ನಿರ್ಮಾಣ: ಸೈಫ್ ಅಲಿ ಖಾನ್, ದಿನೇಶ್ ವಿಜಾನ್, ಸುನಿಲ್ ಲಲ್ಲ
ನಿರ್ದೇಶನ: ರಾಜ್ ನಿಡಿಮೋರು–ಕೃಷ್ಣ ಡಿ.ಕೆ.
ತಾರಾಗಣ: ಸೈಫ್ ಅಲಿ ಖಾನ್, ಇಲಿಯಾನಾ, ಗೋವಿಂದ, ರಣವೀರ್ ಶೋರೆ, ಕಲ್ಕಿ ಕೊಯ್ಲಿನ್ ಮುಂತಾದವರು.
ಜನಪ್ರಿಯ ಸಿನಿಮಾ ಮಾದರಿಗಳು, ಸೂತ್ರಗಳನ್ನು ಉಜ್ಜುತ್ತಾ ಕೂರುವವರಿಗೆ ಆಗೀಗ ವ್ಯಂಗ್ಯದ ಸೂಜಿಮೊನೆ ತಾಗಿಸುವಂಥ ಸಿನಿಮಾ ಮಾಡುವವರು ನಮ್ಮ ನಡುವೆ ಇದ್ದಾರೆ. ಕನ್ನಡದಲ್ಲಿ ಬಿಡಿಬಿಡಿಯಾಗಿ ಈ ಯತ್ನಗಳು ನಡೆಯುತ್ತಿವೆ.
ತಮಿಳಿನಲ್ಲಿ ಜನಪ್ರಿಯ ದೃಶ್ಯಗಳನ್ನೇ ಅಣಕು ಮಾಡುವಂಥ ‘ತಮಿಳ್ ಪಡಂ’ ಸಿನಿಮಾ ಬಂದು, ಗಮನ ಸೆಳೆದಿತ್ತು. ‘ಹ್ಯಾಪಿ ಎಂಡಿಂಗ್’ ಅಂಥ ಆತ್ಮದ ಸಿನಿಮಾ. ಮೇಲು ಮಟ್ಟಕ್ಕೆ ಪ್ರತಿಕ್ರಿಯಾತ್ಮಕ ಎನಿಸಿದರೂ ಆಳದಲ್ಲಿ ಸೂಕ್ಷ್ಮ ಸಂವೇದನೆಯನ್ನು ಇಟ್ಟುಕೊಂಡೇ ವ್ಯಂಗ್ಯದ ರಸಾನುಭವ ಕಟ್ಟಿಕೊಡುವ ಸಿನಿಮಾ ಇದು.
ಒಂದೇ ಪುಸ್ತಕ ಬರೆದು, ಜನಪ್ರಿಯತೆಯ ಉತ್ತುಂಗಕ್ಕೆ ಏರಿದ ನಾಯಕ. ಸಾಲುಸಾಲು ಹುಡುಗಿಯರ ಸಹವಾಸ ಬೇಕಿದ್ದರೂ ‘ಐ ಲವ್ ಯೂ’ ಎಂಬ ನುಡಿಮುತ್ತು ಅವನಿಗೆ ಅಪಥ್ಯ. ತ್ರಿವಳಿಗಳ ತಾಯಿಯಾದ ಅವನ ಮಾಜಿ ಪ್ರೇಯಸಿ ಈಗಲೂ ಅವನೊಟ್ಟಿಗೆ ಸ್ನೇಹ ಇಟ್ಟುಕೊಂಡಿದ್ದಾಳೆ. ಬಿಟ್ಟೇನೆಂದರೂ ಬಿಡಲೊಲ್ಲದ ಇನ್ನೊಬ್ಬ ಪ್ರೇಯಸಿ ಬೆನ್ನಿಗೆ ಬಿದ್ದಿದ್ದಾಳೆ. ಇಂಥ ಸಂದರ್ಭದಲ್ಲಿ ಅವನಿಗೆ ಹೊಸ ಬರಹಗಾರ್ತಿಯನ್ನು ಪರಿಚಯ ಮಾಡಿಕೊಳ್ಳುವ ಅನಿವಾರ್ಯ ಸೃಷ್ಟಿಯಾಗುತ್ತದೆ. ಆ ಬರಹಗಾರ್ತಿ ಇವನ ಜನಪ್ರಿಯತೆಯ ಬೂಟಿನೊಳಗೆ ಆಗಿನ್ನೂ ಕಾಲಿಟ್ಟವಳು. ಇಷ್ಟೆಲ್ಲಾ ಪೀಕಲಾಟಗಳ ನಡುವೆ ಹಣದ ಮುಗ್ಗಟ್ಟಿನಿಂದಾಗಿ ಜನಪ್ರಿಯ ಸಿನಿಮಾ ಒಂದಕ್ಕೆ ‘ವಿಭಿನ್ನವಾದ’ ಸ್ಕ್ರಿಪ್ಟ್ ಮಾಡಿಕೊಡುವ ಸವಾಲಿಗೆ ನಾಯಕ ಎದೆಗೊಡುತ್ತಾನೆ.
ಇಷ್ಟೆಲ್ಲಾ ಬಗೆಬಗೆಯ ಹೂರಣಕ್ಕೆ ಒಂದು ಸೂತ್ರ ಕಟ್ಟಿ, ಅದಕ್ಕೆ ಸುಖಾಂತ್ಯ ಕೊಡುವ ನಿರ್ದೇಶಕ ದ್ವಯರು, ನಡುನಡುವೆ ವ್ಯಂಗ್ಯದ ಗಮನಾರ್ಹ ಆಟವಾಡಿದ್ದಾರೆ. ಜನಪ್ರಿಯ ಸಾಹಿತ್ಯ, ಜನಪ್ರಿಯ ಸಿನಿಮಾ ಎರಡರಲ್ಲೂ ನಡೆಯುವ ಢೋಂಗಿತನವನ್ನು ಅವರು ಮೇಲುಮೇಲೆ ತಡವಿದ್ದಾರೆ. ಆದರೆ, ಇಡೀ ಸಿನಿಮಾ ನಿರೂಪಣೆಯಲ್ಲಿನ ನಾಟಕೀಯ ಅಣಕು ಪರಿಣಾಮಕಾರಿಯಾಗಿದೆ.
ಹಾಸ್ಯ, ಹಾಡುಗಳು, ಸಂಭಾಷಣೆ, ಆಂಗಿಕ ಅಭಿನಯ ಎಲ್ಲವನ್ನೂ ವ್ಯಂಗ್ಯದ ಉದ್ದೇಶ ದಾಟಿಸಲು ಸಮರ್ಪಕವಾಗಿ ಬಳಸಿಕೊಂಡಿದ್ದಾರೆ. ಒಂದು ಕಡೆ ಜನಪ್ರಿಯ ಮಾಧ್ಯಮಗಳನ್ನು ಗೇಲಿ ಮಾಡುವ ಸಿನಿಮಾ, ಇನ್ನೊಂದು ಕಡೆ ಬದುಕಿನ ಬದಲಾದ ಆದ್ಯತೆಗಳು, ಸ್ವಾರ್ಥದ ಸಿಕ್ಕುಗಳನ್ನೂ ತಡವುತ್ತದೆ.
ಸೈಫ್ ಅಲಿ ಖಾನ್ ನಿರ್ವಹಿಸಿರುವ ಪಾತ್ರ ಅಪರೂಪದ್ದೆನ್ನಲು ಕಾರಣಗಳಿವೆ. ಕೆಲವೇ ದೃಶ್ಯಗಳಲ್ಲಿ ಕಾಣಿಸಿಕೊಳ್ಳುವ ಗೋವಿಂದ ನಿರ್ವಹಿಸಿರುವ ಪಾತ್ರ ಸಿನಿಮಾದ ಅಂತರಾತ್ಮದ ದೃಷ್ಟಿಯಿಂದ ತುಂಬಾ ಮುಖ್ಯವಾದುದು. ನಾಯಕಿ ಇಲಿಯಾನಾ ತಾವು ಕಲಿಯುತ್ತಿದ್ದೇನೆ ಎಂಬ ಜಾಡನ್ನು ಉಳಿಸಿದ್ದಾರೆ. ಸ್ಟಾರ್ ನಟರ ‘ಸೂತ್ರಬದ್ಧ’ ಧೋರಣೆಗೆ ಪ್ರತಿಕ್ರಿಯಾತ್ಮಕ ಆಗಿರುವುದರಿಂದ ಈ ಸಿನಿಮಾ ಇಂದಿನ ಕಾಲಘಟ್ಟದಲ್ಲಂತೂ ಮುಖ್ಯ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.