ನವದೆಹಲಿ(ಪಿಟಿಐ): ಇ–ಕಾಮರ್ಸ್‌ ತಾಣ ‘ಫ್ಲಿಪ್‌ಕಾರ್ಟ್‌’ನ ಭಾರಿ ರಿಯಾಯಿತಿ ದರ ಮಾರಾಟದ ಬಗ್ಗೆ ವ್ಯಾಪಾರಿಗಳಿಂದ ಹಲವಾರು ದೂರುಗಳು ಬಂದಿದೆ ಹಾಗಾಗಿ ಇ–ಕಾಮರ್ಸ್‌ ವ್ಯಾಪಾರದ ಬಗ್ಗೆ ಹೆಚ್ಚಿನ ಸ್ಪಷ್ಟತೆ ಹೊಂದುವ ಅಗತ್ಯ ಇದೆಯೇ ಎಂಬುದನ್ನು ಪರಿಶೀಲಿಸುವುದಾಗಿ ಕೇಂದ್ರ ಸರ್ಕಾರ ಹೇಳಿದೆ.
‘ಫ್ಲಿಪ್‌ಕಾರ್ಟ್‌’ ಸೋಮವಾರ ನಡೆಸಿದ ‘ಬಿಗ್‌ ಬಿಲಿಯನ್‌ ಡೇ’ ರಿಯಾಯಿತಿ ವ್ಯಾಪಾರದಲ್ಲಿ ಹಲವಾರು ಉತ್ಪನ್ನಗಳ ರಿಯಾಯಿತಿ ಮಾರಾಟದ ಬಗ್ಗೆ ಚಿಲ್ಲರೆ ಮತ್ತು ಸಗಟು ವ್ಯಾಪಾರಿಗಳು ತಗಾದೆ ಎತ್ತಿದ್ದಾರೆ. ಇಂತಹ ರಿಯಾಯಿತಿ ದರದ ಮಾರಾಟಗಳು ಚಿಲ್ಲರೆ ಮಾರುಕಟ್ಟೆಯ ಮೇಲೆ ಅಡ್ಡಪರಿಣಾಮ ಬೀರುವ ಸಂಭವವಿದೆ ಎಂದು ಅವರು ಹೇಳಿದ್ದಾರೆ.
‘ನಮಗೆ ಹಲವು ದೂರುಗಳು ಬಂದಿರುವ ಕಾರಣ ಪರಿಸ್ಥಿತಿಯ ಬಗ್ಗೆ ಪರಿಶೀಲನೆ ನಡೆಸುತ್ತೇವೆ’ ಎಂದು ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಬುಧವಾರ ತಿಳಿಸಿದರು.
ಇ–ಕಾಮರ್ಸ್‌ಗೆ ಪ್ರತ್ಯೇಕ ನೀತಿ ಜಾರಿಗೊಳಿಸುವ ಸಂಭವವಿದೆಯೇ ಎಂದು ಕೇಳಿದಾಗ, ಅದನ್ನೂ ಪರಿಗಣಿಸುವುದಾಗಿ ಹೇಳಿದರು.
‘ಈಗ ಹಲವು ದೂರುಗಳು ಬಂದಿವೆ. ಪರಿಸ್ಥಿತಿಯನ್ನು ಅಧ್ಯಯನ ನಡೆಸುತ್ತೇವೆ. ಪ್ರತ್ಯೇಕ ನೀತಿಯೇ ಜಾರಿಯಾಗಬೇಕೇ ಅಥವಾ ಯಾವುದೇ ರೀತಿಯ ಸ್ಪಷ್ಟೀಕರಣ ಅಗತ್ಯವಿದೆಯೇ ಎಂಬುದನ್ನು ಪರಿಶೀಲಿಸುತ್ತೇವೆ’ ಎಂದು ನಿರ್ಮಲಾ ತಿಳಿಸಿದರು.
‘ಬಿಗ್‌ ಬಿಲಿಯನ್‌ ಡೇ’ ಮಾರಾಟದಲ್ಲಿ 15 ಲಕ್ಷ ಗ್ರಾಹಕರು ಖರೀದಿ ಮಾಡಿದ್ದಾರೆ. ₨600 ಕೋಟಿ ಮೊತ್ತದ ಉತ್ಪನ್ನಗಳು ಕೇವಲ 10 ಗಂಟೆಗಳ ಅವಧಿಯಲ್ಲಿ ಮಾರಾಟವಾಗಿವೆ ಎಂದು ‘ಫ್ಲಿಪ್‌ಕಾರ್ಟ್‌’ ಹೇಳಿಕೊಂಡಿದೆ.
