ಇದೊಂದು ಮೊಬೈಲ್ಗೆ ಅಳವಡಿಸಬಹುದಾದ ಕಿರು ತಂತ್ರಾಂಶ, ತಾಂತ್ರಿಕ ಪರಿಭಾಷೆಯಲ್ಲಿ ಹೇಳುವುದಾದದರೆ ಇದೊಂದು ಮೊಬೈಲ್ ಆ್ಯಪ್ (app). ಆ್ಯಪ್ ಗೂಗಲ್ ಪ್ಲೇ ಸ್ಟೋರ್, ಐಟ್ಯೂನ್ಸ್ ಹೀಗೆ ಎಲ್ಲಾ ಬಗೆಯ ಕಿರುತಂತ್ರಾಂಶ ದೊರೆಯುವ ವರ್ಚುವಲ್ ಅಂಗಡಿಗಳಲ್ಲಿ ಇದು ಉಚಿತವಾಗಿ ಲಭ್ಯವಿದೆ.
ನೀವು ಯಾವುದೇ ಸ್ಥಳಕ್ಕೆ ಹೋದರೂ ಅಲ್ಲಿ ಯಾವ ಅಂಗಡಿಗಳಲ್ಲಿ ಯಾವ ವಸ್ತುಗಳ ಡಿಸ್ಕೌಂಟ್ ಸೇಲ್ ಅಥವಾ ದರ ಕಡಿತ ಮಾರಾಟವಿದೆ ಎಂಬ ಮಾಹಿತಿಯನ್ನು ಇದು ನಿಮಗೆ ಒದಗಿಸುತ್ತದೆ. ಒಂದು ರೂಪಾಯಿಯನ್ನೂ ನಿಮ್ಮಿಂದ ಕೇಳದ ಈ ತಂತ್ರಾಂಶ ನಿಮ್ಮ ಮೊಬೈಲ್ ಫೋನ್ನ ಜಿಪಿಎಸ್ ಸೌಲಭ್ಯವನ್ನು ಬಳಸಿಕೊಂಡು ನೀವೆಲ್ಲಿದ್ದೀರಿ ಎಂಬುದನ್ನು ತಿಳಿದುಕೊಳ್ಳುತ್ತದೆ. ನಿಮ್ಮ ಫೋನ್ನಲ್ಲಿರುವ ದೂರವಾಣಿ ಸಂಖ್ಯೆಗಳು ಮತ್ತಿತರ ಸಂಪರ್ಕಗಳನ್ನು ನೋಡುವುದಕ್ಕೆ ನಿಮ್ಮ ಅನುಮತಿಯನ್ನು ಇನ್ಸ್ಟಾಲ್ ಆಗುವಾಗಲೇ ಪಡೆದುಕೊಂಡಿರುತ್ತದೆ.
ಮೇಲ್ನೋಟಕ್ಕೆ ಈ ಕಿರು ತಂತ್ರಾಂಶ ಬಳಕೆದಾರನಿಗೆ ಯಾವ ತೊಂದರೆಯನ್ನೂ ಉಂಟು ಮಾಡುವುದಿಲ್ಲ. ತಂತ್ರಾಂಶ ತಯಾರಕರ ದೃಷ್ಟಿಯಲ್ಲಂತೂ ಇದು ಬಳಕೆದಾರರಿಗೆ ಮಾಹಿತಿಯನ್ನು ಒದಗಿಸುವ ಮೂಲಕ ಅನುಕೂಲ ಕಲ್ಪಿಸುತ್ತದೆ. ಉದಾಹರಣೆಗೆ ನೀವು ಬೆಂಗಳೂರಿನ ಕಮರ್ಷಿಯಲ್ ಸ್ಟ್ರೀಟ್ನಲ್ಲಿ ಇದ್ದೀರಿ ಎಂದು ಭಾವಿಸಿ. ನಿಮ್ಮ ಮೊಬೈಲ್ ಫೋನ್ಗೆ ಅಲ್ಲಿರುವ ಯಾವ ಯಾವ ಅಂಗಡಿಗಳಲ್ಲಿ ಡಿಸ್ಕೌಂಟ್ ಸೇಲ್ ಇದೆ ಎಂಬ ಮಾಹಿತಿ ಬಂದು ಬೀಳುತ್ತದೆ. ನೀವು ಯಾವ ಅಂಗಡಿಯ ಸಮೀಪ ಇದ್ದೀರಿ ಎಂಬ ಮಾಹಿತಿಯನ್ನೂ ಅದೇ ಒದಗಿಸುತ್ತದೆ. ಆ ಅಂಗಡಿಯೊಳಕ್ಕೆ ನುಗ್ಗಿ ಬೇಕಿರುವ ವಸ್ತುವನ್ನು ಖರೀದಿಸುವುದಷ್ಟೇ ನಿಮ್ಮ ಕೆಲಸ.
ನಿಮಗೆ ಇಷ್ಟೆಲ್ಲಾ ಉಪಕಾರ ಮಾಡುವ ಈ ತಂತ್ರಾಂಶವನ್ನು ರೂಪಿಸಿದವರಿಗೆ ಏನು ಲಾಭ? ಅವರೇಕೆ ಈ ಮಾಹಿತಿಯನ್ನು ನಿಮ್ಮ ಮೊಬೈಲ್ ಫೋನಿಗೆ ಕಳುಹಿಸಿಕೊಡಬೇಕು? ಈ ಪ್ರಶ್ನೆಗಳಿಗೆ ಸಾಮಾನ್ಯ ಜ್ಞಾನ ಇರುವ ಯಾರೂ ಉತ್ತರಿಸಿಯಾರು. ಈ ಕಿರುತಂತ್ರಾಂಶವನ್ನು ರೂಪಿಸಿದವರು ನಿಮಗೆ ಮಾಹಿತಿ ತಲುಪಿಸಿದ್ದಕ್ಕಾಗಿ ಅಂಗಡಿಗಳವರಿಂದ ಹಣ ಪಡೆಯುತ್ತಾರೆ. ನೀವು ಅಲ್ಲಿ ಖರೀದಿ ಮಾಡಿ ನೀವು ಮಾಹಿತಿ ಪಡೆದದ್ದು ಮೊಬೈಲ್ ಆ್ಯಪ್ನಿಂದ ಎಂದು ತಿಳಿಸಿದರೆ ಅದಕ್ಕೆ ವಿಶೇಷ ಡಿಸ್ಕೌಂಟ್ ಕೂಡಾ ಸಿಗುತ್ತದೆ. ಇದಕ್ಕಾಗಿ ಆ್ಯಪ್ ತಯಾರಕರಿಗೆ ವಿಶೇಷ ಮೊತ್ತವೂ ಲಭಿಸುತ್ತದೆ.
ಈ ವ್ಯವಹಾರದಲ್ಲಿ ಆ್ಯಪ್ ತಯಾರಕರಿಗೆ ಲಾಭ. ಅಂಗಡಿಯವರಿಗೂ ಲಾಭ. ಖರೀದಿ ಮಾಡಲು ಹೋದವರಿಗೂ ಲಾಭ ಎಂಬುದು ಮೇಲ್ನೋಟಕ್ಕೆ ಕಾಣಿಸುವ ಸತ್ಯ. ಈ ಲಾಭಕ್ಕಾಗಿ ಖರೀದಿಸುವವರು ಅರ್ಥಾತ್ ಆ್ಯಪ್ನ ಬಳಕೆದಾರರು ತಾವೆಲ್ಲಿದ್ದೇವೆ ಎಂಬುದನ್ನು ನಿರಂತರವಾಗಿ ಆ್ಯಪ್ನ ನಿರ್ವಾಹಕರಿಗೆ ತಮಗೆ ಅರಿವಿಲ್ಲದಂತೆಯೇ ತಿಳಿಸುತ್ತಿರುತ್ತಾರೆ. ಅಥವಾ ಈ ಆ್ಯಪ್ ಅಳವಡಿಸಿಕೊಂಡವರನ್ನು ಆ್ಯಪ್ನ ನಿರ್ವಾಹಕರು ನಿರಂತರವಾಗಿ ಹಿಂಬಾಲಿಸಿ ತಮ್ಮ ಉತ್ಪನ್ನಗಳನ್ನು ಮಾರಾಟ ಮಾಡುತ್ತಿರುತ್ತಾರೆ. ಇದಿಷ್ಟಕ್ಕೂ ಬಳಕೆಯಾಗುವುದು ಬಳಕೆದಾರನ ಫೋನ್, ಆತ ಮೊಬೈಲ್ ಸೇವಾದಾತನಿಗೆ ಇಂಟರ್ನೆಟ್ ಸೇವೆಗಾಗಿ ನೀಡಿರುವ ದುಡ್ಡು. ಜೊತೆಗೆ ನಿರಂತರವಾಗಿ ಅನ್ಯನೊಬ್ಬನನ್ನು ಬಗಲಲ್ಲಿ ಇಟ್ಟುಕೊಂಡು ತಿರುಗಾಡಬೇಕಾದ ಅನಿವಾರ್ಯತೆ ಬಳಕೆದಾರನದ್ದು.
ಡಿಸ್ಕೌಂಟ್ ಸೇಲ್ನ ಮಾಹಿತಿ ನೀಡುವ ಆ್ಯಪ್ನ ತಯಾರಕರು ಈ ವಿಷಯಗಳನ್ನೆಲ್ಲಾ ಮೊದಲೇ ಹೇಳಿಕೊಂಡಿರುವುದರಿಂದ ಅದನ್ನು ಫೋನಿಗೆ ಅಳವಡಿಸಿಕೊಳ್ಳದೆಯೂ ಇರಬಹುದು. ಆದರೆ ಸಾಮಾನ್ಯ ಬಳಕೆಯ ಇ–ಮೇಲ್ ಸೌಲಭ್ಯ, ಸೋಷಿಯಲ್ ನೆಟ್ ವರ್ಕಿಂಗ್ ಸವಲತ್ತು ಅಷ್ಟೇಕೆ ಆ್ಯಂಗ್ರಿ ಬರ್ಡ್ನಂಥ ಜನಪ್ರಿಯ ಆಟದ ಆ್ಯಪ್ಗಳೂ ಕೂಡಾ ನಿಮ್ಮ ಫೋನ್ ಬುಕ್ ಮತ್ತು ನಿಮ್ಮ ಜಿಪಿಎಸ್ ಸವಲತ್ತಿಗೆ ಅನುಮತಿಯನ್ನು ಕೋರುತ್ತವೆ. ಈ ಮಾಹಿತಿಯನ್ನು ಅವು ಏನು ಮಾಡುತ್ತವೆ ಎಂಬುದರ ಬಗ್ಗೆ ಯಾವತ್ತಾದರೂ ನಾವು ಆಲೋಚಿಸಿದ್ದೇವೆಯೇ?
ಸೆಂಟ್ರಲ್ ಮಾನಿಟರಿಂಗ್ ಸಿಸ್ಟಂ ಅಥವಾ ಸಿಎಂಎಸ್ ಹಾಗೆಯೇ ‘ನೇತ್ರ’ದಂಥ ಸರ್ಕಾರಿ ಯೋಜನೆಗಳು ಈಗಾಗಲೇ ನೀವು ಯಾರಿಗೆ ಎಸ್ಎಂಎಸ್ ಕಳುಹಿಸುತ್ತೀರಿ, ಇಂಟರ್ನೆಟ್ನಲ್ಲಿ ಏನನ್ನು ನೋಡುತ್ತೀರಿ, ಯಾರೊಂದಿಗೆ ಸಂಪರ್ಕದಲ್ಲಿದ್ದೀರಿ ಮುಂತಾದ ಮಾಹಿತಿಗಳನ್ನು ಈಗಾಗಲೇ ಸಂಗ್ರಹಿಸುತ್ತಿವೆ. ಈ ಮಾಹಿತಿಯನ್ನು ಸರ್ಕಾರ ಸಂಗ್ರಹಿಸುತ್ತಿರುವುದರಿಂದ ನಾಳೆ ಏನಾದರೂ ದುರ್ಬಳಕೆಯಾದರೆ ಕನಿಷ್ಠ ನ್ಯಾಯಾಲಯಕ್ಕೆ ಹೋಗಬಹುದು. ಅದರ ವಿರುದ್ಧ ಪ್ರತಿಭಟಿಸಲು ನೂರೆಂಟು ಮಾರ್ಗಗಳಿವೆ. ಜೊತೆಗೆ ಈಗಾಗಲೇ ಈ ಕುರಿತಂತೆ ಸಾಕಷ್ಟು ಚರ್ಚೆಗಳೂ ನಡೆದಿರುವುದರಿಂದ ಸರ್ಕಾರೀ ಸಂಸ್ಥೆಗಳು ಇದನ್ನು ದುರುಪಯೋಗ ಪಡಿಸಿಕೊಳ್ಳುವ ಸಾಧ್ಯತೆಗಳು ಸಾಪೇಕ್ಷವಾಗಿ ಕಡಿಮೆ.
ಇ–ಮೇಲ್ ಸೇವೆ ಒದಗಿಸುವ, ಸೋಷಿಯಲ್ ನೆಟ್ ವರ್ಕಿಂಗ್ ಸೇವೆ ನೀಡುವ, ಆಟಗಳ ತಂತ್ರಾಂಶ ತಯಾರಿಸುವವರೂ ಸಂಗ್ರಹಿಸುವ ಖಾಸಗಿ ಮಾಹಿತಿಗೆ ಏನು ಭದ್ರತೆ? ಈ ಪ್ರಶ್ನೆಯನ್ನು ಈಗಾಗಲೇ ಅನೇಕ ಬಾರಿ ಕೇಳಲಾಗಿದೆ. ಇದಕ್ಕೆ ಉತ್ತರವಾಗಿ ಎಲ್ಲಾ ಕಂಪೆನಿಗಳೂ ತಮ್ಮ ಪ್ರೈವಸಿ ಪಾಲಿಸಿಯನ್ನೂ ತಮ್ಮ ಅಬಾಧ್ಯತಾ ಷರತ್ತುಗಳನ್ನೂ ತೋರಿಸುತ್ತವೆ. ಇವುಗಳು ಕೊನೆಗೂ ಹೇಳುವುದನ್ನೇನು? ಈ ಪ್ರಶ್ನೆಗೆ ಸರಳವಾಗಿ ಮತ್ತು ಸಂಕ್ಷಿಪ್ತವಾಗಿ ಉತ್ತರಿಸಬಹುದಾದರೆ ‘ಈ ನಿರ್ದಿಷ್ಟ ಸೇವೆಯ ಬಳಕೆದಾರನಾದ ನಾನು ನನ್ನ ಎಲ್ಲಾ ಮಾಹಿತಿಗಳನ್ನೂ ಸ್ವಇಚ್ಛೆಯಿಂದ ಉಚಿತವಾಗಿ ಸೇವಾದಾತರಿಗೆ ನೀಡಿದ್ದೇನೆ’ ಎಂದು ನಾವು ಹೇಳುತ್ತಿದ್ದೇವೆಂದು ಆ ಕಂಪೆನಿಗಳು ಹೇಳುತ್ತಿವೆ.
ಇದು ಖಾಸಗಿ ಮಾಹಿತಿಯ ರಕ್ಷಣೆಗೆ ಸಂಬಂಧಿಸಿದ ಕಾನೂನಿನ ಆಯಾಮ, ಇದರ ತಾಂತ್ರಿಕ ಆಯಾಮ ಮತ್ತೂ ಭೀಕರವಾಗಿದೆ. ಸ್ಮಾರ್ಟ್ ಫೋನ್ ಬಳಕೆದಾರರು ಸರಾಸರಿ 26 ಆ್ಯಪ್ಗಳನ್ನು ಅಳವಡಿಸಿಕೊಂಡಿರುತ್ತಾರೆ. ಇವುಗಳೆಲ್ಲವೂ ಒಂದಲ್ಲಾ ಒಂದು ರೀತಿಯಲ್ಲಿ ನಿಮ್ಮ ಖಾಸಗಿ ಮಾಹಿತಿಗೆ ಕನ್ನ ಹಾಕುವವರಿಗೆ ಅನುಕೂಲಕರವಾಗುವಂಥ ಭದ್ರತಾ ಲೋಪಗಳನ್ನು ಹೊಂದಿವೆಯಂತೆ. ಕಳೆದ ವರ್ಷದ ಕೊನೆಯಲ್ಲಿ ಎಚ್ಪಿ ಸಂಸ್ಥೆ ಬಿಡುಗಡೆ ಮಾಡಿದ ಸಮೀಕ್ಷಾ ಫಲಿತಾಂಶಗಳು ಈ ವಿವರಗಳನ್ನು ಒದಗಿಸುತ್ತಿವೆ. ಈ ಸಮೀಕ್ಷೆ ಬಿಸಿನೆಸ್ ಆ್ಯಪ್ಗಳು ಎಂದು ಗುರುತಿಸಲಾಗುವ ನಿರ್ದಿಷ್ಟ ಬಳಕೆದಾರ ವರ್ಗದೊಳಗಷ್ಟೇ ಬಳಕೆಯಲ್ಲಿರುವ ಆ್ಯಪ್ಗಳನ್ನು ದೃಷ್ಟಿಯಲ್ಲಿಟ್ಟುಕೊಂಡಿತ್ತು. ಆದರೆ ಈ ಸ್ಥಿತಿ ಸಾಮಾನ್ಯ ಬಳಕೆದಾರ ಆ್ಯಪ್ಗಳ ಕ್ಷೇತ್ರದ್ದೂ ಹೌದು ಎಂದು ತಜ್ಞರು ಅಭಿಪ್ರಾಯ ಪಡುತ್ತಾರೆ. ಈ ಬಿಸಿನೆಸ್ ಆ್ಯಪ್ಗಳು ಭದ್ರತೆಯ ವಿಚಾರದಲ್ಲಿ ಸಾಮಾನ್ಯ ಆ್ಯಪ್ಗಳಿಗಿಂತ ಹೆಚ್ಚು ಬಲವಾಗಿರಬೇಕಾಗುತ್ತದೆ. ಇಲ್ಲಿರುವ ಮಾಹಿತಿ ಅವುಗಳನ್ನು ಬಳಸುವ ಸಂಸ್ಥೆಗಳಿಗೆ ಭಾರೀ ಪ್ರಮಾಣದ ನಷ್ಟವನ್ನೇ ಉಂಟು ಮಾಡಬಹುದಾದಂಥವು. ಇವುಗಳೇ ದುರ್ಬಲವಾಗಿವೆ ಎಂದರೆ ಸಾಮಾನ್ಯ ಬಳಕೆಯ ಆ್ಯಪ್ಗಳ ಸ್ಥಿತಿ ಹೇಗಿರಬಹುದು?
ಈ ಸ್ಥಿತಿಗೆ ಏನು ಕಾರಣ ಎಂಬುದನ್ನೂ ಎಚ್ಪಿಯ ಸಮೀಕ್ಷೆ ತಿಳಿಸುತ್ತಿದೆ. ಭದ್ರತಾ ಲೋಪಗಳ ಹಿಂದೆ ಇರುವುದು ಆ್ಯಪ್ ಅಭಿವೃದ್ಧಿ ಪಡಿಸುವ ತಂತ್ರಜ್ಞರ ಸೋಮಾರಿತನವಂತೆ. ಏನೂ ಆಗುವುದಿಲ್ಲ, ಮುಂದೆ ನೋಡೋಣ ಎಂಬಂಥ ನಿಲುವುಗಳು. ಭಾರೀ ಪ್ರಮಾಣದಲ್ಲಿ ವಿಸ್ತಾರಗೊಳ್ಳುತ್ತಾ ಹೋಗುತ್ತಿರುವ ಆ್ಯಪ್ ಮಾರುಕಟ್ಟೆಗೆ ಉತ್ಪನ್ನಗಳನ್ನು ಪೂರೈಸುವ ಉತ್ಸಾಹದಲ್ಲಿ ತಂತ್ರಜ್ಞರು ಭದ್ರತೆಯನ್ನು ಬದಗಿರಿಸಿದ್ದಾರಷ್ಟೆ. ಇದರ ಬಲಿಪಶುವಾಗಬೇಕಿರುವುದು ಗ್ರಾಹಕರು.
ಇಂಥದ್ದೊಂದು ಸ್ಥಿತಿಯಲ್ಲಿ ಮಾಹಿತಿಯನ್ನು ಹೇಗೆ ಭದ್ರವಾಗಿಟ್ಟುಕೊಳ್ಳುವುದು ಎಂಬ ಪ್ರಶ್ನೆ ಕೇಳಿಕೊಂಡರೆ ದೊರೆಯುವ ಉತ್ತರ ಒಂದೇ ‘ಸ್ಮಾರ್ಟ್ ಫೋನ್ ಬಳಸಬೇಡಿ!’. ಇದು ಕಾರ್ಯರೂಪಕ್ಕೆ ತರಲಾಗದ ಸಲಹೆ. ಸರ್ಕಾರ ನಮ್ಮ ರಕ್ಷಣೆಗೆ ಬರುತ್ತದೆ ಎಂಬ ನಿರೀಕ್ಷೆಯನ್ನೂ ಇಟ್ಟುಕೊಳ್ಳಲು ಸಾಧ್ಯವಿಲ್ಲ. ಈಗಿನ ಸರ್ಕಾರ ಏನನ್ನೂ ಮಾಡಿಲ್ಲ, ಮುಂದಿನ ಸರ್ಕಾರ ಮಾಡುತ್ತದೆಂದು ನಿರೀಕ್ಷಿಸೋಣವೆಂದರೆ ಅಧಿಕಾರಕ್ಕೇರಲು ಸಮರ್ಥವಾಗಿರುವ ಯಾವ ರಾಜಕೀಯ ಪಕ್ಷದ ಪ್ರಣಾಳಿಕೆಯೂ ಬಳಕೆದಾರನ ಖಾಸಗಿ ಮಾಹಿತಿ ಸಂರಕ್ಷಣೆಯ ಕುರಿತಂತೆ ಮಾತನಾಡಿಲ್ಲ. ಇದೇಕೆ ಹೀಗೆ ಎಂಬ ಪ್ರಶ್ನೆಗೆ ಎರಡು ಉತ್ತರಗಳಿವೆ. ಮೊದಲನೆಯದ್ದು ಮಾಹಿತಿ ತಂತ್ರಜ್ಞಾನದ ಸಾಧ್ಯತೆಗಳ ಕುರಿತಂತೆ ನಮ್ಮ ರಾಜಕಾರಣಿಗಳಿಗೆ ಇರುವ ಅರಿವು ಪ್ರಾಥಮಿಕ ಮಟ್ಟದ್ದು. ಹಾಗೆಯೇ ಅದರ ಸಾಮಾನ್ಯ ಬಳಕೆದಾರರೂ ಈ ಮಟ್ಟವನ್ನು ಮೀರಿ ಬೆಳೆದಿಲ್ಲ. ಈ ಸ್ಥಿತಿಯನ್ನು ಲಾಭಕೋರ ಕಂಪೆನಿಗಳು ತಮ್ಮ ಲಾಭಕ್ಕಾಗಿ ಬಳಸಿಕೊಳ್ಳುತ್ತಿವೆ. ಎರಡನೆಯದ್ದು ಆಡಳಿತ ನಡೆಸುವುದಕ್ಕೆ ಉತ್ಸಾಹಿಗಳಾಗಿರುವವರಿಗೆ ಇದೆಲ್ಲವೂ ಗೊತ್ತಿದೆ. ಆದರೆ ಅವರು ತಮ್ಮ ಸದ್ಯದ ಲಾಭಕ್ಕಾಗಿ ಜಾಣ ಕುರುಡು ಮತ್ತು ಕಿವುಡನ್ನು ನಟಿಸುತ್ತಿದ್ದಾರೆ.
ಈ ಎರಡೂ ಸಂದರ್ಭಗಳನ್ನು ನಿರ್ವಹಿಸುವುದಕ್ಕೆ ಇರುವ ಏಕೈಕ ಪರಿಹಾರ ಗ್ರಾಹಕರು ಜಾಗೃತರಾಗುವುದು. ಈಗಾಗಲೇ ಇರುವ ಗ್ರಾಹಕ ಹಕ್ಕು ಕಾನೂನುಗಳನ್ನು ಬಳಸಿಕೊಂಡು ಖಾಸಗಿ ಮಾಹಿತಿಯ ಸುರಕ್ಷತೆಯನ್ನು ಖಾತರಿ ಪಡಿಸಲು ಬೇಕಿರುವ ಕ್ರಮಗಳಿಗಾಗಿ ಸಂಘಟಿತ ಪ್ರಯತ್ನಗಳಾಗಬೇಕು. ಎಂಬತ್ತರ ದಶಕದ ಮಧ್ಯಭಾಗದಲ್ಲಿ ಆರಂಭಗೊಂಡಿದ್ದ ಗ್ರಾಹಕ ಚಳವಳಿಗೆ ಹೊಸ ತಿರುವು ಕೊಡುವ ಕಾಲ ಬಂದಿದೆ ಎಂಬುದನ್ನು ಗ್ರಾಹಕರ ಹಕ್ಕುಗಳ ಸಂಘಟನೆಗಳು ಅರಿಯಬೇಕಾಗಿದೆ.
ಪಾಶ್ಚಾತ್ಯ ರಾಷ್ಟ್ರಗಳಲ್ಲಿ ಈ ಬಗೆಯ ಹೋರಾಟಗಳು ಫಲ ಕೊಟ್ಟಿವೆ. ಭಾರತದಲ್ಲಿ ಇಂಥ ಹೋರಾಟಗಳು ಕೆಲವೇ ಕೆಲವು ಸರ್ಕಾರೇತರ ಸಂಘಟನೆಗಳಿಗೆ ಸೀಮಿತವಾಗಿ ಉಳಿದಿದೆ. ತಂತ್ರಜ್ಞಾನ ಹರಡುತ್ತಿರುವ ವೇಗದಲ್ಲಿ ಈ ಚಳವಳಿ ಬೆಳೆಯುತ್ತಿಲ್ಲ. ಹಳ್ಳಿಗಳಿಗೆ ಮಾಹಿತಿ ತಂತ್ರಜ್ಞಾನ ಸಾಗುತ್ತಿರುವ ಹೊತ್ತಿನಲ್ಲಿ ಅದು ಸೃಷ್ಟಿಸಬಹುದಾದ ಬಿಕ್ಕಟ್ಟುಗಳ ಕುರಿತ ಅರಿವನ್ನೂ ಹಳ್ಳಿಗಳಿಗೆ ತಲುಪಿಸಬೇಕಾದ ಗುರುತರ ಹೊಣೆ ಈ ತಂತ್ರಜ್ಞಾನದ ಪರಿಣಿತ ಬಳಕೆದಾರರ ಮೇಲಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.