ಲಂಡನ್‌: ದುರಂತ ಅಂತ್ಯ ಕಂಡ ಟೈಟಾನಿಕ್‌ ಹಡಗಿನಲ್ಲಿ ಜೀವರಕ್ಷಕ ಕವಚವಿದ್ದ ಲಾಕರ್‌ನ ಕೀಲಿಕೈ 85,000 ಪೌಂಡ್‌ಗೆ (₹69. 56 ಲಕ್ಷ) ಹರಾಜಾಗಿದೆ. ಇದುವರೆಗೆ ನಡೆದ ಟೈಟಾನಿಕ್‌ ಹಡಗಿನ ಸ್ಮರಣೀಯ ವಸ್ತುಗಳ ಹರಾಜಿನಲ್ಲಿ ಇದು ಬಹುದೊಡ್ಡ ಮೊತ್ತವಾಗಿದೆ.
ಕೀಲಿಕೈ ಜೊತೆಗೆ ಇತರ 200ರಷ್ಟು ಸ್ಮರಣೀಯ ವಸ್ತುಗಳು ಹರಾಜಾಗಿವೆ. 50,000 ಪೌಂಡ್‌ಗೆ (₹40.91ಲಕ್ಷ) ಕೀಲಿಕೈ ಹರಾಜಾಗಬಹುದು ಎಂದು ಮೊದಲು ನಿರೀಕ್ಷಿಸಲಾಗಿತ್ತು. ‘ಕೀಲಿಕೈ ದೊಡ್ಡ ಮೊತ್ತಕ್ಕೆ ಹರಾಜಾಗಿರುವುದು ಅದರ ಮಹತ್ವ ಮತ್ತು ಅಮೂಲ್ಯತೆಗೆ ಸಾಕ್ಷಿಯಾಗಿದೆ ಎಂದು’ ಹರಾಜುದಾರ ಆ್ಯಂಡ್ರ್ಯೂ ಅಲ್ಡ್ರಿಡ್ಜ್ ಹೇಳಿದ್ದಾರೆ.
ಈ ಕೀಲಿಕೈ 1912ರಲ್ಲಿ ಟೈಟಾನಿಕ್‌ ಹಡಗು ಮುಳುಗಡೆಯಾದಾಗ ಹಡಗಿನಲ್ಲಿ ಮೂರನೇ ದರ್ಜೆಯ ಪರಿಚಾರಕನಾಗಿದ್ದ ಬರ್ಕ್‌ಶೆರ್‌ ನಿವಾಸಿ ಸಿಡ್ನಿ ಸೆಡುನರಿ ಅವರಿಗೆ ಸೇರಿದ್ದಾಗಿತ್ತು. ‘ಇತರರ ರಕ್ಷಣೆಗಾಗಿ ಸಿಡ್ನಿ ಅವರು ತಮ್ಮ ಪ್ರಾಣವನ್ನೇ ಅರ್ಪಿಸಿದ್ದಾರೆ ಎಂಬುದರಲ್ಲಿ ಯಾವುದೇ ಸಂದೇಹವಿಲ್ಲ’ ಎಂದು ಆ್ಯಂಡ್ರ್ಯೂ ಹೇಳಿದ್ದಾರೆ.
