ಹುಬ್ಬಳ್ಳಿ: ಥೇಮ್ಸ್ ನದಿ ದಂಡೆಯಿಂದ (ಲಂಡನ್) ಉದ್ಯಾನ ನಗರಿಗೆ (ಬೆಂಗಳೂರು) ಬೈಕ್ನಲ್ಲಿ ಜಾಲಿ ರೈಡ್!
ಹನ್ನೆರಡು ದೇಶ, ಏಳು ಕಾಲವಲಯ (ಟೈಮ್ ಝೋನ್) ದಾಟಿ ಅಂದಾಜು 12 ಸಾವಿರ ಕಿಲೋಮೀಟರ್ ಕ್ರಮಿಸುವ ಸಾಹಸಮಯ ಸವಾರಿ!
ಈ ಕನಸು ನನಸು ಮಾಡಲು ಬೆಂಗಳೂರು ಮೂಲದ ಅನಿವಾಸಿ ಭಾರತೀಯ ಸುಶಾಂತ್ ಶೆಟ್ಟಿ. ವಿಶೇಷವಾಗಿ ವಿನ್ಯಾಸಗೊಳಿಸಿದ ಸುಜುಕಿ ಬೈಕ್– ‘ಪ್ಯಾಟ್ರಿಕ್ ಸ್ಟಾರ್’ನಲ್ಲಿ ಶನಿವಾರ ಬೆಳಿಗ್ಗೆ 7 ಗಂಟೆಗೆ (ಭಾರತೀಯ ಸಮಯ ಬೆಳಿಗ್ಗೆ 11.30ಕ್ಕೆ) ಲಂಡನ್ನಿಂದ ಹೊರಟಿದ್ದಾರೆ.
ಅವರು ಫ್ರಾನ್ಸ್, ಬೆಲ್ಜಿಯಂ, ಜರ್ಮನಿ, ಆಸ್ಟ್ರೀಯಾ, ಸ್ಲೊವೇನಿಯಾ, ಹಂಗೇರಿ, ಸರ್ಬಿಯಾ, ಬಲ್ಗೇರಿಯಾ, ಟರ್ಕಿ ಮತ್ತು ಇರಾನ್ ಮೂಲಕ ಬೆಂಗಳೂರಿಗೆ ಬರಲಿದ್ದಾರೆ. ಇರಾನ್ನಿಂದ ಮುಂದೆ ವಿಸಾ ಸಿಕ್ಕರೆ ಪಾಕಿಸ್ತಾನ ಮೂಲಕ, ಸಿಗದೇ ಇದ್ದರೆ ಹಡಗಿನಲ್ಲಿ ದುಬೈಗೆ ಬಂದು ಅಲ್ಲಿಂದ ಸಮುದ್ರ ಮಾರ್ಗವಾಗಿ ಮುಂಬೈಗೆ ಬಂದು, ಪುನಃ ರಸ್ತೆ ಮಾರ್ಗದಿಂದ ಬೆಂಗಳೂರು ತಲುಪುವ ಗುರಿ ಅವರದು.
ಬೆಂಗಳೂರಿನ ಎಂ.ಎಸ್.ರಾಮಯ್ಯ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಮುಗಿಸಿರುವ ಸುಶಾಂತ್, ಇಂಗ್ಲೆಂಡ್ನಲ್ಲಿ ಮೋಟಾರ್ಸ್ಪೋರ್ಟ್ ಎಂಜಿನಿಯ-ರಿಂಗ್ನಲ್ಲಿ ಸ್ನಾತಕೋತ್ತರ ಮುಗಿಸಿದ್ದಾರೆ. ಯುರೋಪ್ನ ಫೋರ್ಡ್ ಕಂಪೆನಿಗೆ ಎಂಜಿನ್ಗಳನ್ನು ವಿನ್ಯಾಸಗೊಳಿಸುವ ಪವರ್ ಟ್ರೇನ್ ಕನ್ಸಲ್ಟನ್ಸಿ ಎಂಬ ಆಸ್ಟ್ರೀಯನ್ ಕಂಪೆನಿಯಲ್ಲಿ ಸದ್ಯ ಕೆಲಸ ಮಾಡುತ್ತಿದ್ದು, ಅಲ್ಲೇ ನೆಲೆಸಿದ್ದಾರೆ.
‘ಭಾರತದಲ್ಲಿದ್ದಾಗ ಕೆಲವು ವರ್ಷ ಬೈಕ್, ಕಾರ್ ರೇಸಿಂಗ್ನಲ್ಲಿ ಭಾಗವಹಿಸಿದ್ದೆ. 2006ರಲ್ಲಿ ಹಿಮಾಲಯದಲ್ಲಿ ರೇಸಿಂಗ್ನಲ್ಲಿ ಭಾಗವಹಿಸಿದ್ದ ಸಂದರ್ಭದಲ್ಲಿ ಇಂಗ್ಲೆಂಡ್ನಿಂದ ಬೆಂಗಳೂರಿಗೆ ರೈಡ್ ಮಾಡಿದ್ದ ಕೆಲವರ ಪರಿಚಯವಾಗಿತ್ತು. ಸಾಹಸದ ಮೋಟರ್ ಸೈಕಲ್ ಸವಾರಿ ಬಗ್ಗೆ ಕೇಳಿದ್ದು ಆಗಲೇ. ಅಂದಿನಿಂದ ಇಂಗ್ಲೆಂಡ್ ಟು ಬೆಂಗಳೂರು ಜಾಲಿ ರೈಡ್ ಬಗ್ಗೆ ಮನಸ್ಸು ಕೊರೆಯುತ್ತಿತ್ತು. ಅದೀಗ ನನಸಾಗುತ್ತಿದೆ’ ಎಂದು ಲಂಡನ್ನಿಂದ ಸುಶಾಂತ್ ತಮ್ಮ ಸಾಹಸ ಯಾ ನದ ಸಂಭ್ರಮವನ್ನು ‘ಪ್ರಜಾವಾಣಿ’ ಜತೆ ದೂರವಾಣಿ ಮೂಲಕ ಹಂಚಿಕೊಂಡರು.
‘ಬೈಕ್ನಲ್ಲಿ ಅತ್ಯಂತ ಕಡಿಮೆ ಅವಧಿಯಲ್ಲಿ ಬೆಂಗಳೂರು ತಲುಪುವುದು ನನ್ನ ಗುರಿ. ಪಾಕಿಸ್ತಾನ ಪ್ರವೇಶಕ್ಕೆ ವಿಸಾ ಸಿಕ್ಕಿದರೆ 15 ದಿನಗಳ ಒಳಗೆ ಭಾರತ ಗಡಿ ಪ್ರವೇಶಿಸುತ್ತೇನೆ’ ಎನ್ನುತ್ತಾರೆ 28ರ ಹರೆಯದ ಸುಶಾಂತ್.
‘ಟ್ರಕ್ ಡೈವರ್ ಆಗಬೇಕೆನ್ನುವುದು ಬಾಲ್ಯದ ಕನಸು. ಆರರ ಹರೆಯದಲ್ಲಿ ಕುಟುಂಬದ ಆಪ್ತರೊಬ್ಬರ ‘ಟಿವಿಎಸ್ 50’ ದ್ವಿಚಕ್ರವನ್ನು ಮೊದಲ ಬಾರಿ ಓಡಿಸಿದ್ದೆ. ಹೀಗೆ ಆರಂಭಗೊಂಡ ಕ್ರೇಜ್ ಈಗ ಬೈಕ್ ಸಾಹಸದ ಆಸಕ್ತಿಗೆ ಕಾರಣವಾಗಿದೆ’ ಎಂದರು.
‘ನನ್ನ ಈ ಯಾನದ ಪ್ರಾಯೋಜಕತ್ವ ವಹಿಸಿದ ಸುಜುಕಿ ಗ್ರೇಟ್ ಬ್ರಿಟನ್ (ಎಸ್ಜಿಬಿ) ಸಂಸ್ಥೆ, ಸುಜುಕಿ ಬೈಕ್ನ್ನು ನನಗೆ ಬೇಕಾದ ರೀತಿಯಲ್ಲಿ ಮರುವಿನ್ಯಾಸಗೊಳಿಸಲು ನೆರವು ನೀಡಿದೆ. ಇಂಧನ ಮತ್ತು ಸರಕು ಸಾಗಿಸಲು ವಿಶೇಷ ಬಾಕ್ಸ್, ಲೈಟ್, ಮಾರ್ಗ ತೋರಿಸುವ ‘ಟ್ರ್ಯಾಕರ್’ ಮತ್ತಿತರ ಕೆಲವು ವಿಶೇಷ ವ್ಯವಸ್ಥೆಗಳನ್ನು ನಾನೇ ಮಾಡಿಕೊಂಡಿದ್ದೇನೆ. ಬೈಕ್ಗೆ ‘ಪ್ಯಾಟ್ರಿಕ್ ಸ್ಟಾರ್’ ಎಂದು ಹೆಸರನ್ನೂ ಇಟ್ಟಿದ್ದೇನೆ’ ಎಂದು ಹೇಳಿದರು.
‘ದೈಹಿಕ ಮತ್ತು ಮಾನಸಿಕವಾಗಿ ಇದೊಂದು ಸವಾಲು. ಆದರೆ ನನ್ನ ‘ಪ್ಯಾಟ್ರಿಕ್’ ಈ ಸವಾಲು ಸ್ವೀಕರಿಸುವ ವಿಶ್ವಾಸವಿದೆ. ದೇಶಗಳ ಗಡಿ ದಾಟಿ ಬರುವುದು ಸಾಹಸದ ಕೆಲಸ. ಅದರಲ್ಲೂ ಟರ್ಕಿಯಿಂದ ಇರಾನ್ ದಾಟುವುದು ದೊಡ್ಡ ಸವಾಲು. ಅಲ್ಲಿಂದ ಎಲ್ಲವೂ ಬದಲಾಗುತ್ತದೆ. ಪಾಕಿಸ್ತಾನ ಪ್ರವೇಶಕ್ಕೆ ವಿಸಾ ಸಿಕ್ಕಿದರೆ ಬಲೂಚಿಸ್ತಾನದ ಮೂಲಕ ಸಾವಿರ ಕಿ.ಮೀ. ನಷ್ಟು ಪೊಲೀಸ್ ಭದ್ರತೆಯಲ್ಲಿ ಸಂಚರಿಸಬೇಕಾಗುತ್ತದೆ’ ಎಂದರು.
‘ಇಂತಹ ದೊಡ್ಡ ಸಾಹಸಕ್ಕೆ ಮೊದಲ ಬಾರಿ ಕೈ ಹಾಕಿದ್ದೇನೆ. ಎರಡು ವರ್ಷಗಳ ಹಿಂದೆ ಬೈಕ್ನಲ್ಲಿ ಪಶ್ಚಿಮ ಯುರೋಪ್ ಸುತ್ತಾಡಿದ್ದೇನೆ. ಕಳೆದ ವರ್ಷ ಟ್ರಾನ್ಸ್– ಸೈಬೀರಿಯನ್ ರೈಲು ಮಾರ್ಗದಲ್ಲಿ ರಷ್ಯಾ, ಮಂಗೋಲಿಯಾ, ಚೀನಾ ಸುತ್ತಾಡಿದ್ದೇನೆ. ಆ ಯಾನದ ಯಶಸ್ಸು ನನ್ನ ಈ ಬೈಕ್ ಸಾಹಸಕ್ಕೆ ಕಾರಣ’ ಎನ್ನುತ್ತಾರೆ ಸುಶಾಂತ್ ಶೆಟ್ಟಿ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.