ಹ್ಯಾಂಡಲ್ ಇಲ್ಲದ ಬೈಕ್‌ನಲ್ಲಿ ಬೆಂಗಳೂರಿಗೆ
ಬಾಗಲಕೋಟೆ: ವಿಶಿಷ್ಟ ರೀತಿಯಲ್ಲಿ ದ್ವಿಚಕ್ರ ವಾಹನ ಓಡಿಸುವ ಸಾಹಸದ ಮೂಲಕ ‘ಲಿಮ್ಕಾ’ ದಾಖಲೆ ಮಾಡಿರುವ ಜಿಲ್ಲೆಯ ಇಳಕಲ್ಲಿನ ಈರಣ್ಣ ಕುಂದರಗಿಮಠ, ಇದೀಗ ಹ್ಯಾಂಡಲ್ ಇಲ್ಲದ ಬೈಕನ್ನೇರಿ ಬೆಂಗಳೂರಿನತ್ತ ಪಯಣ ಆರಂಭಿಸಿದ್ದಾರೆ.
ಬಾಗಲಕೋಟೆ ಜಿಲ್ಲಾಡಳಿತ ಭವನದಿಂದ ಬೆಂಗಳೂರು ವಿಧಾನಸೌಧದ ವರೆಗಿನ 510 ಕಿ.ಮೀ. ದೂರ ಕ್ರಮಿಸುವ ಈರಣ್ಣ ಅವರ ಹೊಸ ಸಾಹಸಕ್ಕೆ ಬುಧವಾರ ಬೆಳಿಗ್ಗೆ 9ಕ್ಕೆ ಜಿಲ್ಲಾ ಉಸ್ತುವಾರಿ ಸಚಿವ ಎಸ್. ಆರ್.ಪಾಟೀಲ ಚಾಲನೆ ನೀಡಿದರು.
ಬಾಗಲಕೋಟೆ, ಇಳಕಲ್‌, ಹೊಸಪೇಟೆ, ಚಿತ್ರದುರ್ಗ, ತುಮಕೂರು ಮಾರ್ಗವಾಗಿ ಬೆಂಗಳೂರು ತಲುಪಲಿದ್ದಾರೆ. ಇಡೀ ದೇಹ ಅದರಲ್ಲೂ ಮುಖ್ಯವಾಗಿ ಸೊಂಟದ ಮೂಲಕ ಬೈಕಿನ ನಿಯಂತ್ರಣ ಕಾಯ್ದುಕೊಂಡು ಬೈಕ್‌ ಓಡಿಸುತ್ತಿದ್ದಾರೆ. ಬೈಕ್‌ ಮೇಲೆಯೇ ಕುಳಿತು ನೀರು, ಕಾಫಿ, ತಿಂಡಿ, ಊಟ, ನೃತ್ಯ ಮಾಡಲಿರುವುದು ವಿಶೇಷವಾಗಿದೆ. ನಿಗದಿತ ದೂರವನ್ನು ಅಂದಾಜು 15 ಗಂಟೆಯೊಳಗೆ ತಲುಪುವುದಾಗಿ ಅವರು ತಿಳಿಸಿದ್ದಾರೆ.
ಲಿಮ್ಕಾ ದಾಖಲೆಗಾಗಿ ಹ್ಯಾಂಡಲ್ ಇಲ್ಲದ ಬೈಕಿನ ಬಂಪರ್ ಹಾಗೂ ಪೆಟ್ರೋಲ್ ಟ್ಯಾಂಕ್ ಹತ್ತಿರದ ಕಬ್ಬಿಣದ ಒಂದು ಪಟ್ಟಿಗೆ ಎಕ್ಸಲರೇಟರ್ ಅಳವಡಿಸಿ ಕೊಂಡಿರುವುದಾಗಿ ಹಾಗೂ ಕ್ಲಚ್‌ ಇಲ್ಲದೇ ಗಿಯರ್‌ ಬದಲಾಯಿಸುತ್ತೇನೆ. ಸಂಚಾರ ದಟ್ಟಣೆ ಇ ರುವ ಪ್ರದೇಶದಲ್ಲಿ 30ರಿಂದ 40 ಕಿ.ಮೀ. ಹಾಗೂ ಸಂಚಾರ ದಟ್ಟಣೆ ಇಲ್ಲದ ಪ್ರದೇಶದಲ್ಲಿ 70 ರಿಂದ 80 ಕಿ.ಮೀ. ವೇಗದಲ್ಲಿ ಬೈಕ್‌ ಓಡಿಸುತ್ತೇನೆ’ ಎಂದು ಈರಣ್ಣ ತಿಳಿಸಿದರು.
ಎರಡು ಪ್ರತ್ಯೇಕ ಬೈಕುಗಳಲ್ಲಿ ನಾಲ್ಕು ಜನ ಸ್ನೇಹಿತರು ಇವರ ಜತೆ ಸಾಗುತ್ತಿದ್ದು, ಅಗತ್ಯ ಸಹಕಾರ ನೀಡುತ್ತಿದ್ದಾರೆ. ಹತ್ತು ವರ್ಷಗಳಿಂದ ವಿಭಿನ್ನವಾಗಿ ವಾಹನಗಳನ್ನು ಓಡಿಸುವ ಸಾಹಸದಲ್ಲಿ ತೊಡಗಿರುವ ಅವರು ಹೊಸದನ್ನು ದಾಖಲೆ ಮಾಡುವ ಉತ್ಸಾಹದಲ್ಲಿದ್ದಾರೆ.
2008ರಲ್ಲಿ ಬಾಗಲಕೋಟೆಯಿಂದ ಬೆಂಗಳೂರುವರೆಗೆ ಕೇವಲ 11 ಗಂಟೆಯಲ್ಲಿ ಎರಡೂ ಕೈಬಿಟ್ಟು ಬೈಕ್‌ ಓಡಿಸಿ ರಾಜ್ಯದ ಗಮನ ಸೆಳೆದಿದ್ದರು. 2009ರಲ್ಲಿ ಬೆಂಗಳೂರಿನಿಂದ ದೆಹಲಿ ವರೆಗೆ 2500 ಕಿ.ಮೀ. ದೂರವನ್ನು ಕೈಬಿಟ್ಟುಕೊಂಡು ಐದು ದಿನಗಳ ಕಾಲ ಬೈಕ್‌ ಓಡಿಸಿ ರಾಷ್ಟ್ರದ ಗಮನ ಸೆಳೆದಿದ್ದರು. 2014ರಲ್ಲಿ ಇವರು ಎರಡೂ ಕೈ, ಕಾಲುಗಳನ್ನು ಕತ್ತರಿಯಾಕಾರವಾಗಿ ಹಗ್ಗದಿಂದ ಕಟ್ಟಿಸಿಕೊಂಡು ಕಾರನ್ನು ಬಾಗಲಕೋಟೆಯಿಂದ ವಿಜಯಪುರ, ಪುಣೆ, ಬೆಳಗಾವಿ, ತುಮಕೂರು ಮಾರ್ಗವಾಗಿ ಬೆಂಗಳೂರು ವರೆಗೆ ಒಟ್ಟು 1341 ಕಿ.ಮೀ. ಓಡಿಸಿ ‘ಲಿಮ್ಕಾ’ ದಾಖಲೆ ಮಾಡಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.