ಹೋರಾಟ ಶಾಂತ: ಕಾಮಗಾರಿ ಚುರುಕು

ಹೊರ ರಾಜ್ಯಗಳ ಕುಶಲಕರ್ಮಿ ಕಾರ್ಮಿಕರನ್ನು ಆದಷ್ಟು ಶೀಘ್ರದಲ್ಲಿ ಸ್ಥಾವರದ ಕಾಮಗಾರಿ ನಿರ್ವಹಿಸಲು ಕರೆಸುವಂತೆ ಸೂಚಿಸಿದೆ.
ಜುಲೈ 5ರ ದುರ್ಘಟನೆ ನಂತರ ಸ್ಥಾವರ ತೊರೆದಿದ್ದ ಕೆಲ ವಿದೇಶಿ ತಂತ್ರಜ್ಞರು ಮರಳಿ ತಮ್ಮ ಕೆಲಸಗಳಲ್ಲಿ ತಲ್ಲೀನರಾಗಿದ್ದಾರೆ. ಈಗಾಗಲೇ 1500ಕ್ಕೂ ಹೆಚ್ಚು ವಿವಿಧ ರಾಜ್ಯಗಳ ಕಾರ್ಮಿಕರು ಎನ್‌ಟಿಪಿಸಿಯ ಸ್ಥಾವರದ ಆವರಣಕ್ಕೆ ಮರಳಿದ್ದು ಚಿಕ್ಕ–ಪುಟ್ಟ ಕೆಲಸಗಳನ್ನು ನಿರ್ವಹಿಸುತ್ತಿದ್ದಾರೆ.

ಸ್ಥಾವರ ನಿರ್ಮಾಣಕ್ಕೆ ಅಗತ್ಯವಿರುವ ಬೃಹತ್ ಪ್ರಮಾಣದ ಯಂತ್ರೋಪಕರಣಗಳನ್ನು ಹೊತ್ತ ಬೃಹತ್ ಲಾರಿಗಳು ಹೆದ್ದಾರಿ ಮೂಲಕ ಕೂಡಗಿ ಘಟಕಕ್ಕೆ ಬರುತ್ತಿವೆ. ಒಂದೆಡೆ ಯಂತ್ರೋ­ಪಕರಣಗಳನ್ನು ಸುರಕ್ಷಿತವಾಗಿ ಇಳಿಸುವ ಕೆಲಸ ಕಾರ್ಯ ನಡೆಯುತ್ತಿದ್ದರೆ, ಇನ್ನೊಂದೆಡೆ ಪ್ರಮುಖ ಕಾಮಗಾರಿಗಳನ್ನು ನಡೆಸಲು ಅಗತ್ಯವಿರುವ ಕುಶಲ ಕಾರ್ಮಿಕರನ್ನು ಬಿಹಾರ, ಪಶ್ಚಿಮ ಬಂಗಾಳ, ಓಡಿಶಾ, ಜಾರ್ಖಂಡ್‌ ರಾಜ್ಯಗಳಿಂದ ಕರೆತರುವ ತೀವ್ರ ಯತ್ನ ಬಿರುಸುಗೊಂಡಿದೆ.
 

ಘಟಕದ ಎದುರೇ ನಡೆದ ದುರ್ಘಟನೆಯಿಂದ ಭಯಭೀತರಾಗಿದ್ದ ಐದು ಸಾವಿರಕ್ಕೂ ಅಧಿಕ ಕಾರ್ಮಿಕರು ಸೇರಿದಂತೆ 50ಕ್ಕೂ ಹೆಚ್ಚು ವಿದೇಶಿ ತಂತ್ರಜ್ಞರು ಅಂದೇ ಸ್ಥಾವರದ ಆವರಣದಿಂದ ಕಾಲ್ಕಿತ್ತಿದ್ದರು. ಪ್ರತಿಭಟನಾಕಾರರ ಆಕ್ರೋಶವನ್ನು ಕಣ್ಣಾರೆ ಕಂಡಿದ್ದ ಕಾರ್ಮಿಕರು ಮತ್ತೆ ಇತ್ತ ಸುಳಿಯಲ್ಲ ಎಂದು ಆ ಸಂದರ್ಭ ಊರುಗಳಿಗೆ ಮರಳಿದ ಕಾರ್ಮಿಕರು ಪ್ರತಿಕ್ರಿಯಿಸಿದ್ದರು.

ಕೆಲವರು ಸಂಬಳಕ್ಕಾಗಿ ಕಾದು ಕುಳಿತರೆ, ಬಹುತೇಕರು ಜೀವ ಉಳಿದರೆ ಸಾಕು ಎಂದು ಸ್ಥಾವರದ ಸ್ಥಳದಿಂದ ಓಡಿ ರೈಲು, ಬಸ್‌ಗಳ ಮೂಲಕ ತಮ್ಮೂರುಗಳಿಗೆ ಮರಳಿದ್ದರು. ಎನ್‌ಟಿಪಿಸಿಯಿಂದ ಪ್ರಮುಖ ಕಾಮಗಾರಿಗಳ ಗುತ್ತಿಗೆ ಪಡೆದಿರುವ ಖಾಸಗಿ ಕಂಪೆನಿಗಳ ಪ್ರತಿನಿಧಿಗಳು ಈ ಕುಶಲಕರ್ಮಿಗಳನ್ನು ಮತ್ತೆ ಸ್ಥಾವರದ ಕಾಮಗಾರಿಗೆ ಕರೆತರಲು ಮನವೊಲಿಸುವಲ್ಲಿ ನಿರತರಾಗಿದ್ದಾರೆ.

ಕೆಲವರು ಈಗಾಗಲೇ ಬದುಕಿನ ಅನಿವಾರ್ಯತೆಗೆ ದೂರದ ರಾಜ್ಯಗಳಿಂದ ಎನ್‌ಟಿಪಿಸಿಯ ಕೂಡಗಿ ಸ್ಥಾವರದ ಆವರಣಕ್ಕೆ ಬಂದು ಕಾಮಗಾರಿಯಲ್ಲಿ ನಿರತರಾಗಿದ್ದಾರೆ. ಇನ್ನೂ 4ರಿಂದ 5 ಸಾವಿರ ಹೊರ ರಾಜ್ಯದ ಕುಶಲಕರ್ಮಿ ಕಾರ್ಮಿಕರು ಬರುವ ನಿರೀಕ್ಷೆ ಇದೆ ಎಂದು ಎನ್‌ಟಿಪಿಸಿಯ ಹೆಸರು ಬಹಿರಂಗ ಪಡಿಸಲು ಇಚ್ಚಿಸದ ಹಿರಿಯ ಅಧಿಕಾರಿಗಳು ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದರು.