿಯನ್ನು ವ್ಯಾಪಕ ಭ್ರಷ್ಟಾಚಾರದ ಆರೋಪದ ಮೇಲೆ ರದ್ದು ಪಡಿಸಲಾಗಿದೆ.
ಕೆಪಿಎಸ್‌ಸಿ ಸುಧಾರಣೆಗೆ ಸಂಬಂಧಿಸಿದ ಪಿ.ಸಿ. ಹೋಟಾ ಸಮಿತಿಯ ಶಿಫಾರಸಿನ ಪ್ರಕಾರವೇ ಈಗ ನೇಮಕಾತಿ ಪ್ರಕ್ರಿಯೆ ನಡೆಯಲಿದೆ. ಹೊಸ ಪಠ್ಯವನ್ನು ರೂಪಿಸಲಾಗಿದ್ದು 1950 ಅಂಕಗಳ ಲಿಖಿತ ಪರೀಕ್ಷೆ ಹಾಗೂ 200 ಅಂಕಗಳಿಗೆ ಸಂದರ್ಶನ ನಡೆಯಲಿದೆ. ಯುಪಿಎಸ್‌ಸಿ ಮಾದರಿಯನ್ನೇ ಈ ಬಾರಿ ನೇಮಕಾತಿಗೆ ಅನುಸರಿಸಲಾಗುತ್ತದೆ.
ವಯೋಮಿತಿ ಏರಿಕೆ
2011ರಿಂದ ನೇಮಕಾತಿ ಪ್ರಕ್ರಿಯೆ ನಡೆಯದೇ ಇರುವುದರಿಂದ ಈ ಬಾರಿ ಪರೀಕ್ಷೆ ತೆಗೆದುಕೊಳ್ಳುವವರ ವಯಸ್ಸಿನ ಮಿತಿಯನ್ನು ಹೆಚ್ಚಿಸಲಾಗಿದೆ. ಸಾಮಾನ್ಯ ವರ್ಗದ ಅಭ್ಯರ್ಥಿಗಳಿಗೆ 37, ಹಿಂದುಳಿದ ವರ್ಗದವರಿಗೆ 40 ಹಾಗೂ ಪರಿಶಿಷ್ಟರಿಗೆ 42 ವರ್ಷದ ಮಿತಿ ಹೇರಲಾಗಿದೆ.
*ಪ್ರಸ್ತಾವ ಬಂತು, ಅಧ್ಯಕ್ಷರು ಬರಲಿಲ್ಲ!
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.