ಬೆಂಗಳೂರು: ಸೂರ್ಯನ ಹೊರಮೈ ಮೇಲೆ ಕಾಣಿಸಿಕೊಳ್ಳುವ ಮಚ್ಚೆಗಳ (ಸೌರ ಕಲೆಗಳು) ಬಗ್ಗೆ ಕಳೆದ ಮೂರು ದಶಕಗಳಿಂದ ಆಳ ಅಧ್ಯಯನ ನಡೆಸಿರುವ ಭಾರತೀಯ ವಿಜ್ಞಾನ ಸಂಸ್ಥೆಯ (ಐಐಎಸ್‌ಸಿ) ಭೌತವಿಜ್ಞಾನ ಪ್ರಾಧ್ಯಾಪಕ ಪ್ರೊ.ಅರ್ನಬ್ ಚೌಧರಿ ಅವರು ಬರೆದ ‘ನೇಚರ್ಸ್ ಥರ್ಡ್ ಸೈಕಲ್’ ಪುಸ್ತಕವನ್ನು ಹಿರಿಯ ವಿಜ್ಞಾನಿ ಪ್ರೊ. ರೊದ್ದಂ ನರಸಿಂಹ ಅವರು ಬುಧವಾರ ಬಿಡುಗಡೆಗೊಳಿಸಿದರು.
ಬಳಿಕ ಮಾತನಾಡಿದ ನರಸಿಂಹ ಅವರು, ‘ಹನ್ನೊಂದು ವರ್ಷಕ್ಕೊಮ್ಮೆ ಕಾಣಿಸಿಕೊಳ್ಳುವ ಸೌರ ಕಲೆಗಳು ಸೌರ ಭೌತವಿಜ್ಞಾನ ಕ್ಷೇತ್ರದ ವಿಜ್ಞಾನಿಗಳನ್ನು ತುದಿಗಾಲಲ್ಲಿ ನಿಲ್ಲಿಸುತ್ತವೆ. ಅವುಗಳ ಕುರಿತು ಅರ್ನಬ್ ಅವರು ರಚಿಸಿರುವ ಪುಸ್ತಕ ಅದ್ಭುತವಾಗಿದೆ. 30 ವರ್ಷಗಳ ಅವರ ಶ್ರಮವನ್ನು ಈ ಪುಸ್ತಕದಲ್ಲಿ ಕಾಣಬಹುದು’ ಎಂದು ಹೇಳಿದರು.
‘ಗಣಿತ ಸೂತ್ರಗಳ ಗೋಜಲು ಇಲ್ಲದ ಈ ಪುಸ್ತಕವನ್ನು ಜನಸಾಮಾನ್ಯರು ಸರಳವಾಗಿ ಅರ್ಥೈಸಿಕೊಳ್ಳುವಂತೆ ಬರೆಯಲಾಗಿದೆ. ಪುಸ್ತಕದಲ್ಲಿ ಸೌರ ಕಲೆಗಳ ಬಗ್ಗೆ ಮಾತ್ರವಲ್ಲದೇ ವಿಜ್ಞಾನ ಪ್ರಪಂಚ ಹೇಗೆ ಮುಂದುವರಿಯುತ್ತದೆ, ವಿಜ್ಞಾನಿಗಳ ಕಷ್ಟಸುಖಗಳೇನು ಇತ್ಯಾದಿ ಅನೇಕ ಅಂಶಗಳಿವೆ’ ಎಂದರು.
ಪ್ರೊ.ಅರ್ನಬ್ ಚೌಧರಿ ಮಾತನಾಡಿ, ‘ಷಿಕಾಗೊ ವಿವಿಯಲ್ಲಿ ಪಿಎಚ್.ಡಿ ಮಾಡುತ್ತಿದ್ದ ದಿನಗಳಿಂದಲೂ ನನ್ನನ್ನು ಕುತೂಹಲಗೊಳಿಸುತ್ತ ಬಂದಿರುವ ಸೌರ ಕಲೆಗಳ ವಿದ್ಯಮಾನದ ಕೌತುಕವನ್ನು ಜನಸಾಮಾನ್ಯರಿಗೆ ತಿಳಿಸಬೇಕೆಂಬ ಆಶಯದಿಂದ ಪುಸ್ತಕ ರಚನೆಗೆ ಮುಂದಾದೆ’ ಎಂದು ಹೇಳಿದರು.
