ವಾಷಿಂಗ್ಟನ್ (ಪಿಟಿಐ): ಈ ವರ್ಷದ ಜನವರಿಯಿಂದ ಜೂನ್ವರೆಗಿನ ಅವಧಿಯಲ್ಲಿ ಅತಿ ಹೆಚ್ಚು ತಾಪಮಾನ ದಾಖಲಾಗಿದೆ ಎಂದು ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ನಾಸಾ) ತಿಳಿಸಿದೆ.
1979ರಿಂದ ಈಚೆಗೆ ನಾಸಾ ಉಪಗ್ರಹ ಆಧಾರಿತ ದತ್ತಾಂಶಗಳನ್ನು ಸಂಗ್ರಹಿಸತೊಡಗಿದ ಮೇಲೆ ಇಲ್ಲಿಯವರೆಗಿನ ಅತಿ ಹೆಚ್ಚು ಮತ್ತು ಅತ್ಯಂತ ಕಡಿಮೆ ದಾಖಲೆಯ ತಾಪಮಾನ ಇದಾಗಿದೆ. ಆರ್ಕಿಟಿಕ್ ಸಮುದ್ರದಲ್ಲಿ ಅತ್ಯಂತ ಕಡಿಮೆ ಉಷ್ಣಾಂಶ ದಾಖಲಾಗಿದೆ
ಅಮೆರಿಕದ ಬಾಹ್ಯಾಕಾಶ ಸಂಸ್ಥೆಯ ಭೂ ಆಧಾರಿತ ವೀಕ್ಷಣೆಗಳ ವಿಶ್ಲೇಷಣೆಗಳು ಹಾಗೂ ಉಪಗ್ರಹ ದತ್ತಾಂಶಗಳ ಪ್ರಕಾರ, ಎರಡು ಪ್ರಮುಖ ವಾತಾವರಣ ಬದಲಾವಣೆ ಸೂಚಕಗಳಾದ ಜಾಗತಿಕ ಮೇಲ್ಮೈ ತಾಪಮಾನ ಹಾಗೂ ಆರ್ಕಿಟಿಕ್ ಸಮುದ್ರ ಪ್ರದೇಶಗಳಲ್ಲಿ 2016ರ ಅರ್ಧ ವರ್ಷದಲ್ಲಿ ಅನೇಕ ದಾಖಲೆಗಳನ್ನು ಮುರಿದಿದೆ.
ಅಮೆರಿಕದಲ್ಲಿನ ನಾಸಾದ ಗೊಡ್ಡಾರ್ಡ್ ಬಾಹ್ಯಾಕಾಶ ಅಧ್ಯಯನ ಸಂಸ್ಥೆ ಈ ಅಧ್ಯಯನವನ್ನು ನಡೆಸಿದೆ.
19ನೇ ಶತಮಾನಕ್ಕೆ ಹೋಲಿಸಿದರೆ 2016ರ ಜನವರಿಯಿಂದ ಜೂನ್ವರೆಗೆ ಸರಾಸರಿ 1.3 ಡಿಗ್ರಿ ಸೆಲ್ಸಿಯಸ್ ತಾಪಮಾನ ದಾಖಲಾಗಿದೆ.
ಈ ಎರಡು ಬೆಳವಣಿಗೆಗಳು ಮಹತ್ವದ್ದಾಗಿದ್ದು, ಜಾಗತಿಕ ಹವಾಮಾನ ವೈಪರೀತ್ಯ ಮುಂದುವರಿಯುವ ಸೂಚನೆ ನೀಡಿವೆ ಎಂದು ನಾಸಾ ವಿಜ್ಞಾನಿಗಳು ತಿಳಿಸಿದ್ದಾರೆ.
ವಾತಾವರಣದಲ್ಲಿ ಇಂಗಾಲದ ಡೈ ಆಕ್ಸೈಡ್ ಹಾಗೂ ಹಸಿರು ಮನೆ ಅನಿಲಗಳು ಹೆಚ್ಚಳ ಆಗಿರುವುದೇ ಈ ಬೆಳವಣಿಗೆಗೆ ಕಾರಣವಾಗಿದೆ ಎಂದು ಅವರು ತಿಳಿಸಿದ್ದಾರೆ.