ಕರಾಚಿ (ಪಿಟಿಐ): ಹಿಂದು ಧರ್ಮದ ಯುವತಿಯೊಬ್ಬಳು ಇಸ್ಲಾಂ ಧರ್ಮಕ್ಕೆ ಮತಾಂತರಗೊಂಡು ಬಾಲ್ಯದ ಗೆಳೆಯ ಬಿಲಾಲ್‌ ಖೈಮಾಖನಿಯನ್ನು ಮದುವೆಯಾದ ಅಪರೂಪದ ಘಟನೆ ಪಾಕಿಸ್ತಾನದ ದಕ್ಷಿಣ ಸಿಂಧ್ ಪ್ರಾಂತ್ಯದಲ್ಲಿ ಶನಿವಾರ ನಡೆದಿದೆ.
ಬಾಲ್ಯದ ಗೆಳೆಯನನ್ನು ವರಿಸಲು ಇಚ್ಛಿಸಿದ ಮಗಳಿಗೆ ಗೋವರ್ಧನ್‌ ದಾಸ್‌ ಖತ್ರಿ ಕುಟುಂಬದವರು ಸಮ್ಮತಿ ನೀಡಿದ್ದರು. ಗೋವರ್ಧನ ದಾಸ್‌ ಮತ್ತು ವರನ ಕುಟುಂಬದವರು ಇಲ್ಲಿಯ ಹತುಂಗೊ ಪಟ್ಟಣದ ನೆರೆಯ ನಿವಾಸಿಗಳು. ಹಾಗಾಗಿ ಎರಡೂ ಕುಟುಂಬದ ಮಧ್ಯೆ ಗಾಢವಾದ ಸ್ನೇಹ ಬೆಳೆದಿತ್ತು.
‘ಮಗಳು ಬಾಲ್ಯದ ಸ್ನೇಹಿತನನ್ನು ಮದುವೆಯಾಗುವ ಇಚ್ಛೆ ವ್ಯಕ್ತಪಡಿಸಿದ ನಂತರ ಕುಟುಂಬದ ಎಲ್ಲ ಸದಸ್ಯರನ್ನು ಕರೆದು ಖತ್ರಿ ಮಾತನಾಡಿದರು’ ಎಂದು ಎರಡೂ ಕುಟುಂಬಕ್ಕೆ ಆಪ್ತರಾಗಿರುವ ಅಹಮದ್‌ ಸಂಜರಾನಿ ತಿಳಿಸಿದ್ದಾರೆ.
ಮದುವೆಯ ನಂತರ ಏರ್ಪಡಿಸಲಾಗಿದ್ದ ಔತಣಕೂಟಕ್ಕೆ ಅಪಾರ ಸಂಖ್ಯೆಯಲ್ಲಿ ವಧು–ವರರ ಸ್ನೇಹಿತರು, ಸಂಬಂಧಿಕರು ಬಂದಿದ್ದರು. ಪಾಕಿಸ್ತಾನದಲ್ಲಿ ಹಿಂದು ಯುವತಿಯರನ್ನು ಬಲವಂತವಾಗಿ ಮುಸ್ಲಿಂ ಧರ್ಮಕ್ಕೆ ಮತಾಂತರ ಮಾಡಲಾಗುತ್ತಿವೆ ಎನ್ನುವ ದೂರುಗಳಿವೆ. ಹಿಂದೂ ಜನಪ್ರತಿನಿಧಿಗಳು ಈ ವಿಷಯದ ಬಗ್ಗೆ ಧ್ವನಿ ಎತ್ತಿದ್ದರು.
