ಸಂಸದೀಯ ಕಾರ್ಯದರ್ಶಿಗಳ ನೇಮಕ ರದ್ದು

ಕೇಜ್ರಿವಾಲ್‌ಗೆ ಪ್ರತಿಭಟನಾಕಾರರ ಮುತ್ತಿಗೆನವದೆಹಲಿ/ಲೂಧಿಯಾನ: ಚುನಾವಣಾ ಪ್ರಚಾರಕ್ಕೆ ಚಾಲನೆ ನೀಡಲು ಪಂಜಾಬ್‌ಗೆ ನಾಲ್ಕು ದಿನಗಳ ಪ್ರವಾಸಕ್ಕೆ ಹೊರಟ ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರಿಗೆ ದೆಹಲಿ ರೈಲ್ವೆ ನಿಲ್ದಾಣದಲ್ಲಿ ಪ್ರತಿಭಟನಾಕಾರರು ಗುರುವಾರ ಅಡ್ಡಿಪಡಿಸಿದ ಘಟನೆ ನಡೆಯಿತು.

ಇತ್ತೀಚೆಗೆ ಕೆಲವು ಎಎಪಿ ಶಾಸಕರು ತೋರಿದ ಕೆಟ್ಟ ನಡವಳಿಕೆ ಖಂಡಿಸಿ ಬಿಜೆಪಿ, ಅಕಾಲಿದಳ ಹಾಗೂ ಕಾಂಗ್ರೆಸ್ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದರು. ಬಿಜೆಪಿ ದೆಹಲಿ ಮಹಿಳಾ ಘಟಕದ  ಅಧ್ಯಕ್ಷೆ ಕಮಲ್‌ಜೀತ್ ಸೆರಾವತ್ ಹಾಗೂ ಪಕ್ಷದ ವಕ್ತಾರ ಪ್ರವೀಣ್ ಕಪೂರ್ ನೇತೃತ್ವದ ತಂಡವು ಬೆಳಗ್ಗೆ 7 ಗಂಟೆಗೆ ಪ್ಲಾಟ್‌ ಫಾರಂ 1ಕ್ಕೆ ಬಂದ ಕೇಜ್ರಿವಾಲ್ ವಿರುದ್ಧ ಘೋಷಣೆಗಳನ್ನು ಕೂಗಿ, ಬಳೆಗಳನ್ನು ಪ್ರದರ್ಶಿಸಿತು.

ಪೊಲೀಸರ ಜತೆ ಪ್ರತಿಭಟನಾಕಾರರು ಸಂಘರ್ಷಕ್ಕೆ ಇಳಿದರು. ಇದರಿಂದ ಕೇಜ್ರಿವಾಲ್ ಕೆಲಕಾಲ ಗೊಂದಲಕ್ಕೆ ಈಡಾದರು. ಕಳಂಕಿತ ಎಎಪಿ ಶಾಸಕರ ಕುರಿತು ಕೇಜ್ರಿವಾಲ್ ಮಾತಾಡಬೇಕು ಎಂಬುದು ಪ್ರತಿಭಟನಾಕಾರರ ಬೇಡಿಕೆಯಾಗಿತ್ತು. ಲೈಂಗಿಕ ಹಗರಣ ಆರೋಪದಡಿ ವಜಾಗೊಂಡಿರುವ ಮಾಜಿ ಸಚಿವ ಸಂದೀಪ್ ಕುಮಾರ್ ಅವರನ್ನು ಬೆಂಬಲಿಸಿರುವ ಅಶುತೋಷ್ ಅವರ ಉಚ್ಚಾಟನೆಗೂ ಆಗ್ರಹಿಸಲಾಯಿತು.

ಹಲ್ಲೆ ಆರೋಪ: ಪ್ರತಿಭಟನೆ ವೇಳೆ ಬಿಜೆಪಿ ಮಹಿಳಾ ಕಾರ್ಯಕರ್ತರು ಮುಖ್ಯಮಂತ್ರಿ ಮೇಲೆ ಹಲ್ಲೆ ನಡೆಸಲು ಪ್ರಧಾನಿ ನರೇಂದ್ರ ಮೋದಿ ಹಾಗೂ ದೆಹಲಿ ಪೊಲೀಸರ ಕುಮ್ಮಕ್ಕು ಕಾರಣ ಎಂದು ಎಎಪಿ ಆರೋಪಿಸಿದೆ. ಪೂರ್ವ ನಿಯೋಜಿತವಾದ ಈ ಘಟನೆಯಲ್ಲಿ ಕಾನೂನು ಜಾರಿ ಘಟಕವು ಮೂಕ ಪ್ರೇಕ್ಷಕವಾಗಿತ್ತು ಎಂದಿದೆ.

ಹಲ್ಲೆ ಆರೋಪವನ್ನು ಅಲ್ಲಗಳೆದಿರುವ ಬಿಜೆಪಿ, ಇದೊಂದು ರಾಜಕೀಯ ಪ್ರತಿಭಟನೆ ಎಂದು ಸ್ಪಷ್ಟಪಡಿಸಿದೆ. ‘ಪ್ರತಿಭಟನೆಗಳನ್ನು ದಾಳಿ ಎಂಬುದಾಗಿ ಅರ್ಥೈಸುವುದು ನಾಚಿಕೆಗೇಡು’ ಎಂದು ಕಪೂರ್ ಹೇಳಿದರು.

ಲೂಧಿಯಾನದಲ್ಲೂ  ಪ್ರತಿಭಟನೆ  ಬಿಸಿ: ದೆಹಲಿ–ಲೂಧಿಯಾನ–ಅಮೃತಸರ ಮಾರ್ಗದ ಶತಾಬ್ದಿ ರೈಲಿನಲ್ಲಿ ಲೂಧಿಯಾನಕ್ಕೆ ಬಂದಿಳಿದ ಕೇಜ್ರಿವಾಲ್ ಅವರಿಗೆ ಇಲ್ಲಿಯೂ ಪ್ರತಿಭಟನೆ ಎದುರಾಯಿತು. ಶಿರೋಮಣಿ ಅಕಾಲಿದಳದ ಯುವ ಘಟಕ ಹಾಗೂ ಕಾಂಗ್ರೆಸ್‌ನ ಮಹಿಳಾ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದರು.

ಎಎಪಿ ಸರ್ಕಾರವು ಎಲ್ಲ ರಂಗದಲ್ಲಿ ವಿಫಲವಾಗಿದೆ ಎಂದು ಆರೋಪಿಸಿದ ಅಕಾಲಿದಳ ಕಾರ್ಯಕರ್ತರು ಕೇಜ್ರಿವಾಲ್ ಅವರಿಗೆ ಬಳೆಗಳನ್ನು ನೀಡಲು ಯತ್ನಿಸಿದರು.