ನವದೆಹಲಿ (ಐಎಎನ್ಎಸ್): ಇದೇ ಮೊದಲ ಬಾರಿಗೆ ಗಣರಾಜ್ಯೋತ್ಸವದಲ್ಲಿ ಪಾಲ್ಗೊಳ್ಳಲು ಭಾನುವಾರ ಇಲ್ಲಿಗೆ ಆಗಮಿಸಿದ ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮ ಅವರಿಗೆ ಅಭೂತಪೂರ್ವ ಸ್ವಾಗತ ದೊರೆಯಿತು.
ಕಡುಗಪ್ಪು ಕಾರು ‘ಬೀಸ್ಟ್’ನಲ್ಲಿ ರಾಷ್ಟ್ರಪತಿ ಭವನಕ್ಕೆ ಬಂದಿಳಿದ ಒಬಾಮ ಅವರಿಗೆ ರತ್ನಗಂಬಳಿಯ ಸ್ವಾಗತ ದೊರೆಯಿತು. ಅಲ್ಲಿ ಅದಾಗಲೇ ಅವರಿಗಾಗಿ ಕಾದಿದ್ದ ರಾಷ್ಟ್ರಪತಿ ಪ್ರಣವ್ ಮುಖರ್ಜಿ, ಪ್ರಧಾನಿ ನರೇಂದ್ರ ಮೋದಿ ಒಬಾಮ ಅವರನ್ನು ಆತ್ಮೀಯವಾಗಿ ಬರಮಾಡಿಕೊಂಡರು.
ನಿಗದಿಗಿಂತ 15 ನಿಮಿಷ ತಡವಾಗಿ ಆಗಮಿಸಿದ ಒಬಾಮ ಅವರಿಗೆ ವಿಂಗ್ ಕಮಾಂಡರ್ ಪೂಜಾ ಠಾಕೂರ್ ನೇತೃತ್ವದಲ್ಲಿ ಮೂರು ಪಡೆಗಳು ಗೌರವ ವಂದನೆ ಸಲ್ಲಿಸಿದವು.
ಮಹಿಳೆಯೊಬ್ಬರಿಗೆ ಮೂರು ಪಡೆಗಳ ನೇತೃತ್ವ ವಹಿಸುವ ಗೌರವ ದೊರೆತಿರುವುದು ಇದೇ ಮೊದಲ ಬಾರಿ. ನಂತರ 21 ಕುಶಾಲತೋಪುಗಳನ್ನು ಸಿಡಿಸಿ ಗೌರವ ಸಲ್ಲಿಸಲಾಯಿತು. ಸೇನಾ ವಾದ್ಯತಂಡ ಅಮೆರಿಕಹಾಗೂ ಭಾರತದ ರಾಷ್ಟ್ರಗೀತೆಯನ್ನು ಸುಶ್ರಾವ್ಯವಾಗಿ ನುಡಿಸಿತು.
ಪ್ರಣವ್ ಮುಖರ್ಜಿ ಹಾಗೂ ಕಡುಗಪ್ಪು ಬಂದ್ಗಲಾ ಕೋಟು ಧರಿಸಿದ್ದರೆ, ಪ್ರಧಾನಿ ಮೋದಿ ಕುರ್ತಾ ಪೈಜಾಮಾ ನೆಹರೂ ಜಾಕೆಟ್ ಧರಿಸಿ, ಮೇಲೆ ಕೆಂಪು ಶಾಲು ಹೊದ್ದಿದ್ದರು. ನಂತರ ಉಡುಪು ಬದಲಿಸಿದ ಮೋದಿ ಕೂಡ ಕಪ್ಪು ಬಂದ್ಗಲಾ ಕೋಟು ಧರಿಸಿದರು.
ಮೋದಿ ತಮ್ಮ ಸಂಪುಟದ ಸದಸ್ಯರನ್ನು ಒಬಾಮ ಅವರಿಗೆ ಪರಿಚಯಿಸಿದರು. ಅಚ್ಚ ಭಾರತೀಯ ಶೈಲಿಯಲ್ಲಿ ಒಬಾಮ ಎರಡೂ ಕೈಮುಗಿದು ‘ನಮಸ್ತೆ’ ಎಂದರು. ತಮಗೆ ದೊರೆತ ಅಭೂತಪೂರ್ವ ಆತಿಥ್ಯಕ್ಕೆ ಮನಸೋತ ಒಬಾಮ ಕೃತಜ್ಞತೆ ಅರ್ಪಿಸಿದರು.