ಯಾವುದೇ ಟವರ್‌ನ ಪ್ಯಾಪ್ತಿಯಲ್ಲಿ ಇರಬೇಕೆಂಬ ಅನಿವಾರ್ಯವೂ ಇಲ್ಲ. ದೊಡ್ಡ ಮರಗಳು, ಕಟ್ಟಡಗಳು, ಬೆಟ್ಟಗಳು – ಇಂಥ ಅಡಚಣೆಗಳು ಉಪಗ್ರಹದಿಂದ ಸ್ಯಾಟ್‌ಫೋನ್‌ ಇರುವ ಮಾರ್ಗದಲ್ಲಿ ಇರದಿದ್ದರೆ ಆಯಿತು. ಆ್ಯಂಟೆನಾಗಳು ಹೆಚ್ಚಾಗಿ ಬಳಕೆಯಲ್ಲಿ ಇಲ್ಲದ ಪ್ರದೇಶಗಳಲ್ಲಿ ಸ್ಯಾಟ್‌ಫೋನ್‌ಗಳ ಉಪಯೋಗ ಸೂಕ್ತ. ಅದಕ್ಕೇ ಜನವಸತಿ ಪ್ರದೇಶಗಳಿಂದ ದೂರ ಇರುವ ತಾಣಗಳಲ್ಲಿ ಇವುಗಳ ಬಳಕೆ ಹೆಚ್ಚು.
ಇರಿಡಿಯಂನಂಥ ಉಪಗ್ರಹ ಸಂಪರ್ಕ ಕಂಪೆನಿಗಳು ಸ್ಯಾಟ್‌ಫೋನ್‌ ಸೇವೆಯನ್ನು ಒದಗಿಸುತ್ತವೆ. ಧ್ರುವ ಪ್ರದೇಶಗಳು ಹಾಗೂ ಸಾಗರದ ಸ್ಥಳಗಳಲ್ಲಿ ಇವುಗಳ ಸೇವೆ ಲಭ್ಯ. ಸಾಹಸಿಗಳು, ದುರಂತಗಳಿಂದ ಬದುಕುಳಿಯುವವರು, ನಾವಿಕರು ಹಾಗೂ ಹಡಗಿನಲ್ಲಿ ಸಾಗುವ ಪ್ರಯಾಣಿಕರು ನಾಗರಿಕ ಸಮಾಜದ ಜೊತೆ ಸಂಪರ್ಕ ಇಟ್ಟುಕೊಳ್ಳಲು ಸ್ಯಾಟ್‌ಫೋನ್‌ಗಳು ಸೂಕ್ತ. ಭಾರತದಂಥ ದೇಶದಲ್ಲಿ ಸ್ಯಾಟ್‌ಫೋನ್‌ ಇಟ್ಟುಕೊಳ್ಳುವುದು ಅಕ್ರಮ.
