ಮುಂಬೈ (ಪಿಟಿಐ): ಸ್ಪೆಕ್ಟ್ಯಾಕಲ್ ಇನ್ಫೊಟೆಕ್ (ಎಸ್ಐಎಲ್) ಕಂಪೆನಿಯ ಷೇರುಗಳನ್ನು ಅಕ್ರಮವಾಗಿ ವಹಿವಾಟು ನಡೆಸಿದ ಆರೋಪದಡಿ 19 ಕಂಪೆನಿಗಳಿಗೆ ಭಾರತೀಯ ಷೇರುಪೇಟೆ ನಿಯಂತ್ರಣ ಮಂಡಳಿ (ಸೆಬಿ) ಒಟ್ಟಾರೆ ರೂ. 1ಕೋಟಿ ದಂಡ ವಿಧಿಸಿದೆ.
ಈ ಕಂಪೆನಿಗಳು ಎಸ್ಐಎಲ್ ಷೇರಿನ ಮೌಲ್ಯವನ್ನು ಕೃತಕವಾಗಿ ಹೆಚ್ಚಿಸುವ ಮೂಲಕ ತಪ್ಪು ಮಾಹಿತಿ ನೀಡಿವೆ. ಅಲ್ಲದೆ ದಳ್ಳಾಳಿಗಳ ನಿಯಮಗಳನ್ನೂ ಉಲ್ಲಂಘಿಸಿ ಎಂದು ಸೆಬಿ ತನ್ನ ಆದೇಶದಲ್ಲಿ ತಿಳಿಸಿದೆ.
1 ಮೇ 2010ರಿಂದ 31ನೇ ಜನವರಿ 2011ರ ಅವಧಿಯಲ್ಲಿ ಈ 19 ಕಂಪೆನಿಗಳು ಎಸ್ಐಎಲ್ ಷೇರಿನ ಬೆಲೆಯನ್ನು ರೂ. 21.75 ರಿಂದ ರೂ. 162.80ಕ್ಕೆ ಗರಿಷ್ಠ ಏರಿಕೆ ಮಾಡಿರುವುದು ಮತ್ತು ದಿನದ ವಹಿವಾಟಿನಲ್ಲಿ ಗರಿಷ್ಠ 79,68,043 ಷೇರುಗಳು ಹಾಗೂ ಕನಿಷ್ಠ 31 ಷೇರುಗಳು ಮಾರಾಟವಾಗಿವೆ ಎಂದು ತಪ್ಪಾಗಿ ಮಾಹಿತಿ ನೀಡಿರುವುದು ಸೆಬಿ ನಡೆಸಿದ ವಿಚಾರಣೆಯಿಂದ ತಿಳಿದುಬಂದಿದೆ.