‘ಪ್ರೇಮಕಥೆ’ ತಂಡದಿಂದ ಚಿತ್ರರಸಿಕರಿಗೆ ಸ್ಪರ್ಧೆ

ಈ ಸ್ಪರ್ಧೆಯ ಕುರಿತು ಹೆಚ್ಚಿನ ಮಾಹಿತಿಗಾಗಿ nnpkcinema.com ಜಾಲತಾಣವನ್ನು ಭೇಟಿ ಮಾಡಬಹುದು. ಚಿತ್ರದ ಹಾಡುಗಳ ಬಿಡುಗಡೆಯ ದಿನ ವಿಜೇತರ ಹೆಸರನ್ನು ಘೋಷಿಸಲಾಗುವುದು.

‘ನನ್ನ ನಿನ್ನ ಪ್ರೇಮ ಕಥೆ’ಗೆ ‘ಪ್ರೀತಿಗಾಗಿ ನೀನು... ಪ್ರೀತಿಯಾದೆ ನೀನು... ಪ್ರೀತಿ ತಾನೆ ನೀನು...’ ಎಂದು ಅಡಿಟಿಪ್ಪಣಿ ನೀಡಲಾಗಿದೆ. ಉತ್ತರ ಕರ್ನಾಟಕದಲ್ಲಿ ನಡೆಯುವ ಒಂದು ಪ್ರೇಮಕಥೆಯನ್ನು ನಿರ್ದೇಶಕ ಶಿವು ಜಮಖಂಡಿ ತೋರಿಸುವ ಪ್ರಯತ್ನ ಮಾಡಿದ್ದಾರಂತೆ. ಅವರಿಗೆ ಇದು ನಿರ್ದೇಶನದ ಮೊದಲ ಅನುಭವ. ಪತ್ರಿಕೋದ್ಯಮ ಪದವೀಧರರಾದ ಶಿವು ಅವರೇ ಗೀತ ಸಾಹಿತ್ಯ ಹಾಗೂ ಸಂಗೀತದ ಜವಾಬ್ದಾರಿ ಹೊತ್ತಿದ್ದಾರೆ.

ನಿರ್ದೇಶಕರು ಶಂಕರ್ ನಾಗ್ ಅಭಿಮಾನಿ. ಹಾಗಾಗಿ ನಾಯಕನ ತಂದೆಯ ಪಾತ್ರಕ್ಕೆ ಶಂಕರ್ ನಾಗ್ ಅವರನ್ನೇ ಬಳಸಿಕೊಂಡದ್ದಾರೆ. ಶಂಕರ್ ನಾಗ್ ಅವರಂತೂ ಬರಲು ಸಾಧ್ಯವಿಲ್ಲ. ಗ್ರಾಫಿಕ್ಸ್ ಕೂಡ ಬಳಸಿಕೊಳ್ಳುತ್ತಿಲ್ಲ. ಬದಲಾಗಿ ಶಂಕರ್ ನಾಗ್ ಅವರ ಸ್ಟಿಲ್‌ಗಳನ್ನು ಹಾಗೂ ಹಿನ್ನೆಲೆಯಲ್ಲಿ ಅವರ ಸಂಭಾಷಣೆಗಳನ್ನು ನಿರ್ದೇಶಕರು ಬಳಸಿಕೊಂಡಿದ್ದಾರೆ.

ವಿಜಯ್ ರಾಘವೇಂದ್ರ ಚಿತ್ರದ ನಾಯಕ. ಅವರಿಗೆ ಜೊತೆಯಾದವರು ನಿಧಿ ಸುಬ್ಬಯ್ಯ. ನಾಯಕಿಗೆ ಬಣ್ಣ ಹಚ್ಚುವಾಗ ಆಕೆಯ ಮೇಲೆ ನಾಯಕನಿಗೆ ಪ್ರೀತಿಯಾಗುತ್ತದೆ.

ಈ ಪ್ರೀತಿಯಲ್ಲಿ ಹುಳಿ ಹಿಂಡುವ ಪಾತ್ರದಲ್ಲಿ ತಿಲಕ್ ಕಾಣಿಸಿಕೊಂಡಿದ್ದಾರೆ. ಚಿಕ್ಕಣ್ಣ, ಸುಧಾ ಬೆಳವಾಡಿ, ಸಂಗೀತ, ಗುರುರಾಜ ಹೊಸಕೋಟೆ, ಜೋಕರ್ ಹನುಮಂತ್ ತಾರಾಗಣದಲ್ಲಿದ್ದಾರೆ. ಜಮಖಂಡಿ, ವಿಜಯಪುರ, ಬಾಗಲಕೋಟೆ, ಹುಬ್ಬಳ್ಳಿಗಳಲ್ಲಿ ಐವತ್ತೈದು ದಿನಗಳ ಚಿತ್ರೀಕರಣ ಮಾಡಲಾಗಿದೆ. ಚಿತ್ರದಲ್ಲಿ ಏಳು ಹಾಡುಗಳಿವೆ. ದಾಮೋದರ್ ಕಾನಸೂರು ಸಂಕಲನ, ಮೊಹಮದ್ ಹಸೀಬ್ ಛಾಯಾಗ್ರಹಣ ಚಿತ್ರಕ್ಕಿದೆ.