ಬೇಡದ ಕೂದಲಿಗೆ ಬೇಕಾದ ಚಿಕಿತ್ಸೆ

ಹುಣ್ಣಿನ ಸಮಸ್ಯೆ ಇರುವ ಬಗ್ಗೆ ಪರಿಶೀಲಿಸುತ್ತಾರೆ. ಇಂಥ ಹುಣ್ಣು ಕಂಡು ಬರುವುದು ಅಪರೂಪ. ಇಂಥ ಪ್ರಕರಣಗಳಲ್ಲಿ ವೈದ್ಯರು ಈ ಬಗ್ಗೆ ರೋಗಿಗಳಿಗೆ ವಿವರವಾಗಿ ತಿಳಿ ಹೇಳುತ್ತಾರೆ.

ಬೇಡದ ಕೂದಲಿನ ಚಿಕಿತ್ಸೆ ಹೇಗೆ?
ಹಿರುಟಿಸಂ ಸಮಸ್ಯೆ ಗಂಭೀರವಾಗಿಲ್ಲ – ಹಾರ್ಮೋನ್‌ ವೈಪರಿತ್ಯ ಗೋಚರಿಸದಿದ್ದರೆ ಚಿಕಿತ್ಸೆ ಬೇಡ, ಶೇವಿಂಗ್‌ ಅಥವಾ ಎಲೆಕ್ಟ್ರೋಲಿಸಿಸ್‌ನಂಥ ತಾತ್ಕಾಲಿಕ ಸ್ಥಳೀಯ ಉಪಶಮನ ಸಾಕು ಎನಿಸಬಹುದು.

ಶೇವಿಂಗ್‌ನಿಂದ ಕೂದಲು ಬೆಳೆಯುವ ಪ್ರಮಾಣ ಹೆಚ್ಚುತ್ತದೆ ಎಂಬುದನ್ನು ಪುಷ್ಟೀಕರಿಸಲು ಯಾವುದೇ ಆಧಾರವಿಲ್ಲ. ಆದರೆ ಕೂದಲು ಕಿತ್ತುಕೊಳ್ಳುವುದನ್ನು ಮಾತ್ರ ನಿಲ್ಲಿಸಬೇಕು. ಹೀಗೆ ಮಾಡುವುದರಿಂದ ಕೂದಲು ಬೆಳವಣಿಗೆಯ ಹೊಸ ಆವೃತ್ತಿಗೆ ಚಾಲನೆ ಸಿಕ್ಕಂತೆ ಆಗುತ್ತದೆ.

ಇಂಥ ಕೆಲವು ಸಾಧ್ಯತೆಗಳನ್ನು ಪರಿಶೀಲಿಸಿದ ನಂತರವೂ ನಿಮಗೆ ನೆಮ್ಮದಿ ಸಿಗದಿದ್ದರೆ ಔಷಧ ತೆಗೆದುಕೊಳ್ಳಲು ಮನಸ್ಸುಮಾಡಬಹುದು. ಆದರೆ, ಇಂಥ ಯಾವುದೇ ಚಿಕಿತ್ಸೆ ಆರಂಭಿಸುವ ಮೊದಲು ಅದರಿಂದ ನಿಮಗೆ ಆಗುವ ಲಾಭ ಮತ್ತು ಎದುರಿಸಬೇಕಾದ ಆಪತ್ತಿನ ಲೆಕ್ಕಾಚಾರ ಹಾಕಬೇಕಾಗುತ್ತದೆ.

ಹಿರುಟಿಸಂ ಸಮಸ್ಯೆ ಮೇಲೆ ಯಾವುದೇ ಔಷಧಿ ಪರಿಣಾಮ ತೋರಲು ಕನಿಷ್ಠ ಮೂರು ತಿಂಗಳು ಬೇಕು. ಇದು ಕೂದಲಿನ ಸಾಮಾನ್ಯ ಅವೃತ್ತಿ. ಔಷಧಿ ತೆಗೆದುಕೊಳ್ಳುವುದು ನಿಲ್ಲಿಸಿದ ತಕ್ಷಣ ಹಿರುಟಿಸಂ ಮರುಕಳಿಸುತ್ತದೆ. ಹೀಗಾಗಿ ವೈದ್ಯರು ಸೂಚಿಸುವವರೆಗೆ ಔಷಧಸೇವನೆ ನಿಲ್ಲಿಸಬಾರದು.

ಇಂಥ ಸಂದರ್ಭದಲ್ಲಿ ಟೆಸ್ಟೊಸ್ಟ್‌ರೋನ್ ಚಟುವಟಿಕೆ ಸ್ಥಗಿತಗೊಳಿಸುವ ಎರಡು ವಿಧದ ಚಿಕಿತ್ಸೆಯನ್ನು ವೈದ್ಯರು ನೀಡುತ್ತಾರೆ. ಸೈಪ್ರೊಟೆರೋನ್ ಅಕ್ಟೇಟ್‌ (Cyproterone acetate) ಅಥವಾ ಸ್ಪೈರೊನೊಲ್ಯಾಕ್ಟೋನ್ (Spirono*actone) ಬಳಕೆ ಶೇ. 80ರಷ್ಟು ರೋಗಿಗಳಲ್ಲಿ ಯಶಸ್ವಿಯಾಗಿದೆ. ಈ ಔಷಧಗಳ ಅಡ್ಡಪರಿಣಾಮಗಳು ಕಡಿಮೆ.

ಇಂಥ ಚಿಕಿತ್ಸೆ ತೆಗೆದುಕೊಳ್ಳುವಾಗ ನೀವು ಗರ್ಭ ಧರಿಸದಂತೆ ಎಚ್ಚರ ವಹಿಸಬೇಕು. ಏಕೆಂದರೆ ಈ ಔಷಧಗಳು ಗರ್ಭದಲ್ಲಿರುವ ಮಗುವಿನ ಆರೋಗ್ಯದ ಮೇಲೆ ಅಡ್ಡ ಪರಿಣಾಮ ಬೀರುತ್ತವೆ.

ಹೊಸ ಕಾಲದ ಸೌಂದರ್ಯವರ್ಧಕ ಚಿಕಿತ್ಸೆಯು ಕೂದಲಿನ ಕೋಶವನ್ನೇ ಕೊಲ್ಲುವ ತಂತ್ರ ಅನುಸರಿಸುತ್ತದೆ. ಈಚೆಗೆ ಇದು ಹೆಚ್ಚು ಜನಪ್ರಿಯವೂ ಆಗುತ್ತಿದೆ. ಲೇಸರ್‌ ಕೇಶಹರಣವು ಕ್ಷಿಪ್ರ, ನೋವುರಹಿತ, ಪರಿಣಾಮಕಾರಿ ಮತ್ತು (ಅನೇಕ ಸಂದರ್ಭಗಳಲ್ಲಿ) ಶಾಶ್ವತ ಪರಿಹಾರ.

ರೂಬಿ ಲೇಸರ್‌ ಕೆಂಪುಕಿರಣಗಳನ್ನು ಉತ್ಪತ್ತಿ ಮಾಡುತ್ತದೆ. ಇದನ್ನು ಕೂಲಿನ ಮೆಲನಿನ್‌ ಹೀರಿಕೊಳ್ಳುತ್ತದೆ. ಸ್ವಲ್ಪ ಪ್ರಮಾಣ ಚರ್ಮಕ್ಕೂ ಸೇರುತ್ತದೆ. ಕಿರಣಗಳು ಕೂದಲನ್ನು ನಿರ್ದಿಷ್ಟವಾಗಿ ಕೇಂದ್ರೀಕರಿಸುತ್ತವೆ. ಕೇಶಕೋಶದ ಸುತ್ತಲಿನ ಚರ್ಮಕ್ಕೆ ಘಾಸಿ ಮಾಡದೇ ಕೂದಲನ್ನು ನಾಶಪಡಿಸುತ್ತವೆ.
ಹಿರುಟಿಸಂ ಗರ್ಭಧಾರಣ ಸಾಮರ್ಥ್ಯವನ್ನು ಕುಂದಿಸುವುದೇ?

ಇಡಿಯೋಪತಿಕ್ ಹಿರುಟಿಸಂ ಇರುವ ರೋಗಿಗಳಲ್ಲಿ ಗರ್ಭಧಾರಣ ಸಾಮರ್ಥ್ಯ ಸಾಮಾನ್ಯ ಮಟ್ಟದಲ್ಲಿಯೇ ಇರುತ್ತದೆ. ಪುರುಷ ಹಾರ್ಮೋನ್‌ಗಳು ಹೆಚ್ಚಿನ ಪ್ರಮಾಣದಲ್ಲಿ ಸ್ರವಿಸುತ್ತಿದ್ದರೆ, ಮುಖ್ಯವಾಗಿ ಮುಟ್ಟು ಅನಿಯಮಿತವಾಗಿದ್ದರೆ; ಅದು ಗರ್ಭಧಾರಣ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತದೆ.

ಮೇಲೆ ಉಲ್ಲೇಖಿಸಿದ ಎರಡು ಔಷಧಿಗಳ ಪೈಕಿ ಯಾವುದನ್ನು ತೆಗೆದುಕೊಳ್ಳುತ್ತಿದ್ದರೂ ಗರ್ಭಧರಿಸುವ ಆಸೆಯನ್ನು ಮುಂದಕ್ಕೆ ಹಾಕಬೇಕು ಅಥವಾ ಔಷಧ ಸೇವನೆಯನ್ನು ನಿಲ್ಲಿಸಬೇಕು.

ಪುರುಷ ಹಾರ್ಮೋನ್‌ಗಳ ವಿಪರೀತ ಸ್ರವಿಸುವಿಕೆ (Po*ycystic ovarian syndrome)
ಸ್ತ್ರೀದೇಹದಲ್ಲಿ ಪುರುಷರ ಶರೀರದಲ್ಲಿ ಸ್ರವಿಸುವಷ್ಟೇ ಪ್ರಮಾಣದಲ್ಲಿ ಪುರುಷ ಹಾರ್ಮೋನ್‌ಗಳು ಸ್ರವಿಸುವುದನ್ನು ಪಾಲಿಸೈಸ್ಟಿಕ್‌ ಓವರಿಯನ್ ಸಿಡ್ರೋಮ್‌ (ಪಿಸಿಒಎಸ್) ಎನ್ನುತ್ತಾರೆ.

ತಾಯಿಯಾಗುವ ಆಸೆಗೆ ಅಡ್ಡಿಯಾಗುವ ಅತಿಮುಖ್ಯ ಅಂಶ ಇದು. ಇದರಿಂದ ಅಂಡಾಶಯದಲ್ಲಿ ಸಣ್ಣಸಣ್ಣ ಕೋಶಗಳು ಬೆಳೆಯುತ್ತವೆ. ಇವು ಪುರುಷ ಹಾರ್ಮೋನ್‌ಗಳ ವಿಪರೀತ ಸ್ರವಿಸುವಿಕೆಗೆ ಕಾರಣವಾಗುತ್ತವೆ.

ಹಾರ್ಮೋನ್ ವೈಪರಿತ್ಯದಿಂದಾಗಿ ಶೇ. 5ರಿಂದ 10ರಷ್ಟು ಮಹಿಳೆಯರಲ್ಲಿ ತೊಂದರೆ ಕಂಡು ಬರುತ್ತದೆ. ಮಹಿಳೆಯರಲ್ಲಿ ಕೆಳಗೆ ವಿವರಿಸಿದ ಮೂರು ಲಕ್ಷಣಗಳ ಪೈಕಿ ಯಾವುದೇ ಎರಡು ಲಕ್ಷಣಗಳು ಕಾಣಿಸಿಕೊಂಡರೆ ಪಿಸಿಒಎಸ್‌ ಸಮಸ್ಯೆ ಇದೆ ಎಂದು ವೈದ್ಯರು ನಿರ್ಧರಿಸುತ್ತಾರೆ.

1) ನಿಯಮಿತವಾಗಿ (ಪ್ರತಿ ತಿಂಗಳು) ಅಂಡಾಶಯದಿಂದ ಅಂಡವನ್ನು ಬಿಡುಗಡೆ ಮಾಡುವ ಸಾಮರ್ಥ್ಯ ಕಳೆದುಕೊಳ್ಳುವುದು.

2) ದೇಹದ ಮಧ್ಯಭಾಗದಲ್ಲಿ ಕೂದಲು ಬೆಳೆಯುವುದು ಅಥವಾ ಪುರುಷ ಹಾರ್ಮೋನ್ ಪ್ರಮಾಣ ಹೆಚ್ಚಾಗುವುದು.

3) ಅಲ್ಟ್ರಾಸೌಂಡ್‌ ಸ್ಕ್ಯಾನಿಂಗ್‌ ವರದಿಯಲ್ಲಿ ಅಂಡಾಶಯದ ಸುತ್ತ ಹುಣ್ಣುಗಳು ಗೋಚರಿಸುವುದು.

ಪಿಸಿಒಎಸ್‌ ಕಾಯಿಲೆಯನ್ನು ನಿರ್ದಿಷ್ಟವಾಗಿ ಪತ್ತೆ ಹಚ್ಚಲು ಕ್ಲಿನಿಕಲ್, ಅಲ್ಟ್ರಾಸೌಂಡ್ ಮತ್ತು ಪ್ರಯೋಗಾಲಯ ಪರೀಕ್ಷೆಗಳು ಅಗತ್ಯ.

ಅಂಡಾಶಯವು ಆ್ಯಂಡ್ರೋಜೀನ್‌ಗಳನ್ನು ಹೆಚ್ಚುವರಿಯಾಗಿ ಬಿಡುಗಡೆ ಮಾಡಲು ಕಾರಣವಾಗುವ ಹಾರ್ಮೋನ್ ವೈಪರಿತ್ಯದ ಸ್ಥಿತಿಗೆ ಪಿಸಿಒಎಸ್ ಕಾರಣವಾಗುತ್ತದೆ. ಹಿರುಟಿಸಂಗೂ ಇದು ಸಾಮಾನ್ಯ ಕಾರಣ ಎನಿಸಿದೆ.

ಪಿಸಿಒಎಸ್‌ನಿಂದ ಬಳಲುವ ರೋಗಿಗಳಲ್ಲಿ ಹೆಚ್ಚುವರಿ ಸಣ್ಣ ಕೋಶಗಳು ಅಂಡಾಶಯದಲ್ಲಿ ಬೆಳೆಯುತ್ತವೆ. ಹೀಗಾಗಿಯೇ ಇದನ್ನು ‘ಪಾಲಿಸಿಸ್ಟಿಕ್’ (ಹಲವು ಗಂಟುಗಳು) ಎನ್ನುತ್ತಾರೆ. ಈ ಸಣ್ಣ ಗಂಟುಗಳು ವಾಸ್ತವವಾಗಿ ಅಂಡಾಶಯದ ಪ್ರೌಢಾವಸ್ಥೆಗೆ ತಲುಪದ ಕೋಶಗಳೇ ಆಗಿವೆ. ಇವು ಪ್ರೌಢಾವಸ್ಥೆ ತಲುಪಿ ಅಂಡಾಶಯದಿಂದ ಹೊರಗೆ ಬಂದಿರುವುದಿಲ್ಲ.

ಅನೇಕ ಸಣ್ಣ ಕೋಶಗಳು ಗಂಟುಗಳಾಗುವ ಕಾರಣ ಅಂಡಾಶಯ ಹಿಗ್ಗಿದಂತೆ ಕಾಣಬಹುದು. ಋತುಚಕ್ರದ ಸಂದರ್ಭ ವಿಪರೀತ ಅಥವಾ ಅತಿ ಕಡಿಮೆ ಸ್ರಾವವೂ ಪಿಸಿಒಎಸ್‌ನ ಲಕ್ಷಣ ಇರಬಹುದು.

ಅಂಡಾಣು ಬಿಡುಗಡೆಯಾಗದಿರುವುದು ಮತ್ತು ಗರ್ಭ ಕಟ್ಟದಿರುವುದಕ್ಕೆ ಪಿಸಿಒಎಸ್‌ ಕಾರಣವಾಗಬಹುದು. ಶೇ. 50ರಷ್ಟು ಪಿಸಿಒಎಸ್ ರೋಗಿಗಳು ವಿಪರೀತ ತೂಕದಿಂದ ಬಳಲುತ್ತಾರೆ. ಆದರೆ ಅದು ಈ ವಿವರಣೆಯ ವ್ಯಾಪ್ತಿಯಲ್ಲಿ ಸೇರಿಲ್ಲ.

ತೂಕ ಕಡಿಮೆ ಮಾಡಿಕೊಳ್ಳುವುದು, ಹಾರ್ಮೋನ್‌ ಚಿಕಿತ್ಸೆ, ಚಯಾಪಚಯ ಬದಲಾವಣೆಯನ್ನು ಗುರುತಿಸುವುದು ಮತ್ತು ಸರಿಪಡಿಸುವುದು, ಗರ್ಭಸ್ರಾವ ಸರಿಪಡಿಸುವ ಮೂಲಕ ಪಿಸಿಒಎಸ್‌ಗೆ ಚಿಕಿತ್ಸೆ ನೀಡಲಾಗುತ್ತದೆ.