ಕೋಲ್ಕತ್ತ: ಜಮಾತ್–ಉಲ್–ಮುಜಾಹಿದೀನ್ ಬಾಂಗ್ಲಾದೇಶ್ (ಜೆಎಂಬಿ) ಸಂಘಟನೆಗೆ ಸೇರಿದ ಆರು ಮಂದಿಯನ್ನು ‘ಕೋಲ್ಕತ್ತ ಪೊಲೀಸ್ ವಿಶೇಷ ಕಾರ್ಯಪಡೆ’ ಪಶ್ಚಿಮ ಬಂಗಾಳ ಹಾಗೂ ಅಸ್ಸಾಂನಲ್ಲಿ ಸೋಮವಾರ ಬಂಧಿಸಿದೆ.
ಈ ಪೈಕಿ ನಾಲ್ವರು ಖಗ್ರಾಗಢ ಸ್ಫೋಟ ಪ್ರಕರಣದಲ್ಲಿ ಬೇಕಾಗಿದ್ದವರು ಎನ್ನಲಾಗಿದೆ. ಬಂಧಿತರಲ್ಲಿ ಮೂವರು ಬಾಂಗ್ಲಾದೇಶದವರು ಎಂದು ಅಪರಾಧ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ ವಿಶಾಲ್ ಗರ್ಗ್ ತಿಳಿಸಿದರು. ‘ಖಗ್ರಾಗಢ ಸ್ಫೋಟದ ಬಳಿಕ ಇವರು ಪಶ್ಚಿಮ ಬಂಗಾಳ ಬಿಟ್ಟು ದಕ್ಷಿಣ ಭಾರತ ಮತ್ತು ಈಶಾನ್ಯ ರಾಜ್ಯಗಳಿಗೆ ತೆರಳಿದ್ದರು. ದಕ್ಷಿಣ ಭಾರತದ ರಾಜ್ಯಗಳಲ್ಲಿ ವಿಧ್ವಂಸಕ ಕೃತ್ಯಗಳನ್ನೆಸಗಲು ಸಂಚು ರೂಪಿಸುತ್ತಿದ್ದರು. ಈ ಬಗ್ಗೆ ಹೆಚ್ಚಿನ ಮಾಹಿತಿ ಕಲೆಹಾಕಲು ಪ್ರಯತ್ನಿಸುತ್ತಿದ್ದೇವೆ’ ಎಂದು ಗರ್ಗ್ ಹೇಳಿದರು.