ಬೆಂಗಳೂರು: ಸುಟ್ಟ ಗಾಯಗಳಿಂದ ವಿಕ್ಟೋರಿಯಾ ಆಸ್ಪತ್ರೆಗೆ ಚಿಕಿತ್ಸೆಗಾಗಿ ಬರುವವರ ಹಾಗೂ ಆ ಪ್ರಕರಣಗಳಲ್ಲಿ ದಾಖಲಾಗುತ್ತಿರುವ ಸಾವಿನ ಪ್ರಮಾಣದಲ್ಲಿ ಮಹಿಳೆಯರ ಸಂಖ್ಯೆಯೇ ಅಧಿಕವಾಗಿದೆ. ಕಳೆದ 18 ತಿಂಗಳಲ್ಲಿ ದಾಖಲಾದ ಅಂಕಿ–ಅಂಶಗಳಿಂದ ಈ ಆಘಾತಕಾರಿ ಅಂಶ ಬಯಲಾಗಿದೆ. ಲಭ್ಯವಾಗಿರುವ ಮಾಹಿತಿಗಳ ಪ್ರಕಾರ ಒಂದೂವರೆ ವರ್ಷದ ಅವಧಿಯಲ್ಲಿ 1273 ಮಹಿಳೆಯರು ಈ ಆಸ್ಪತ್ರೆಯ ಸುಟ್ಟ ಗಾಯ ವಾರ್ಡ್ಗೆ ದಾಖಲಾಗಿದ್ದಾರೆ. ಇವರಲ್ಲಿ ಸಾವನ್ನಪ್ಪಿದವರ ಸಂಖ್ಯೆ 737.
ಆಕಸ್ಮಿಕ ಅಗ್ನಿ ದುರಂತದಿಂದ ಸಾವು, ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆ ಮಾಡಿಕೊಂಡವರು ಹಾಗೂ ಕೌಟುಂಬಿಕ ಹಿಂಸೆಗೆ ಬಲಿಯಾದವರ ಪ್ರಕರಣಗಳೂ ಇದರಲ್ಲಿ ಸೇರಿವೆ. ಮಹಿಳೆಯರ ಮೇಲೆ ಹೆಚ್ಚುತ್ತಿರುವ ದೌರ್ಜನ್ಯದ ಬೆನ್ನಲ್ಲೇ ಲಭ್ಯವಾಗಿರುವ ಈ ಅಂಕಿ–ಅಂಶಗಳು ಆತಂಕ ಹುಟ್ಟಿಸುವಂಥವು.
2013ರಲ್ಲಿ ಒಟ್ಟು 1789 ಜನ ಸುಟ್ಟ ಗಾಯಗಳಿಂದ ಆಸ್ಪತ್ರೆಗೆ ದಾಖಲಾಗಿದ್ದು, ಇವರಲ್ಲಿ 853 ಮಹಿಳೆಯರಿದ್ದಾರೆ. ಅವರಲ್ಲಿ ಚಿಕಿತ್ಸೆಗೆ ಸ್ಪಂದಿಸದೆ 474 ಮಹಿಳೆಯರು ಮೃತಪಟ್ಟಿದ್ದಾರೆ. ಆಕಸ್ಮಿಕ ಅಗ್ನಿ ದುರಂತದಿಂದ 340, ಆತ್ಮಹತ್ಯೆಯಿಂದ 128, ಕೌಟುಂಬಿಕ ಹಿಂಸೆಯಿಂದ 6 ಮಹಿಳೆಯರು ಮೃತಪಟ್ಟ ಪ್ರಕರಣಗಳಿವೆ.
‘ಪ್ರತಿ ದಿನ 5ರಿಂದ 10 ಪ್ರಕರಣಗಳು ದಾಖಲಾಗುತ್ತವೆ. ಇವರಲ್ಲಿ ಮಹಿಳೆಯರ ಸಂಖ್ಯೆಯೇ ಅಧಿಕ. ಹೆಚ್ಚಿನವರು ಹಲವು ಕಾರಣಗಳಿಂದ ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುತ್ತಾರೆ. ಆದರೆ, ಸ್ಟೌ ಸಿಡಿದು ಅನಾಹುತವಾಗಿದೆ ಎಂದು ದೂರು ನೀಡುತ್ತಾರೆ’ ಎಂದು ವಿಕ್ಟೋರಿಯಾ ಆಸ್ಪತ್ರೆ ಸುಟ್ಟ ಗಾಯಗಳ ವಿಭಾಗದ ಮುಖ್ಯಸ್ಥ ಕೆ.ಟಿ.ರಮೇಶ್ ಅವರು ಪತ್ರಿಕೆಗೆ ಮಾಹಿತಿ ನೀಡಿದ್ದಾರೆ. ‘ಸುಟ್ಟ ಗಾಯದ ಚಿಕಿತ್ಸೆಗಾಗಿ ದೂರದ ಊರುಗಳಿಂದ ಇಲ್ಲಿಗೆ ಬರುತ್ತಾರೆ. ಗಾಯದ ಸ್ವರೂಪ ಗಂಭೀರವಾಗಿದ್ದಾಗ ಬೇರೆ ಆಸ್ಪತ್ರೆ ವೈದ್ಯರು ವಿಕ್ಟೋರಿಯಾ ಆಸ್ಪತ್ರೆಗೆ ದಾಖಲಾಗುವಂತೆ ಸೂಚಿಸುತ್ತಾರೆ’ ಎಂದು ಅವರು ತಿಳಿಸಿದರು.
18ರಿಂದ 23 ವಯಸ್ಸಿನವರೇ ಹೆಚ್ಚು:
‘ಸುಟ್ಟ ಗಾಯಗಳಿಂದ ಸಾವನ್ನಪ್ಪುತ್ತಿರುವವರಲ್ಲಿ 18ರಿಂದ 23 ವರ್ಷ ವಯಸ್ಸಿನ ಮಹಿಳೆಯರ ಸಂಖ್ಯೆಯೇ ಅಧಿಕ. ಸ್ಟೌ ಸಿಡಿದು ಘಟನೆ ನಡೆದಿದೆ ಎನ್ನುತ್ತಾರೆ. ಆದರೆ ಇಲ್ಲಿ ಗಂಡ, ಅತ್ತೆಯೇ ಸ್ಟೌಗಳು. ಬಟ್ಟೆಗೆ ಬೆಂಕಿ ಬಿದ್ದು ಹೀಗಾಯಿತು ಎಂದು ಸುಳ್ಳು ಹೇಳುತ್ತಾರೆ. ಗಾಯಗಳಿಂದ ಸತ್ತ ಮಹಿಳೆಯರ ಅಂಕಿ ಅಂಶ ಸರಿಯಾಗಿದೆ ಎಂದು ಹೇಳುವಂತಿಲ್ಲ. ಏಕೆಂದರೆ ಚಿಕಿತ್ಸೆಗಾಗಿ ದಾಖಲಾದವರು ಪೂರ್ಣ ಗುಣವಾಗುವ ಮುನ್ನವೇ ಒತ್ತಾಯ-ಪೂರ್ವಕವಾಗಿ ಆಸ್ಪತ್ರೆಯಿಂದ ಮನೆಗೆ ಹೋಗುತ್ತಾರೆ. ಸೋಂಕಿನಿಂದಾಗಿ ಮನೆಯಲ್ಲೇ ಸಾವನ್ನಪ್ಪಿದ ಘಟನೆಗಳಿವೆ’ ಎಂದು ವಿಮೋಚನಾ ಮಹಿಳಾ ಸಂಘಟನೆ ಹೋರಾಟಗಾರ್ತಿ ಡೋನಾ ಫರ್ನಾಂಡಿಸ್ ಅವರು ಹೇಳಿದರು.
‘ಇತ್ತೀಚಿನ ದಿನಗಳಲ್ಲಿ ದೌರ್ಜನ್ಯದ ಸಂಖ್ಯೆ ಹೆಚ್ಚಾಗುತ್ತಿದೆ. ಸುಟ್ಟ ಗಾಯಗಳಿಂದ ಮಾತ್ರವಲ್ಲ; ಹಿಂಸೆಯನ್ನು ಸಹಿಸಿಕೊಳ್ಳಲಾಗದೆ ವಿಷ ಕುಡಿದು ಸಾವನ್ನಪ್ಪುತ್ತಿರುವ ಮಹಿಳೆಯರ ಸಂಖ್ಯೆಯೂ ಅಧಿಕವಾಗಿದೆ. ಆದರೆ, ಎಫ್ಐಆರ್ ದಾಖಲಾಗುತ್ತಿರುವ ಸಂಖ್ಯೆ ತೀರಾ ಕಡಿಮೆ. ಹೆಣ್ಣು ಮಕ್ಕಳ ಜೀವಕ್ಕೆ ಬೆಲೆ ಇಲ್ಲವೇ? ಸರ್ಕಾರ ಏಕೆ ಈ ಬಗ್ಗೆ ತಲೆಕೆಡಿಸಿಕೊಳ್ಳುತ್ತಿಲ್ಲ?’ ಎಂದು ಪ್ರಶ್ನಿಸಿದರು. ಈ ವರ್ಷದ ಜೂನ್ವರೆಗೆ ಲಭ್ಯವಾಗಿರುವ ಅಂಕಿ–ಅಂಶಗಳ ಪ್ರಕಾರ ಚಿಕಿತ್ಸೆಗಾಗಿ ದಾಖಲಾದ ಮಹಿಳೆಯರ ಸಂಖ್ಯೆ 420. ಅವರಲ್ಲಿ 263 ಮಂದಿ ಮೃತಪಟ್ಟಿದ್ದಾರೆ.
‘ವರದಕ್ಷಿಣೆ ಪ್ರಕರಣ, ಅನುಮಾನ, ಪರಸ್ತ್ರೀ ವ್ಯಾಮೋಹದಿಂದ ಮನೆಗಳಲ್ಲಿ ದೌರ್ಜನ್ಯ ಪ್ರಕರಣಗಳು ಹೆಚ್ಚುತ್ತಿವೆ. ಸ್ಟೌ ಸಿಡಿದು ಗಾಯವಾಗಿದೆ ಎಂದು ಕುಟುಂಬದವರ ಒತ್ತಡದಿಂದ ಕೆಲ ಪ್ರಕರಣಗಳು ದಾಖಲಾಗುತ್ತಿವೆ. ಈ ಬಗ್ಗೆ ತನಿಖೆ ನಡೆಸಬೇಕು. ಈಗ ಸೀಮೆಎಣ್ಣೆ ಸ್ಟೌ ಬಳಸುವವರ ಸಂಖ್ಯೆಯೂ ಕಡಿಮೆ. ಗ್ಯಾಸ್ ಸಿಲಿಂಡರ್ ಸಿಡಿದರೆ ಅದರ ಭೀಕರತೆ ಎಲ್ಲರಿಗೂ ಗೊತ್ತಾಗುತ್ತದೆ’ ಎಂದು ಹೋರಾಟಗಾರ್ತಿ ಮಮತಾ ನುಡಿದರು. ‘ಈ ಅಂಕಿ–ಅಂಶಗಳು ವಿಕ್ಟೋರಿಯಾ ಆಸ್ಪತ್ರೆಗೆ ಸಂಬಂಧಿಸಿದವು ಮಾತ್ರ. ರಾಜ್ಯದ ಇನ್ನುಳಿದ ಆಸ್ಪತ್ರೆಗಳಲ್ಲಿ ದಾಖಲಾಗಿ ಮೃತಪಟ್ಟವರು ಹಾಗೂ ಮನೆಯಲ್ಲಿಯೇ ಸಾವನ್ನಪ್ಪಿದವರೂ ಇದ್ದಾರೆ’ ಎಂದು ಅವರು ಹೇಳಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.