ಬೆಂಗಳೂರು: ಟೊಮೆಟೊ ಬೆಲೆ ಕುಸಿತದಿಂದಾಗಿ ಕಂಗೆಟ್ಟಿರುವ ರೈತರ ನೆರವಿಗೆ ಧಾವಿಸುವ ಉದ್ದೇಶದಿಂದ ಆನ್‌ಲೈನ್‌ ಮಾರ್ಕೆಟ್‌ ‘ಬಿಗ್‌ಬಾಸ್ಕೆಟ್‌ ಡಾಟ್‌ ಕಾಮ್‌’ ಕೆ.ಜಿ. ಟೊಮೆಟೊಗೆ ₹ 7 ಬೆಂಬಲ ಬೆಲೆ ಘೋಷಿಸಿದೆ.
ಟೊಮೆಟೊ ಬೆಳೆಯುವ ಪ್ರದೇಶಗಳಾದ ಕೋಲಾರ, ಮಾಲೂರು, ಚಿಕ್ಕಬಳ್ಳಾಪುರ ಮೊದಲಾದ ಕಡೆಗಳಲ್ಲಿ ಬಂಪರ್ ಬೆಳೆ ಬಂದಿರುವ ಕಾರಣ ಬೆಂಗಳೂರಿನಲ್ಲಿ ಟೊಮೆಟೊ ಆವಕ ಹೆಚ್ಚಾಗಿದೆ.
ಹೀಗಾಗಿ ಕೆ.ಜಿ. ಟೊಮೆಟೊಗೆ ₹5 ಬೆಲೆ ಇದೆ. ಆದರೆ, ಒಂದು ಕೆ.ಜಿ ಟೊಮೆಟೊ ಬೆಳೆಯಲು ಸುಮಾರು ₹5 ಖರ್ಚು ಮಾಡಬೇಕಿದೆ. ಹೀಗಾಗಿ ಬಿಗ್‌ಬಾಸ್ಕೆಟ್‌ ಡಾಟ್‌ ಕಾಮ್‌ ರೈತರಿಂದ ಕೆ.ಜಿ. ಟೊಮೆಟೊವನ್ನು ₹7ಕ್ಕೆ ಖರೀದಿಸಿ ಗ್ರಾಹಕರಿಗೆ ₹7ಕ್ಕೆ ಮಾರಾಟ ಮಾಡಲಿದೆ ಎಂದು ಸಂಸ್ಥೆಯ ರಾಷ್ಟ್ರೀಯ ಮುಖ್ಯಸ್ಥ ವಿಪುಲ್ ಮಿತ್ತಲ್ ತಿಳಿಸಿದ್ದಾರೆ.
‘ಈಚೆಗೆ ರೈತರೊಂದಿಗೆ ಸಂಪರ್ಕ ಎಂಬ ಕಾರ್ಯಕ್ರಮ ಆರಂಭಿಸಿದ್ದು, ಇದರಿಂದ ರೈತರಿಗೆ ಶೇ 10–15 ರಷ್ಟು ಆದಾಯ ವೃದ್ಧಿಯಾಗಿದೆ. ದೇಶದ ವಿವಿಧ ಭಾಗಗಳಲ್ಲಿ ಸ್ವೀಕೃತಿ ಕೇಂದ್ರಗಳನ್ನು ಸ್ಥಾಪಿಸಿದ್ದು, ಇವುಗಳ ಮೂಲಕವೇ ಶೇ 60 ರಷ್ಟು ಹಣ್ಣು, ತರಕಾರಿಗಳನ್ನು ರೈತರಿಂದ ಪಡೆಯುತ್ತೇವೆ. ಇದರಿಂದ ಮಧ್ಯವರ್ತಿಗಳ ಹಾವಳಿ ತಪ್ಪಿಸಿದಂತಾಗಿದೆ’ ಎಂದು ಹೇಳಿದರು.
