‘ಉರ್ದು ಸಾಕು, ಕನ್ನಡ ಬೇಕು’ (ಪ್ರ.ವಾ. ಜುಲೈ 17) ಎಂದು ಮುಸ್ಲಿಂ ಸಮುದಾಯದ ಶಾಸಕರು, ಪ್ರಾಥಮಿಕ ಶಿಕ್ಷಣ ಸಚಿವರಿಗೆ ಮನವಿ ಮಾಡಿರುವುದು ಪ್ರಸಕ್ತ ಸನ್ನಿವೇಶಕ್ಕೆ ಸರಿ ಯಾಗಿಯೇ ಇದೆ. ಆದರೆ ಉರ್ದು ಭಾಷೆಯನ್ನು ಉಳಿಸಲು 1 ರಿಂದ 5ನೇ ತರಗತಿಯವರೆಗೆ ಸರಳ ಭಾಷೆಯಲ್ಲಿ ಒಂದು ಉರ್ದು ಉಪ–ಪಠ್ಯ ಕಲಿಸುವುದು ಉತ್ತಮ.
ಒಂದು ಸಮುದಾಯದ ಮಕ್ಕಳನ್ನು ಪ್ರತ್ಯೇಕವಾಗಿ ಕಾಣುವಂತಹ ವಾತಾವರಣ ತಪ್ಪಿಸಲು ಶಾಸಕರು ತೆಗೆದುಕೊಂಡ ತೀರ್ಮಾನ ಮೆಚ್ಚಬೇಕಾದ್ದು. ಬಹಳಷ್ಟು ಕಡೆ 1 ರಿಂದ 7ನೇ ತರಗತಿಯವರೆಗೆ ಉರ್ದು ಕಲಿತ ಮಕ್ಕಳಿಗೆ 8 ರಿಂದ ಕಲಿಯಲು ಪ್ರೌಢಶಾಲೆಗಳೇ ಇಲ್ಲ. ಇದರಿಂದ ಭಾಷೆಯ ತೊಡಕಿನಿಂದ ವಿದ್ಯಾರ್ಥಿಯು ಹತಾಶನಾಗಿ ಶಿಕ್ಷಣವನ್ನು ಅರ್ಧಕ್ಕೆ ನಿಲ್ಲಿಸುವಂತಹ ಪರಿಸ್ಥಿತಿ ಸೃಷ್ಟಿಯಾಗುತ್ತಿದೆ.
–ದಸ್ತಗೀರ್‌ಸಾಬ್‌, ಹೊಸದುರ್ಗ
