ನವದೆಹಲಿ (ಪಿಟಿಐ): ಭಾರತದ ಪೂರ್ವ ಕರಾವಳಿಗೆ ಅಪ್ಪಳಿಸಿದ್ದ ವಿದ್ವಂಸಕಾರಿ ಚಂಡಮಾರುತ ‘ಹುದ್ ಹುದ್’ದ ಸುಳಿವು ನೀಡುವಲ್ಲಿ ಈ ವರ್ಷದ ಜನವರಿಯಿಂದ ಕಾರ್ಯಾಚರಣೆ ಆರಂಭಿಸಿದ್ದ ಇನ್ಸ್ಯಾಟ್ 3ಡಿ ಕಳುಹಿಸಿದ್ದ ಚಿತ್ರಗಳು ಪ್ರಮುಖ ಪಾತ್ರ ವಹಿಸಿದ್ದವು ಎಂದು ಹವಾಮಾನ ಇಲಾಖೆ ತಿಳಿಸಿದೆ.
ಇನ್ಸ್ಯಾಟ್3ಡಿ ಉಪಗ್ರಹ ರವಾನಿಸಿದ ಎಲ್ಲಾ ಚಿತ್ರಗಳನ್ನೂ ಇದೇ ಮೊದಲ ಬಾರಿಗೆ ಸಂಪೂರ್ಣವಾಗಿ ಉಪಯೋಗಿಸಿಕೊಳ್ಳಲಾಗಿದೆ. ಅಲ್ಲದೆ ಅದು ಕಳುಹಿಸಿದ ಚಂಡಮಾರುತದ ಚಿತ್ರಗಳನ್ನು ಇಲಾಖೆಯ ಜಾಲತಾಣದಲ್ಲಿ ಪ್ರಕಟಿಸುವ ಮೂಲಕ ಜನರಿಗೆ ಲಭ್ಯವಾಗುವಂತೆ ಮಾಡಲಾಗಿತ್ತು ಎಂದು ಐಎಂಡಿ ಹೇಳಿದೆ.
‘ಉಪಗ್ರಹ ಕಳುಹಿಸಿದ ಚಿತ್ರಗಳು ಉತ್ತಮ ರೆಸೊಲ್ಯೂಷನ್ ಹೊಂದಿದ್ದವು ಮತ್ತು ಖಚಿತ ಮಾಹಿತಿ ನೀಡಿತ್ತು’ ಎಂದು ಚಂಡಮಾರುತ ಮುನ್ನೆಚ್ಚರಿಕೆ ವಿಭಾಗದ ವಿಜ್ಞಾನಿ ಮೃತ್ಯುಂಜಯ್ ಮಹಾಪಾತ್ರ ಹೇಳಿದರು.