ಕಳೆದ ಎರಡು ವಾರಗಳಲ್ಲಿ ಬಿಡುಗಡೆಯಾದ ‘ಮರ್ದಾನಿ’ ಹಾಗೂ ‘ಮೇರಿ ಕೋಮ್’ ಹಿಂದಿ ಚಲನಚಿತ್ರಗಳು ಮಹಿಳಾ ಸಬಲತೆಯ ಕಥಾನಕಗಳಿಗೆ ಹೊಸ ಸೇರ್ಪಡೆ. ಮಹಿಷಾಸುರನನ್ನು ಸಂಹರಿಸಿದ ಚಾಮುಂಡೇಶ್ವರಿ ಮಹಿಷಾಸುರಮರ್ದಿನಿಯಾಗುತ್ತಾಳೆ. ಹೆಣ್ಣುಮಕ್ಕಳ ಅಕ್ರಮಸಾಗಣೆಯ ಸಂಘಟಿತ ಜಾಲವನ್ನು ಹಲವು ಅಪಾಯಗಳನ್ನೆದುರಿಸಿ ಭೇದಿಸುವ ದಿಟ್ಟತನ ತೋರುವಂತಹ ‘ಮರ್ದಾನಿ’ – ಮುಂಬೈ ಪೊಲೀಸ್ ಕ್ರೈಂಬ್ರಾಂಚ್ನ ಸೀನಿಯರ್ ಇನ್ಸ್ಪೆಕ್ಟರ್ ಶಿವಾನಿ ಶಿವಾಜಿ ರಾಯ್ (ರಾಣಿ ಮುಖರ್ಜಿ). ಹಾಗೆಯೇ ‘ಮೇರಿ ಕೋಮ್’ ಚಿತ್ರ, ಮಣಿಪುರದ ಬಾಕ್ಸರ್ ಮೇರಿ ಕೋಮ್ ಜೀವನ ಚರಿತ್ರೆ ಆಧರಿಸಿದ್ದು (ಬಯೊಪಿಕ್). ಈಶಾನ್ಯ ರಾಜ್ಯಕ್ಕೆ ಸಂಬಂಧಿಸಿದ ಕಥಾ ಪಾತ್ರ ಮುಖ್ಯವಾಹಿನಿಯ ಸಿನಿಮಾದಲ್ಲಿ ಪ್ರಧಾನ ಭೂಮಿಕೆಯಲ್ಲಿ ಚಿತ್ರಣಗೊಂಡಿರುವುದು ಬಹುಶಃ ಇದೇ ಮೊದಲ ಬಾರಿ ಎಂಬುದು ಈ ಚಿತ್ರದ ವೈಶಿಷ್ಟ್ಯವನ್ನು ಹೆಚ್ಚಿಸುತ್ತದೆ.
ಆರಂಭದಿಂದ ಕಡೆಯವರೆಗೆ ಥ್ರಿಲ್ಲರ್ ಗುಣ ಉಳಿಸಿಕೊಂಡಿರುವ ಚಿತ್ರ ‘ಮರ್ದಾನಿ’. ಹೆಣ್ಣುಮಕ್ಕಳ ಅಕ್ರಮ ಸಾಗಣೆದಾರರ ವಿರುದ್ಧ ಮಹಿಳಾ ಪೊಲೀಸ್ ಅಧಿಕಾರಿಯ ಸಮರದ ಚಿತ್ರಣ ಇಲ್ಲಿದೆ. ಕುಟುಂಬದೊಳಗೆ ಬೆಚ್ಚಗಿನ ಪ್ರೀತಿ ಹರಿಸುತ್ತಾ ಪೋಷಿಸುವಂತಹ ವ್ಯಕ್ತಿ ಈಕೆ. ಆದರೆ, ಹೊರಗಡೆ ಕಾನೂನು ಮುರಿಯುವ ಗೂಂಡಾಗಳನ್ನು ಎಗ್ಗಿಲ್ಲದೆ ಬಗ್ಗು ಬಡಿಯುವಾಕೆ. ಮಹಿಳೆಯನ್ನು ಹತ್ತಿಕ್ಕುವ ಪುರುಷ ಅಟ್ಟಹಾಸಕ್ಕೆ ಪ್ರತಿರೋಧ ತೋರಲು ಪ್ರತಿ ಮಹಿಳೆಯೂ ತನ್ನೊಳಗಿನ ‘ಮರ್ದಾನಿ’ಯನ್ನು ಅನ್ವೇಷಿಸಿ ಕೊಳ್ಳಬೇಕು ಎಂಬ ಸಲಹೆಯನ್ನು ಚಿತ್ರದಲ್ಲಿ ನೀಡಲಾಗಿದೆ.
ವಚನಕಾರ್ತಿ ಅಕ್ಕಮಹಾದೇವಿ ಹೇಳಿದ ಸಾಲುಗಳು ಈ ಸಂದರ್ಭದಲ್ಲಿ ನೆನಪಾಗುತ್ತವೆ: ‘ನಾಮದಲ್ಲಿ ಹೆಂಗಸಾದರೇನು ಭಾವಿಸಲು ಗಂಡು ರೂಪು’. ಹೆಣ್ಣನ್ನು ಕೇವಲ ದೇಹವಾಗಿ ಅವಳ ವ್ಯಕ್ತಿತ್ವದ ಇತರ ಆಯಾಮಗಳ ಇರುವಿಕೆಯನ್ನು ಗುರುತಿಸದ ಸಮಾಜಕ್ಕೆ ಒಂದು ಬಗೆಯ ಉತ್ತರವಾಗಿ ಇದನ್ನು ಗ್ರಹಿಸಬಹುದೇನೊ.
ಹೆಣ್ಣುಮಕ್ಕಳ ಅಕ್ರಮ ಸಾಗಣೆ, ನಂತರದ ಲೈಂಗಿಕ ಹಿಂಸಾಚಾರಗಳನ್ನು ಚಿತ್ರದಲ್ಲಿ ಪರಿಣಾಮಕಾರಿಯಾಗಿ ಕಟ್ಟಿಕೊಡಲಾಗಿದೆ. ಬಲವಂತವಾಗಿ ಬಟ್ಟೆ ಬಿಚ್ಚಿಸುವುದು, ಅತ್ಯಾಚಾರ, ಲೈಂಗಿಕ ದುರ್ವರ್ತನೆ, ಪರ ಹಿಂಸೆಯಲ್ಲಿ ವಿಕೃತ ಸಂತೋಷ ಕಾಣುವ (ಸ್ಯಾಡಿಸಂ) ದೃಶ್ಯಗಳು ಚಿತ್ರದಲ್ಲಿವೆ. ಪ್ರದೀಪ್ ಸರ್ಕಾರ್ ನಿರ್ದೇಶನದ ಈ ಚಿತ್ರದಲ್ಲಿನ ವಿಲನ್ ಮಾಮೂಲಿ ಸಿನಿಮಾಗಳ ವಿಲನ್ನಂತೆ ಚಿತ್ರವಿಚಿತ್ರ ಹಾವಭಾವಗಳನ್ನು ಪ್ರದರ್ಶಿಸುತ್ತಾ ಗಹಿಗಹಿಸಿ ನಗುವುದಿಲ್ಲ. ಆತ ಸಾಮಾಜಿಕ ನಡಾವಳಿಗಳನ್ನು ಅರಿತಂತಹ ಪಕ್ಕಾ ಜಂಟಲ್ಮ್ಯಾನ್. ಸೊಗಸಾಗಿ ಇಂಗ್ಲಿಷ್ ಮಾತನಾಡುತ್ತಾ ಕಂಪ್ಯೂಟರ್ನಲ್ಲಿ ಥ್ರಿಲ್ಲರ್ ಗೇಮ್ಸ್ ಗಳಾಡುತ್ತಾ ಕೂರುವ ಪಕ್ಕದ ಮನೆಯ ಹುಡುಗನಂತೆ (ತಹೀರ್ ಭಾಸಿನ್) ಚಿತ್ರಿಸಲಾಗಿದೆ.
ಮಾನವ ಅಕ್ರಮ ಸಾಗಣೆ ನಿಯಂತ್ರಣಕ್ಕಾಗಿ ಈಗ ‘ಮರ್ದಾನಿ’ ಚಿತ್ರದಿಂದ ಬಿಹಾರ ಪೊಲೀಸರು ಸ್ಫೂರ್ತಿ ಪಡೆಯಲು ಮುಂದಾಗಿರುವುದು ವಿಶೇಷ. ‘ಬಿಹಾರದಲ್ಲಿ ಮಾನವ ಅಕ್ರಮ ಸಾಗಣೆ ಜಾಲಗಳನ್ನು ಭೇದಿಸಿದ್ದೇವೆ. ಇಂತಹ ಕಾರ್ಯಾಚರಣೆಗಳನ್ನು ಕೈಗೊಳ್ಳುವಾಗ ಪೊಲೀಸ್ ಸಿಬ್ಬಂದಿ ಅಪಾಯಕಾರಿ ಸನ್ನಿವೇಶಗಳಲ್ಲಿ ಕೆಲಸ ಮಾಡಬೇಕಾಗುತ್ತದೆ. ಆದರೆ ಅದೇ ಸಂದರ್ಭದಲ್ಲಿ ಅವರಿಗೆ ಅತ್ಯುನ್ನತ ಮಟ್ಟದ ಭಾವನೆಗಳು, ಬುದ್ಧಿವಂತಿಕೆ ಹಾಗೂ ದಕ್ಷತೆ ಇರುವುದೂ ಅವಶ್ಯ. ಈ ಚಿತ್ರದಲ್ಲಿ ರಾಣಿ ಮುಖರ್ಜಿಯ ಪಾತ್ರ ಅದಕ್ಕೆ ಉದಾಹರಣೆ’ ಎಂಬುದು ಬಿಹಾರ ರಾಜ್ಯ ಸಿಐಡಿ ಇನ್ಸ್ಪೆಕ್ಟರ್ ಜನರಲ್ (ದುರ್ಬಲ ವರ್ಗ) ಅರವಿಂದ ಪಾಂಡೆ ಅವರ ಅಭಿಮತ. ಮಹಿಳೆ, ಮಕ್ಕಳು ಸೇರಿದಂತೆ ಸಮಾಜದ ದುರ್ಬಲ ವರ್ಗದವರ ವಿರುದ್ಧದ ಅಪರಾಧ ನಿರ್ವಹಣೆಯಲ್ಲಿ ಗಣನೀಯ ಅನುಭವ ಹೊಂದಿರುವ ಪಾಂಡೆ ಅವರು ಮನರಂಜನೆಗಾಗಿ ಸಿನಿಮಾ ನೋಡಲು ಹೋಗಿದ್ದರಂತೆ. ಆದರೆ ಅದು ಕಣ್ತೆರೆಸುವ ಚಿತ್ರವಾಯಿತು ಎಂದು ಹೇಳಿಕೊಂಡಿದ್ದಾರೆ.
‘ಮಾನವ ಅಕ್ರಮ ಸಾಗಣೆಯ ವಿವಿಧ ಆಯಾಮಗಳು ಹಾಗೂ ಅದರ ನಿಯಂತ್ರಣ ಹೇಗೆ’ ಎಂಬುದರ ಕುರಿತಾಗಿ ಆ. 30 ರಿಂದ ಎರಡು ದಿನಗಳ ಕಮ್ಮಟ ನಡೆಸಿ ಬಿಹಾರ ಪೊಲೀಸರಿಗಾಗಿ ಚಿತ್ರವನ್ನೂ ಪ್ರದರ್ಶಿಸಲಾಗಿದೆ. ಮಧ್ಯಪ್ರದೇಶ, ಮಹಾರಾಷ್ಟ್ರ ಹಾಗೂ ಉತ್ತರ ಪ್ರದೇಶದಲ್ಲಿ ಈ ಚಿತ್ರಕ್ಕೆ ತೆರಿಗೆ ವಿನಾಯ್ತಿ ನೀಡಲಾಗಿದೆ.
ವೃದ್ಧ ಅರಬ್ ಷೇಕ್ನೊಡನೆ ಪತ್ನಿ ಎಂಬ ಹೆಸರಿನಲ್ಲಿ ಹೈದರಾಬಾದ್ನಿಂದ ವಿದೇಶಕ್ಕೆ ವಿಮಾನದಲ್ಲಿ ಅಕ್ರಮಸಾಗಣೆಗೊಳಗಾಗುತ್ತಿದ್ದ ಅಮೀನಾ ಎಂಬ 11 ವರ್ಷದ ಬಾಲಕಿಯ ಕಥೆ 1991ರಲ್ಲಿ ಭಾರತದಲ್ಲಿ ದೊಡ್ಡ ಸುದ್ದಿಯಾಗಿತ್ತು. ಆ ವಿಮಾನದ ಗಗನಸಖಿಯೊಬ್ಬರ ಸಮಯಪ್ರಜ್ಞೆಯಿಂದ ಅಮೀನಾ ಪಾರಾಗಿದ್ದಳು. ವಿವಾಹದ ನೆಪದಲ್ಲಿ ಅಕ್ರಮ ಸಾಗಣೆ ಜಾಲದಲ್ಲಿ ಅಮಾಯಕ ಹೆಣ್ಣುಮಕ್ಕಳನ್ನು ಸಿಲುಕಿಸುವುದು ಈಗಲೂ ಮುಂದುವರಿದೇ ಇದೆ. ಉದ್ಯೋಗದ ಆಮಿಷ ಅಥವಾ ಸಿನಿಮಾ ಲೋಕದ ಆಕರ್ಷಣೆಗೊಳಗಾಗಿ ಮನೆ ಬಿಡುವ ಹೆಣ್ಣುಮಕ್ಕಳು ಅಥವಾ ಅಪಹರಣಕ್ಕೊಳಗಾಗುವವರು ರಾಷ್ಟ್ರದ ಲೈಂಗಿಕ ಮಾರುಕಟ್ಟೆಗಳಿಗೆ ಸರಕುಗಳಾಗಿ ಸರಬರಾಜಾಗುವುದು ಕ್ರೂರ ವಾಸ್ತವ.
ಲೈಂಗಿಕ ಶೋಷಣೆ, ಮನೆಗೆಲಸದ ಜೀತ, ಮಾದಕ ವಸ್ತುಗಳ ಸಾಗಣೆ ಚಟುವಟಿಕೆ ಅಥವಾ ಅಂಗಾಂಗ ಕಸಿಗಳಿಗಾಗಿ ಬಳಸಿಕೊಳ್ಳಲು ಅಕ್ರಮ ಮಾನವ ಸಾಗಣೆಗಳು ನಡೆಯುತ್ತವೆ. ಇದು ಗಂಭೀರವಾದ ಪರಿಶೀಲನೆಗೆ ಒಳಗಾಗಬೇಕಿರುವ ಜಾಗತಿಕ ವಿದ್ಯಮಾನ.
ಬಾಂಗ್ಲಾ ದೇಶದ ಮಹಿಳೆಯರು ಹಾಗೂ ಮಕ್ಕಳು ಭಾರತಕ್ಕೆ ಅಕ್ರಮ ಸಾಗಣೆಯಾಗುವುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಹಾಗೆಯೇ ಭಾರತದ ಮೂಲಕ ಪಾಕಿಸ್ತಾನ ಹಾಗೂ ಮಧ್ಯಪ್ರಾಚ್ಯ ರಾಷ್ಟ್ರಗಳಿಗೆ ರವಾನೆಯಾಗುತ್ತಾರೆ. ಇದೇ ರೀತಿ ನೇಪಾಳದಿಂದಲೂ ಮಹಿಳೆಯರು ಹಾಗೂ ಮಕ್ಕಳು ಲೈಂಗಿಕ ಮಾರುಕಟ್ಟೆಗೆ ಅಥವಾ ಇತರ ಜೀತದ ಕೆಲಸಗಳಿಗಾಗಿ ಭಾರತಕ್ಕೆ ಅಕ್ರಮ ಸಾಗಣೆಗೊಳಗಾಗುತ್ತಿದ್ದಾರೆ. ಭಾರತದಲ್ಲೂ ಇಂತಹ ಅಕ್ರಮ ಸಾಗಣೆ ಜಾಲಗಳು ವ್ಯವಸ್ಥಿತವಾಗಿ ಕಾರ್ಯನಿರ್ವಹಿಸುತ್ತಿವೆ. ಕರ್ನಾಟಕದಲ್ಲೂ ಇವೆ.
ಭೂಗತ ಜಗತ್ತಿನ ಮಾಫಿಯಾ, ರಾಜಕಾರಣಿಗಳು ಹಾಗೂ ಅಧಿಕಾರಿಗಳ ಅಪವಿತ್ರ ಮೈತ್ರಿಯಿಂದ ಇಂತಹ ದಂಧೆ ಹಲವು ಕೋಟಿ ರೂಪಾಯಿಗಳ ವಹಿವಾಟಾಗಿದೆ. ಮಾದಕ ವಸ್ತು, ಶಸ್ತ್ರಾಸ್ತ್ರ ಕಳ್ಳ ಸಾಗಣೆಯಂತೆ ಇದೂ ಕೂಡ ದೊಡ್ಡದಾಗಿ ವ್ಯಾಪಿಸಿರುವ ಲಾಭದಾಯಕವಾದ ಅಕ್ರಮ ದಂಧೆಯಾಗಿದೆ. ಮದುವೆ ದಳ್ಳಾಳಿಗಳು, ಹೋಟೆಲ್ ಮಾಲೀಕರು, ಮಕ್ಕಳ ಆಶ್ರಯ ಕೇಂದ್ರಗಳು, ಉದ್ಯೋಗ ಮಾಹಿತಿ ಕೇಂದ್ರಗಳೂ ಈ ಅಕ್ರಮ ಸಾಗಣೆಗಳ ಜಾಲಗಳಲ್ಲಿ ಪಾಲುದಾರರಾಗಿರುವುದು ಸಾಮಾನ್ಯ ಸಂಗತಿ.
ಯೂರೋಪ್, ಅಮೆರಿಕ ಮತ್ತಿತರ ರಾಷ್ಟ್ರಗಳಿಂದ ಲೈಂಗಿಕತೆ ಅರಸಿ ಬರುವಂತಹ ಪ್ರವಾಸಿಗರಿಗೆ ಭಾರತ ಕೂಡ ಲೈಂಗಿಕ ಪ್ರವಾಸೋದ್ಯಮ ತಾಣವಾಗಿದೆ. ಆರ್ಥಿಕ ಉದಾರೀಕರಣ ಹಾಗೂ ಹೆಚ್ಚಿದ ಬಿಸಿನೆಸ್ ಪ್ರವಾಸಗಳು ಇಂತಹ ಉದ್ಯಮದ ಹೆಚ್ಚಳಕ್ಕೆ ಕೊಡುಗೆ ಸಲ್ಲಿಸುತ್ತಿವೆ. ಕೆಂಪು ದೀಪ ಪ್ರದೇಶದ ವೇಶ್ಯಾವಾಟಿಕೆಯಿಂದ ಹೈ ಕ್ಲಾಸ್ ವೇಶ್ಯಾವಾಟಿಕೆಗೆ ಒತ್ತು ಹೆಚ್ಚಾಗಿದೆ.
ಇಂತಹ ಸನ್ನಿವೇಶದಲ್ಲಿ ಮಾನವ ಅಕ್ರಮ ಸಾಗಣೆ ನಿರ್ಬಂಧಕ್ಕೆ ಭಾರತ ಗಣನೀಯ ಕ್ರಮಗಳನ್ನು ಕೈಗೊಂಡಿಲ್ಲ. ಈ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಬೇಕೆಂದು ಸುಪ್ರೀಂ ಕೋರ್ಟ್ ಹಾಗೂ ಹೈಕೋರ್ಟ್ಗಳು ಸರ್ಕಾರಗಳಿಗೆ ಅನೇಕ ಬಾರಿ ನಿರ್ದೇಶನಗಳನ್ನು ನೀಡಿವೆ. ಹೀಗಿದ್ದೂ ನಾಪತ್ತೆಯಾಗುವ ಮಕ್ಕಳ ಪ್ರಕರಣಗಳನ್ನು ಮಾನವ ಅಕ್ರಮ ಸಾಗಣೆ ಸಮಸ್ಯೆಯ ಜೊತೆಗಿಟ್ಟು ನೋಡುವಲ್ಲಿ ಹೆಚ್ಚಿನ ಪ್ರಯತ್ನಗಳಾಗುತ್ತಿಲ್ಲ. 2010ರಲ್ಲಿ ಕಾಣೆಯಾದ ಪ್ರತಿ ಮೂವರು ಮಕ್ಕಳಲ್ಲಿ ಒಬ್ಬರ ಪತ್ತೆ ಅಸಾಧ್ಯವಾಗಿ ಉಳಿದು ಬಿಡುತ್ತಿತ್ತು. ಆದರೆ 2013ರಲ್ಲಿ ಕಾಣೆಯಾದ ಪ್ರತಿ ಇಬ್ಬರು ಮಕ್ಕಳಲ್ಲಿ ಒಂದು ಮಗುವಿನ ಪತ್ತೆ ಪೂರ್ಣ ಅಸಾಧ್ಯವಾಗಿರುತ್ತಿತ್ತು.
ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೊ ಪ್ರಕಾರ 2012ರಲ್ಲಿ ರಾಷ್ಟ್ರದಲ್ಲಿ 65,038 ಮಕ್ಕಳು ನಾಪತ್ತೆಯಾಗಿದ್ದಾರೆ. ಸಂಘಟಿತವಾಗಿ ನಡೆಯುತ್ತಿರುವ ಈ ಅಪರಾಧದ ನಿರ್ವಹಣೆಗೆ ಸದ್ಯದ ಕಾನೂನಿನ ಚೌಕಟ್ಟು ದುರ್ಬಲವಾಗಿದೆ. ಕಾನೂನಿನ ಕೈಯಿಂದ ನುಸುಳಿಕೊಳ್ಳುವುದು ಎಷ್ಟೊಂದು ಸುಲಭ ಎಂಬುದನ್ನು ‘ಮರ್ದಾನಿ’ ಚಿತ್ರದಲ್ಲೂ ಪ್ರಸ್ತಾಪಿಸಲಾಗಿದೆ. ಹೀಗಾಗಿ ‘ಸಾರ್ವಜನಿಕ ಆಕ್ರೋಶ’ದಲ್ಲಿ ನ್ಯಾಯ ಕಂಡುಕೊಳ್ಳುವ ವಿಚಾರವನ್ನು ಚಿತ್ರದಲ್ಲಿ ಅತಿರಂಜಿತಗೊಳಿಸಲಾಗಿದೆ. ಆರಂಭದಿಂದಲೂ ವಿಭಿನ್ನ ನಿರೂಪಣೆಯಲ್ಲಿ ಸಾಗುವ ಚಿತ್ರ ಕ್ಲೈಮ್ಯಾಕ್ಸ್ ನಲ್ಲಿ ಜನಪ್ರಿಯ ಶೈಲಿಯ ಹಾದಿ ಹಿಡಿದಿದ್ದು ಅಸಂಗತ.
ಪೊಲೀಸ್ ಬಲದಲ್ಲಿ ಹೆಚ್ಚಿನ ಮಹಿಳೆಯರ ಸೇರ್ಪಡೆಯಿಂದ ಹೆಣ್ಣುಮಕ್ಕಳ ಅಕ್ರಮ ಸಾಗಣೆ ಅಪರಾಧಗಳಿಗೆ ಕಡಿವಾಣ ಬೀಳಬಹುದೆ? ಮಹಿಳೆಯರ ವಿರುದ್ಧದ ಅಪರಾಧ ಪ್ರಕರಣಗಳು ಹೆಚ್ಚುತ್ತಿರುವ ಸದ್ಯದ ಪರಿಸರದಲ್ಲಿ ಖಾಕಿಧಾರಿ ಮಹಿಳೆಯರು ಸಮಾಜಕ್ಕೆ ಸಕಾರಾತ್ಮಕ ಸಂದೇಶ ರವಾನಿಸುವುದು ಸಾಧ್ಯವಿದೆ ಎಂಬಂಥ ಅಭಿಪ್ರಾಯಗಳು ಈ ಚಿತ್ರ ವೀಕ್ಷಣೆಯ ನಂತರ ವ್ಯಕ್ತವಾಗಿವೆ. ಗುಜರಾತ್ ಹಾಗೂ ಮಹಾರಾಷ್ಟ್ರ ಗಳಲ್ಲಿ ಪೊಲೀಸ್ ವ್ಯವಸ್ಥೆಯಲ್ಲಿ ಮಹಿಳೆಯರಿಗೆ ಈಗಾಗಲೇ ಶೇ 33ರಷ್ಟು ಮೀಸಲಾತಿಯನ್ನೇನೊ ನೀಡಲಾಗಿದೆ. ಆದರೆ ಈ ಮೀಸಲಾತಿ ಹುದ್ದೆಗಳನ್ನು ಪೂರ್ಣ ಪ್ರಮಾಣದಲ್ಲಿ ಭರ್ತಿಮಾಡಲಾಗಿಲ್ಲ .
ದೆಹಲಿ ವಿದ್ಯಾರ್ಥಿನಿಯ ಮೇಲಿನ ಅತ್ಯಾಚಾರ ಹಾಗೂ ನಂತರ ಆಕೆಯ ಸಾವು, ಮಹಿಳೆ ವಿರುದ್ಧದ ಹಿಂಸಾಚಾರಗಳನ್ನು ಕುರಿತಂತೆ ರಾಷ್ಟ್ರೀಯ ವಾಗ್ವಾದದ ಕಿಡಿ ಹೊತ್ತಿಸಿತು. ಇಂತಹ ಸಂದರ್ಭದಲ್ಲಿ ತಮ್ಮನ್ನು ತಾವು ಪ್ರತಿಪಾದಿಸಿಕೊಳ್ಳುವಂತಹ ನಾಯಕಿ ಪ್ರಧಾನ ಕಥೆಗಳಿರುವ ಚಿತ್ರಗಳು ಮುಖ್ಯವಾಹಿನಿ ಚಿತ್ರರಂಗದಲ್ಲಿ ಬರುತ್ತಿರುವುದು ಸಮಾಜದ ಆಶಯಗಳಿಗೆ ಸಹಜ ಸ್ಪಂದನವೇ ಆಗಿದೆ.
ನಿಶ್ಚಿತಾರ್ಥವಾಗಿದ್ದ ಹುಡುಗ ‘ಮದುವೆಯಾಗಲು ಸಾಧ್ಯವಿಲ್ಲ’ ಎಂದು ಕಡೆಗಳಿಗೆಯಲ್ಲಿ ಮದುವೆಯನ್ನು ರದ್ದು ಮಾಡಿದಾಗ ‘ಕ್ವೀನ್’ ಚಿತ್ರದ ರಾಣಿ ಎದೆಗುಂದುವುದಿಲ್ಲ. ಬದಲಿಗೆ ವಿದೇಶದಲ್ಲಿ ನಿಗದಿಯಾಗಿದ್ದ ಮಧುಚಂದ್ರ ಪ್ರವಾಸಕ್ಕೆ ಅಪ್ಪ–ಅಮ್ಮನನ್ನು ಒಪ್ಪಿಸಿ ತಾನೊಬ್ಬಳೇ ತೆರಳುತ್ತಾಳೆ. ಬದುಕಿನ ಖುಷಿಯನ್ನು ಉಣ್ಣುವುದರ ಜೊತೆಗೆ ಕಟು ವಾಸ್ತವಗಳನ್ನು ಕಣ್ಣಾರೆ ಕಾಣುತ್ತಾಳೆ. ಇಂತಹ ಬೆಳವಣಿಗೆ ನಿರೀಕ್ಷಿಸಿರದ ಹುಡುಗ ತಪ್ಪಾಯಿತೆಂದು ಪ್ರೇಮ ಯಾಚಿಸಿ ಬಂದಾಗ, ನಿರಾಕರಿಸುವ ದಿಟ್ಟತನ ಮೆರೆದು ಹೊಸ ಹೆಣ್ಣಿನ ಆಗಮನವನ್ನು ಧ್ವನಿಸಿದ್ದಳು.
ಸಾಮಾನ್ಯವಾಗಿ ಯಶಸ್ವಿ ಪುರುಷನ ಹಿಂದೆ ಮಹಿಳೆಯೊಬ್ಬಳು ಇರುತ್ತಾಳೆ. ಹಾಗೆಯೇ ‘ಮರ್ದಾನಿ’ ಹಾಗೂ ‘ಮೇರಿ ಕೋಮ್’ ಚಿತ್ರಗಳ ನಾಯಕಿಯರ ಹಿಂದೆ ನಿಂತು ಪುರುಷ ಸಂಗಾತಿಗಳು ನೀಡುವಂತಹ ಒತ್ತಾಸೆ ಹೃದಯ ತುಂಬುವಂತಹದ್ದು.
ಸಿನಿಮಾ ಸೂತ್ರಗಳು ಹೀಗೆ ಅದಲುಬದಲಾಗಿರುವುದು ಈ ಚಿತ್ರಗಳಲ್ಲಿನ ಚಿತ್ರಣಗಳ ಮತ್ತೊಂದು ವಿಶೇಷ. ‘ಮರ್ದಾನಿ’ ಚಿತ್ರದಲ್ಲಿ ಪ್ರತೀಕಾರ ತೀರಿಸಿಕೊಳ್ಳಲು ವಿಲನ್ ಬಯಸಿದಾಗ ಆತ ಪೊಲೀಸ್ ಇನ್ಸ್ಪೆಕ್ಟರ್ ಶಿವಾನಿಯ ವೈದ್ಯ ಪತಿಯನ್ನು (ಜಿಷು ಸೇನ್ ಗುಪ್ತ) ಗುರಿಯಾಗಿಸಿಕೊಳ್ಳುತ್ತಾನೆ. ಹಾಗೆಯೇ ‘ಮೇರಿ ಕೋಮ್’ ಚಿತ್ರದಲ್ಲಿನ ಮೇರಿ ಕೋಮ್ ತನಗಾದ ಅವಮಾನ ಸಹಿಸಿ ಕೂರುವವಳಲ್ಲ. ರೇಗಿಸಿದ ಹುಡುಗರನ್ನು ಅಟ್ಟಾಡಿಸಿ ಹೊಡೆಯಲು ಪ್ರಯತ್ನಿಸುವ ‘ಜಿದ್ದಿ’ನವಳು.
‘ಮನೆಗೆ ಡ್ರಾಪ್ ಮಾಡುತ್ತೀನಿ’ ಎಂದ ನಾಯಕನ ಬೈಕ್ನಲ್ಲಿ ಕೂತು ಮನೆಗೆ ಬರುತ್ತಿರುವಾಗ ನಿರ್ಜನ ಪ್ರದೇಶದಲ್ಲಿ ಬೈಕ್ ಕೆಟ್ಟು ನಿಲ್ಲುತ್ತದೆ. ಆಗ ಆತ ‘ನಾನು ಫುಟ್ ಬಾಲ್ ಕ್ಯಾಪ್ಟನ್. ಮನೆಗೆ ಡ್ರಾಪ್ ಮಾಡುತ್ತಿರುವಾತ ಯಾರೆಂಬುದು ನಿನಗೆ ತಿಳಿದಿರಬೇಕು’ ಎಂದು ಹೇಳಿದಾಗ ಆಕೆ ‘ನನ್ನ ತಂದೆ ಕುಸ್ತಿಪಟು’ ಎನ್ನುತ್ತಾಳೆ, ಜೊತೆಗೆ ‘ಯೂ ಆರ್ ಸೇಫ್ ವಿಥ್ ಮಿ’ ಎಂದು ಹೇಳುವುದು ನಗೆ ಉಕ್ಕಿಸುತ್ತದೆ. ಆದರೆ ಗಂಡು, ಹೆಣ್ಣು ಕುರಿತಾದ ಹೊಸ ದೃಷ್ಟಿಯನ್ನೂ ಇದು ಕಟ್ಟಿಕೊಡುತ್ತದೆ. ‘ವಿವಾಹದ ನಂತರ ಕೆರಿಯರ್ ಸಾಧ್ಯವಾಗುವುದಿಲ್ಲ’ ಎಂದು ಮೇರಿ ಕೋಮ್ ವಿವಾಹವಾಗುವುದನ್ನು ವಿರೋಧಿಸಿದ ಕೋಚ್ ಕಡೆಗೆ ‘ತಾಯ್ತನದ ನಂತರ ನಿನ್ನ ಶಕ್ತಿ ದ್ವಿಗುಣಗೊಂಡಿದೆ’ ಎಂದು ಆಕೆಗೆ ಹುರಿದುಂಬಿಸುತ್ತಾರೆ. ಹಾಗೆಯೇ ಮೇರಿ ಸಾಧನೆಗೆ ಗಂಡನ ಪೂರ್ಣ ಸಹಕಾರ ಸಮಾಜಕ್ಕೆ ಆರೋಗ್ಯಕರ ಸಂದೇಶಗಳನ್ನು ನೀಡುವಂತಹದ್ದು.
ಮಹಿಳಾ ಶಕ್ತಿಯ ಹೊಸ ಆಯಾಮಗಳನ್ನು ತೆರೆದಿಡುವುದಲ್ಲದೆ, ಗಂಡು–ಹೆಣ್ಣಿನ ಸಂಬಂಧಗಳ ಬಗ್ಗೆ ಆರೋಗ್ಯಕರ ವ್ಯಾಖ್ಯೆಗಳನ್ನು ನೀಡುವುದು ಈ ಚಿತ್ರಗಳ ಸಕಾರಾತ್ಮಕ ಸಂದೇಶ. ಯಾವುದೇ ಕ್ಷೇತ್ರದಲ್ಲಾಗಲಿ ಹೆಣ್ಣುಮಕ್ಕಳ ವೃತ್ತಿಪರ ಆಕಾಂಕ್ಷೆಗಳಿಗೆ ಕುಟುಂಬದ ಸದಸ್ಯರು ನೀರೆರೆಯಲು ಇಂತಹ ಚಿತ್ರಗಳು ಪ್ರೇರಣೆಯಾಗ-ಬೇಕು. 80ರ ದಶಕದಲ್ಲಿ ಅನೇಕ ಹೆಣ್ಣುಮಕ್ಕಳು ಐಪಿಎಸ್ ಅಧಿಕಾರಿಗಳಾಗುವ ಕನಸು ಹೊಂದಲು ದೂರದರ್ಶನದಲ್ಲಿ ಪ್ರಸಾರವಾಗುತ್ತಿದ್ದ ‘ಉಡಾನ್’ ಧಾರಾವಾಹಿ ಪ್ರೇರಕವಾಗಿತ್ತು ಎಂಬುದನ್ನು ಮರೆಯಲಾಗದು.
ನಿಮ್ಮ ಅನಿಸಿಕೆ ತಿಳಿಸಿ: editpagefeedback@prajavani.co.in
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.