ದಿನದಿನವೂ ಹೊಸತು ಕಲಿತು...

ನಾವು ಯಾವುದೇ ಊರಿಗೆ ಭೇಟಿ ನೀಡಿದಾಗ ಅಲ್ಲಿನ ಸ್ಥಳಗಳ ಕುರಿತು ತಿಳಿದುಕೊಳ್ಳಲು ಪ್ರವಾಸಿ ಮಾರ್ಗದರ್ಶಿಗಳ ಸಹಾಯ ಪಡೆದಿರುತ್ತೇವೆ. ಆಯಾ ಪ್ರದೇಶಗಳ ಕುರಿತಾಗಿ ಅವರು ಕೊಡುವ ಮಾಹಿತಿ ನಮ್ಮ ತಿಳಿವಳಿಕೆಯನ್ನು ವಿಸ್ತರಿಸುತ್ತದೆ. ಪ್ರದೇಶಗಳು ಮತ್ತು ವ್ಯಕ್ತಿಗಳ ನಡುವೆ ಕೊಂಡಿಯಾಗುವ ಕೆಲಸ ಪ್ರವಾಸಿ ಮಾರ್ಗದರ್ಶಿಗಳದ್ದು.

ಈ ಕಾರ್ಯದಲ್ಲಿ ಕೆ.ಧನಪಾಲ ಅವರಿಗೆ 10 ವರ್ಷದ ಅನುಭವ. ಬಿಎಂಟಿಸಿಯಲ್ಲಿ ಚಾಲಕ ಹಾಗೂ ಪ್ರವಾಸಿ ಮಾರ್ಗದರ್ಶಿಯಾಗಿ ಕೆಲಸ ಮಾಡುತ್ತಿರುವ ಅವರಿಗೆ ಚಾಲಕನಾಗಿ 20 ವರ್ಷದ ಅನುಭವ.

ಧನಪಾಲ ತಮ್ಮ ವೃತ್ತಿ ಬದುಕನ್ನು ಕೇವಲ ‘ಹಣ ಗಳಿಸುವ’ ಕೆಲಸವಾಗಿ ನೋಡುವುದಿಲ್ಲ. ಬೆಂಗಳೂರು ನಗರದ ಬಗ್ಗೆ ಪ್ರವಾಸಿಗರಿಗೆ ಇರಬಹುದಾದ ಕಲ್ಪನೆಗಳನ್ನು ವಿಸ್ತರಿಸಿ ಅದಕ್ಕೊಂದು ರೂಪ ಕೊಡುವ ಜವಾಬ್ದಾರಿ ಅವರ ಹೆಗಲ ಮೇಲಿದೆ. ‘ಇಂಥ ಅದೃಷ್ಟ ಕೆಲವರಿಗೆ ಮಾತ್ರ ಸಿಗುತ್ತದೆ’ ಎಂಬುದು ಅವರ ಅನಿಸಿಕೆ.

ಪ್ರತಿದಿನವೂ ಬೆಂಗಳೂರಿನ ಇತಿಹಾಸ ಮತ್ತು ಪ್ರಸ್ತುತತೆಯನ್ನು ಸ್ಥಳಗಳ ಮೂಲಕ ಪರಿಚಯಿಸುವ ಇವರು ತಮ್ಮ ಅನುಭವ ಹಂಚಿಕೊಳ್ಳುತ್ತಾ ನೆನಪುಗಳನ್ನು ಮೆಲುಕು ಹಾಕುವುದು ಹೀಗೆ...

‘ಬೆಂಗಳೂರನ್ನು ಪರಿಚಯಿಸಲು ಬಿಎಂಟಿಸಿ ‘ಬೆಂಗಳೂರು ದರ್ಶಿನಿ’ ಶುರುಮಾಡಿದಾಗ ಅದಕ್ಕೆ ಮೊದಲಿಗೆ ಬಳಕೆಯಾಗಿದ್ದು ‘ಕಾವೇರಿ’ ಎಂಬ ಡಬಲ್ ಡೆಕ್ಕರ್ ಬಸ್. ನಂತರ ಬ್ರೆಜಿಲ್ ದೇಶದಲ್ಲಿದ್ದಂತೆ ‘ಕ್ಯೂರಿಟುಬ’ ಎಂಬ ಅತ್ಯಾಧುನಿಕ ಸೌಲಭ್ಯಗಳಿರುವ ಬಸ್ ನಿಯೋಜಿಸಲಾಯಿತು. ಆಗಲೇ ಅದಕ್ಕೆ ಚಾಲಕನಾಗಿ ಕೆಲಸ ಶುರು ಮಾಡಿದೆ.

ಪ್ರವಾಸಿಗರ ಆಸಕ್ತಿ ಮತ್ತು ಬೆಂಗಳೂರಿನ ಬಗ್ಗೆ ತಿಳಿದುಕೊಳ್ಳುವ ಅವರ ಹಂಬಲ ನನ್ನಲ್ಲಿ ಆಸಕ್ತಿಯನ್ನೂ ಹೆಚ್ಚಿಸಿತು. ನನ್ನ ಸ್ವ-ಆಸಕ್ತಿಯಿಂದ ಬೆಂಗಳೂರಿನ ಅನೇಕ ಸ್ಥಳಗಳ ಬಗ್ಗೆ ಮಾಹಿತಿ ಸಂಗ್ರಹಿಸಲು ಶುರು ಮಾಡಿದೆ. ಅನೇಕ ಗೆಳೆಯರ ಸಲಹೆ ಸಹಕಾರವನ್ನು ನಾನಿಲ್ಲಿ ನೆನೆಯಬೇಕು. ಅದರಲ್ಲೂ ‘ಬೆಂಗಳೂರಿನ ‘ಹೆರಿಟೆಜ್ ಮ್ಯಾನ್’ ಎಂದೇ ಖ್ಯಾತರಾಗಿರುವ ಸುರೇಶ ಮೂನ ಅವರೊಂದಿಗಿನ ಒಡನಾಟ ನಗರದ ಬಗ್ಗೆ ಆಳವಾಗಿ ತಿಳಿದುಕೊಳ್ಳಲು ಸಹಾಯ ಮಾಡಿತು.

ಗೆಳೆಯ ವೇಮಗಲ್ ಸೋಮಶೇಖರ ಅವರೊಂದಿಗೆ ಬೆಂಗಳೂರು ನಗರದ ಪ್ರಮುಖ ಸ್ಥಳಗಳ ಬಗ್ಗೆ ಮಾಹಿತಿ ನೀಡುವ ಚಿಕ್ಕ ಪುಸ್ತಕವನ್ನು ಹೊರತಂದಿದ್ದೇನೆ. ‘ಬೆಂಗಳೂರು ದರ್ಶಿನಿ’ ಬಸ್ಸಿಗೆ ಬರುವ ಪ್ರವಾಸಿಗರಿಗೆ ಕಡಿಮೆ ಬೆಲೆಗೆ ಈ ‘ಮಾಹಿತಿ ಪುಸ್ತಕ’ವನ್ನು ಮಾರುವುದರೊಂದಿಗೆ ಪ್ರವಾಸಿಗರ ಕೂತೂಹಲದ ಹಸಿವನ್ನು ನೀಗಿಸುತ್ತೇನೆ.

ಪ್ರತಿದಿನವೂ ಹೊಸ ಪ್ರವಾಸಿಗರೊಂದಿಗೆ ಭಿನ್ನ ಅನುಭವ ಪಡೆಯುತ್ತೇನೆ. ಎಷ್ಟೋ ವರ್ಷಗಳ ನಂತರ ಕೂಡ ಪ್ರವಾಸಿಗರು ಅಚಾನಕ್ಕಾಗಿ ಸಿಕ್ಕು ಮಾತನಾಡಿಸಿ ನಾನು ನೀಡಿದ ಮಾರ್ಗದರ್ಶನವನ್ನು ನೆನೆಯುತ್ತಾರೆ. ಆಗ ನನಗೆ ಹೇಳಿಕೊಳ್ಳಲು ಆಗದಷ್ಟು ಸಂತೋಷವಾಗುತ್ತೆ. ಬೆಂಗಳೂರಿನಲ್ಲಿ ಪ್ರವಾಸೋದ್ಯಮ ಅಭಿವೃದ್ಧಿಗೆ ಸಾಕಷ್ಟು ಅವಕಾಶಗಳಿವೆ. ಈ ಉದ್ಯಮ ಇನ್ನೂ ದೊಡ್ಡಮಟ್ಟಕ್ಕೆ ಬೆಳೆಯಬೇಕಿದೆ.

ಬೆಂಗಳೂರಿನಲ್ಲಿ ನಾವು ನೋಡಿರದ, ಹೆಸರೇ ಕೇಳಿರದ ಹಲವು ಸಾಕಷ್ಟು ಪ್ರದೇಶಗಳಿವೆ. ಅವುಗಳನ್ನು ಪರಿಚಯಿಸುವ ಕೆಲಸ ಶುರು ಆಗಬೇಕು. ಪ್ರವಾಸೋದ್ಯಮ ದಿನ ಆಚರಿಸುವುದರೊಂದಿಗೆ ಈ ನಗರವನ್ನು ಪ್ರವಾಸಿಗರ ‘ನೆಚ್ಚಿನ ತಾಣ’ವಾಗಿ ಮಾಡುವ ನೂತನ ಕಾರ್ಯಕ್ರಮಗಳನ್ನು ಪ್ರವಾಸೋದ್ಯಮ ಇಲಾಖೆ ಶುರು ಮಾಡಬೇಕು.

ಮಾಹಿತಿ ತಂತ್ರಜ್ಞಾನದ ಸಹಾಯದಿಂದ ನಗರದ ಪ್ರವಾಸಿ ಸ್ಥಗಳ ಬಗ್ಗೆ ಹೆಚ್ಚು ಪ್ರಚಾರ ನೀಡಬೇಕು. ಬೇರೆ ದೇಶಗಳಲ್ಲಿ ಬೆಳೆದಿರುವ ಮಾದರಿಯಲ್ಲಿ ನಮ್ಮ ನಗರದಲ್ಲಿಯೂ ಪ್ರವಾಸೋದ್ಯಮ ಬೃಹತ್ತಾಗಿ ಬೆಳೆಯಬೇಕು. ಇದರಿಂದ ಸ್ಥಳೀಯರ ಆರ್ಥಿಕತೆ ಸುಧಾರಿಸುತ್ತದೆ.’ 

ಪ್ರವಾಸಿ ಗೈಡ್‌ ಅಂದ್ರೆ ಸಾಂಸ್ಕೃತಿಕ ರಾಯಭಾರಿಗಳು
ರಾಜ್ಯದ ಹಲವು ಪ್ರದೇಶಗಳನ್ನು ಪ್ರವಾಸಿಗರಿಗೆ ಪರಿಚಯಿಸಿರುವ, ಸುಮಾರು 3 ದಶಕಗಳಿಂದ ಕೆಎಸ್‌ಟಿಡಿಸಿ (ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ) ಸಂಸ್ಥೆಯಲ್ಲಿ ಪ್ರವಾಸಿ ಮಾರ್ಗದರ್ಶಿಯಾಗಿ ಕೆಲಸ ಮಾಡುತ್ತಿದ್ದಾರೆ ನಾಗರಾಜ ಮೂರ್ತಿ.