‘ಪಾಸಿಬಲ್’ ಮನಸ್ಸಿದ್ದರೆ ಮಾರ್ಗ

ಮನಸ್ಸಿದ್ದರೆ ಏನು ಬೇಕಾದರೂ ಸಾಧಿಸಬಹುದು. ಅದಕ್ಕೆ ಬೇಕಾಗಿರುವುದು ಛಲವಷ್ಟೆ. ಇಂತಹ ಛಲದ ಕಥೆ ಹೊಂದಿರುವ ‘ಪಾಸಿಬಲ್’ ಎಂಬ ಸಿನಿಮಾ ಬರುತ್ತಿದೆ. ಅಂದಹಾಗೆ ಇದು ಲವ್ ಮತ್ತು ಥ್ರಿಲ್ಲರ್ ಕಥಾಹಂದರ ಹೊಂದಿರುವ ಚಿತ್ರ.

‘ತುಂಬಾ ನಿರೀಕ್ಷೆ ಇಟ್ಟುಕೊಂಡು ಚಿತ್ರ ಮಾಡಿದ್ದೇವೆ. ಕಳೆದ ಪ್ರೀತಿಯನ್ನು ತನ್ನ ಛಲದಿಂದ ನಾಯಕ ಮತ್ತೆ ಹೇಗೆ ಪಡೆಯುತ್ತಾನೆ ಎಂಬುದೇ ಚಿತ್ರದ ತಿರುಳು. ಚಿತ್ರದ ಮೊದಲಾರ್ಧ ಪ್ರೀತಿಯ ಪಯಣಕ್ಕೆ ಮೀಸಲಾಗಿದ್ದರೆ, ಉಳಿದಾರ್ಧ ಸಸ್ಪೆನ್ಸ್ – ಥ್ರಿಲ್ಲರ್ ಆಗಿದೆ’ ಎಂದು ಚಿತ್ರದ ಕುರಿತು ನಿರ್ದೇಶಕ ರಾಜು ಹೇಳಿದರು.

ರಾಜು ಅವರ ಮೇಲೆ ನಂಬಿಕೆ ಇಟ್ಟು ಟಿ.ಆರ್‌. ಮಂಜುನಾಥ್ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಮಂಜುನಾಥ್ ಕೆಲ ಕಾಲ ವಿದೇಶದಲ್ಲಿದ್ದವರು. ಕನ್ನಡಾಭಿಮಾನಿಯಾಗಿರುವ ಅವರು ಅಲ್ಲಿದ್ದಾಗಲೇ ಕನ್ನಡ ಚಿತ್ರವೊಂದನ್ನು ನಿರ್ಮಿಸುವ ಕನಸು ಕಂಡಿದ್ದರು. ಅಲ್ಲಿಂದ ವಾಪಸಾದ ಬಳಿಕ ಅವರು ಕೈ ಹಾಕಿದ್ದು ‘ಪಾಸಿಬಲ್‌’ ಚಿತ್ರದ ನಿರ್ಮಾಣಕ್ಕೆ. ‘ಹೊರದೇಶಗಳಲ್ಲಿ ಕೆಲವು ವರ್ಷ ಕಳೆದಿರುವುದರಿಂದ, ಅಲ್ಲಿರುವ ಕನ್ನಡ ಸಂಘಟನೆಗಳ ಪರಿಚಯವೂ ಇದೆ. ಹಾಗಾಗಿ ಚಿತ್ರವನ್ನು ಆಸ್ಟ್ರೇಲಿಯಾ ಮತ್ತು ಲಂಡನ್‌ನಲ್ಲೂ ಬಿಡುಗಡೆ ಮಾಡುವ ಆಲೋಚನೆ ಇದೆ’ ಎಂದರು ಮಂಜುನಾಥ್.

ಕೊಂಚ ನರ್ವಸ್ ಆದಂತೆ ಕಂಡುಬಂದ ನಾಯಕ ನಟ ರಾಜ್‌, ‘ಇದು ನನ್ನ ಮೊದಲ ಸಿನಿಮಾ. ನಾನು ಈ ಚಿತ್ರದಲ್ಲಿ ಪೊಲೀಸ್ ಆಗಬೇಕೆನ್ನುವ ಕನಸು ಹೊತ್ತ ಯುವಕನಾಗಿ ಕಾಣಿಸಿಕೊಂಡಿದ್ದೇನೆ. ಕನಸು ಸಾಕಾರ ಮಾಡಿಕೊಳ್ಳಲು ಹಾತೊರೆಯುವ ನಾಯಕ, ತನಗೆ ಅರಿವಿಲ್ಲದೆ ಕಷ್ಟದಲ್ಲಿ ಸಿಲುಕಿಕೊಳ್ಳುತ್ತಾನೆ. ಕಷ್ಟದ ಜತೆಗೆ ಪ್ರೀತಿಯನ್ನೂ ಜಯಿಸುವ ಪಾತ್ರ ಇದಾಗಿದೆ’ ಎಂದು ತಮ್ಮ ಪಾತ್ರವನ್ನು ಪರಿಚಯಿಸಿಕೊಂಡರು.