ಅಟಾರಿ, ಅಮೃತಸರ (ಪಿಟಿಐ): ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದ ಎನ್ಡಿಎ ಸರ್ಕಾರ ಸದ್ಭಾವನೆಯ ಸಂಕೇತವಾಗಿ ಪಾಕಿಸ್ತಾನದ 37 ಬಂಧಿತರನ್ನು ಶುಕ್ರವಾರ ಬಿಡುಗಡೆ ಮಾಡಿದೆ.
ಬಿಡುಗಡೆಯಾದವರಲ್ಲಿ ಪಾಕಿಸ್ತಾನದ 32 ಮೀನುಗಾರರು ಮತ್ತು ಭಾರತದ ಗಡಿಯನ್ನು ಅಕ್ರಮವಾಗಿ ಪ್ರವೇಶಿಸಿದ ಐವರು ಪಾಕ್ ನಾಗರಿಕರು ಸೇರಿದ್ದಾರೆ ಎಂದು ಅಟಾರಿ ಗಡಿಪ್ರದೇಶದಲ್ಲಿರುವ ಭಾರತೀಯ ಅಧಿಕಾರಿಯೊಬ್ಬರು ಖಚಿತಪಡಿಸಿದ್ದಾರೆ.
ಈ 37 ಬಂಧಿತರನ್ನು ಭಾರತದ ಅಟಾರಿಯ ಗಡಿಠಾಣೆಯ ಸಮೀಪದಲ್ಲಿರುವ ಪಾಕಿಸ್ತಾನದ ರೇಂಜರ್ಗಳ ವಶಕ್ಕೆ ಒಪ್ಪಿಸಲಾಗಿದೆ. ಅವರು ಭಾರತದ ವಿವಿಧ ಜೈಲುಗಳಲ್ಲಿ ಕಳೆದ 16 ತಿಂಗಳುಗಳಿಂದ ಸೆರೆವಾಸ ಅನುಭವಿಸುತ್ತಿದ್ದರು. ಪಾಕಿಸ್ತಾನದ ಪ್ರಧಾನಿ ನವಾಜ್ ಶರೀಫ್, ಮೋದಿ ಅವರ ಅಧಿಕಾರ ಗ್ರಹಣ ಸಮಾರಂಭಕ್ಕೆಂದು ಭಾರತಕ್ಕೆ ಬರುವ ಮೊದಲು ಪಾಕ್, 151 ಭಾರತೀಯ ಮೀನುಗಾರರನ್ನು ಮೇ 25ರಂದು ಬಿಡುಗಡೆ ಮಾಡಿತ್ತು ಎಂಬುದನ್ನು ಇಲ್ಲಿ ಸ್ಮರಿಸಬಹುದು.