ಚೆನ್ನೈ (ಪಿಟಿಐ): ಮಂಗಳ ಗ್ರಹದ ಕಕ್ಷೆಯನ್ನು ಯಶಸ್ವಿಯಾಗಿ ಸೇರಿದ 20 ದಿನಗಳ ನಂತರ ಇಸ್ರೊದ ಮಂಗಳಯಾನ ನೌಕೆ (ಮಾಮ್) ಮಂಗಳವಾರ ಕೆಂಪು ಗ್ರಹದ ಎರಡು ಉಪಗ್ರಹಗಳ ಚಿತ್ರಗಳನ್ನು ಯಶಸ್ವಿಯಾಗಿ ರವಾನಿಸಿದೆ. ಆ ಮೂಲಕ ಭಾರತದ ಮಂಗಳಯಾನದಲ್ಲಿ ಮತ್ತೊಂದು ಮೈಲಿಗಲ್ಲು ಸ್ಥಾಪಿಸಿದೆ.
ಇಸ್ರೊ ಮಂಗಳವಾರ ಸಾಮಾಜಿಕ ಜಾಲತಾಣದಲ್ಲಿ ಅಂಗಾರಕನ ಉಪಗ್ರಹಗಳ ಚಿತ್ರಗಳು ಹಾಗೂ ಪುಟ್ಟ ವಿಡಿಯೊ ತುಣುಕುಗಳನ್ನು ಹಂಚಿಕೊಂಡಿದೆ. ‘ಮಂಗಳನ ಸುತ್ತಲಿನ ಕಕ್ಷೆಯಲ್ಲಿ ಪಶ್ಚಿಮದಿಂದ ಪೂರ್ವಕ್ಕೆ ಈ ಎರಡೂ ದೊಡ್ಡ ಉಪಗ್ರಹಗಳು ಪ್ರದಕ್ಷಿಣೆ ಹಾಕುತ್ತಿವೆ’ ಎಂದು ಇಸ್ರೊ ಮಾಹಿತಿ ನೀಡಿದೆ. ಮಂಗಳನ ಮೇಲ್ಮೈನಿಂದ 66,275 ಕಿ.ಮೀ ಎತ್ತರದಿಂದ ನೌಕೆ ಈ ಚಿತ್ರಗಳನ್ನು ಸೆರೆ ಹಿಡಿದಿದೆ.
27/22/18 ಕಿ.ಮೀ ವ್ಯಾಸವನ್ನು ಹೊಂದಿರುವ ಉಪಗ್ರಹಗಳು ದಿನಕ್ಕೆ ಮೂರು ಬಾರಿ ಮಂಗಳನ ಸುತ್ತ ಪ್ರದಕ್ಷಿಣೆ ಹಾಕುತ್ತವೆ. ಈ ಉಪಗ್ರಹಗಳು ಪ್ರತಿ ನೂರು ವರ್ಷಕ್ಕೆ 1.8 ಮೈಲುಗಳಷ್ಟು ಸಮೀಪಿಸುತ್ತಿವೆ. ಇನ್ನೂ 500 ವರ್ಷಗಳಲ್ಲಿ ಈ ಉಪಗ್ರಹಗಳು ಮಂಗಳನಿಗೆ ಡಿಕ್ಕಿ ಹೊಡೆಯಬಹುದು. ಇಲ್ಲವೇ ಚೂರುಗಳಾಗಿ ಅಂಗಾರಕನ ಉಂಗುರುಗಳಾಗುವ ಸಾಧ್ಯತೆ ಇದೆ ಎಂದು ನಾಸಾ ಹೇಳಿದೆ.