ಮೇವಿನ ಸಮರ್ಥ ಬಳಕೆಗಿರಲಿ ಯಂತ್ರ

ಬಹಳಷ್ಟು ಮೇವಿನ ಬೆಳೆಯಲ್ಲಿ ಉದ್ದನೆಯ, ದಪ್ಪನೆಯ ದಂಟು/ಕಾಂಡ ಇರುತ್ತದೆ. ಇದರ ಸಮೇತ ಜಾನುವಾರುಗಳಿಗೆ ಮೇವನ್ನು ನೀಡಿದಾಗ, ದಂಟು/ಕಾಂಡದ ಭಾಗಗಳನ್ನು ಬಿಟ್ಟು ಜಾನುವಾರುಗಳು ಬರೀ ಎಲೆಗಳನ್ನು ತಿನ್ನುವುದೇ ಹೆಚ್ಚು. ಆದ್ದರಿಂದ ಮೇವಿನ ಬೆಳೆಯ ಬಹುತೇಕ ಭಾಗಗಳು ವ್ಯರ್ಥವಾಗುತ್ತವೆ.

ಈ ಸಮಸ್ಯೆಯನ್ನು ನೀಗಿಸುತ್ತಿದೆ ವಿದ್ಯುತ್ ಚಾಲಿತ ಯಂತ್ರ. ಈಗಾಗಲೇ ಕೆಲವು ರೈತರು ಇದನ್ನು ಬಳಸುತ್ತಿದ್ದಾರೆ. ಇದರಲ್ಲಿ  ಮೇವಿನ ಬೆಳೆಯನ್ನು ಒಂದೆರಡು ಅಂಗುಲ ಉದ್ದದ ತುಂಡಗಳಾಗಿ ಕತ್ತರಿಸಲು ಅವಕಾಶ ಇರುವುದು ವಿಶೇಷ. ಜೊತೆಗೆ, ಹಾಕಿದ ಮೇವಿನಲ್ಲಿ ಬಹಳಷ್ಟು ದಂಟಿನ/ಗಟ್ಟಿ ಭಾಗವನ್ನು ಬಿಟ್ಟು ನೇಪಿಯರ್, ಮೆಕ್ಕೆಜೋಳ, ಜೋಳ, ಸಜ್ಜೆ ಮತ್ತಿತರ ಮೇವಿನ ಮೂಲದ ಬೆಳೆಗಳನ್ನು ಸಣ್ಣದಾಗಿ ಕತ್ತರಿಸಲು ಈ ಯಂತ್ರ ಉಪಯುಕ್ತವಾಗುತ್ತವೆ.

ಪಶುಪಾಲನಾ ಇಲಾಖೆಯು ಈ ರೀತಿಯ ಯಂತ್ರಗಳ ಖರೀದಿಗೆ ಸಹಾಯಧನ ನೀಡುತ್ತದೆ. ಸುಮಾರು 20 ಸಾವಿರ ರೂಪಾಯಿ ಬೆಲೆಯ ಮೇವು ಕತ್ತರಿಸುವ ಯಂತ್ರಗಳ ಖರೀದಿಗೆ ಶೇಕಡ 50ರ ರಿಯಾಯಿತಿ ಕೊಡಲಾಗುತ್ತಿದೆ. ಎರಡು ಅಶ್ವಶಕ್ತಿಯ ಮೋಟಾರ್‌ನ ಈ ಯಂತ್ರಗಳಿಂದ ಕೇವಲ 10 ನಿಮಿಷದಲ್ಲಿ 8–10 ರಾಸುಗಳಿಗೆ ಬೇಕಾಗುವಷ್ಟು ಮೇವನ್ನು ಕತ್ತರಿಸಬಹುದು.

ಹಸಿ ಮೇವನ್ನು, ಒಣಮೇವನ್ನು ಸಣ್ಣದಾಗಿ ತುಂಡರಿಸುವುದರಿಂದ, ಕಾಂಡ- ಎಲೆಗಳೂ ಇದರಲ್ಲಿ ಸೇರಿಕೊಳ್ಳುವುದರಿಂದ ಹಾಗೂ ಉಪ್ಪು ಮಿಶ್ರಿತ ನೀರನ್ನು ಎರಚಿ ಕೊಡುವುದರಿಂದ ಜಾನುವಾರುಗಳು ಚೆನ್ನಾಗಿ ತಿನ್ನುತ್ತವೆ. ಜಮೀನುಗಳಲ್ಲಿ ಅಲ್ಲಲ್ಲಿ ಇರುವ ಕಳೆಗಳನ್ನು, ಹುಲ್ಲುಗಳನ್ನು ಬಳಸುವುದೂ ಮೇವಿನ ಅಭಾವವನ್ನು ನೀಗಿಸಲು ನೆರವಾಗುತ್ತದೆ.