ಮುಂಬೈ (ಪಿಟಿಐ): 2006 ರಲ್ಲಿ ನಡೆದ ಮಾಲೆಗಾಂವ್‌ ಸ್ಫೋಟ ಪ್ರಕರಣದಲ್ಲಿ ಭಾಗಿಯಾದ ಆರೋಪದಲ್ಲಿ ಬಂಧನ ಕ್ಕೊಳಗಾಗಿರುವ ಒಂಬತ್ತು ಮಂದಿ ಮುಸ್ಲಿಮರ ಬಿಡುಗಡೆ ಮನವಿಗೆ ಮಹಾ ರಾಷ್ಟ್ರದ ಭಯೋತ್ಪಾದನಾ ನಿಗ್ರಹ ದಳದ (ಎಟಿಎಸ್‌) ಪೊಲೀಸರು ವಿರೋಧ ವ್ಯಕ್ತಪಡಿಸಿದ್ದಾರೆ.
ಒಂಬತ್ತು ಆರೋಪಿಗಳ ಬಿಡುಗಡೆ ಮನವಿ ಬಗ್ಗೆ ಸಿಬಿಐ ಮತ್ತು ಎಟಿಎಸ್‌್ ಪ್ರತಿಕ್ರಿಯೆಯನ್ನು ನ್ಯಾಯಾಲಯ ಪಡೆದುಕೊಳ್ಳಬೇಕು ಎಂದು ಬಲಪಂಥೀಯ ಹಿಂದೂ ಸಂಘಟನೆಯ ಆರೋಪಿ ಒಬ್ಬರು ಬೇಡಿಕೆ ಸಲ್ಲಿಸಿದ್ದರು. ಅದಕ್ಕೆ ಅನುಗುಣವಾಗಿ ಪ್ರತಿಕ್ರಿಯೆ ಸಲ್ಲಿಸುವಂತೆ ನ್ಯಾಯಾಲಯ ಎಟಿಎಸ್‌ಗೆ ನಿರ್ದೇಶನ ನೀಡಿತ್ತು.
ನಂತರದಲ್ಲಿ ಪ್ರಕರಣದ ತನಿಖೆಯ ನೇತೃತ್ವ ವಹಿಸಿದ್ದ ಎನ್‌ಐಎ, ಒಂಬತ್ತು ಆಪಾದಿತರನ್ನು ದೋಷ ಮುಕ್ತಗೊಳಿಸಿ ಸ್ಫೋಟದ ಹಿಂದೆ ಹಿಂದೂ ಉಗ್ರವಾದಿ ಗುಂಪಿನ ಸದಸ್ಯರ ಕೈವಾಡವಿದೆ ಎಂದು ಆರೋಪಿಸಿತ್ತು.
ಆದರೆ ಇದಕ್ಕೆ ವಿರೋಧ ವ್ಯಕ್ತಪಡಿಸಿದ್ದ ಎಟಿಎಸ್‌್, ಸ್ಫೋಟದಲ್ಲಿ ಈ ಒಂಬತ್ತು ಆರೋಪಿಗಳು ಭಾಗಿಯಾಗಿದ್ದಾರೆ ಎಂಬುದು ತನಿಖೆಯಿಂದ ಸಾಬೀತಾಗಿದೆ. ಅಪರಾಧ ಕೃತ್ಯದಲ್ಲಿ ಅವರು ತೊಡಗಿದ್ದು ಸ್ಫೋಟದ ಸ್ಥಳದಲ್ಲಿ ಸಂಗ್ರಹಿಸಲಾದ ಮಾಹಿತಿಯಿಂದ ಬಹಿರಂಗ ವಾಗಿದೆ. ಆದ್ದರಿಂದ ಇವರ ವಿರುದ್ಧ ಆರೋಪಪಟ್ಟಿ ಸಲ್ಲಿಸಲಾಗಿದೆ ಎಂದು ಹೇಳಿತ್ತು.
