ಜನರ ಹಕ್ಕು ಗುರುತಿಸಿ

ಅಸಮರ್ಪಕ ವಾದ

ಸರ್ಕಾರಿ ಆಸ್ಪತ್ರೆಗಳ ಆರೋಗ್ಯ ಸೇವೆಯ ಗುಣಮಟ್ಟವನ್ನು ಹೆಚ್ಚಿಸಲು ಖಾಸಗೀಕರಣದ ಅವಶ್ಯಕತೆ ಇದೆಯೆಂದು ಪ್ರತಿಪಾದಿಸುವ ಯಾವುದೇ ಸರ್ಕಾರ, ಇಂತಹ ಕ್ರಮ ಈಗಾಗಲೇ ವಿಫಲಗೊಂಡಿರುವ ಹಲವು ಉದಾಹರಣೆಗಳನ್ನು ನೋಡಬೇಕಾಗಿದೆ. ನಮ್ಮದೇ ರಾಜ್ಯದ ಉದಾಹರಣೆ ನೀಡುವುದಾದರೆ: ಒಪೆಕ್ ರಾಷ್ಟ್ರಗಳು ದಾನವಾಗಿ ನೀಡಿದ್ದ ಸುಮಾರು 73 ಎಕರೆ ವಿಸ್ತಾರದ ರಾಯಚೂರಿನ ರಾಜೀವ್ ಗಾಂಧಿ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯನ್ನು ಸರ್ಕಾರ 2002ರಲ್ಲಿ ಅಪೋಲೊ ಆಸ್ಪತ್ರೆಗಳ ಸಂಸ್ಥೆಯ ಸುಪರ್ದಿಗೆ ಹತ್ತು ವರ್ಷಗಳ ಒಪ್ಪಂದದ ಮೇರೆಗೆ ವಹಿಸಿತು.

 

ಆದರೆ, 2012ರಲ್ಲಿ ನಡೆಸಿದ ಸಮೀಕ್ಷೆಯ ಪ್ರಕಾರ, ಖಾಸಗಿ ಸಂಸ್ಥೆಯ ಪಾಲುದಾರಿಕೆಯ ಆಡಳಿತದಲ್ಲಿ ಆಸ್ಪತ್ರೆಯ ಒಳರೋಗಿಗಳ ನೋಂದಣಿಯು ಶೇ 85ರಿಂದ ಶೇ 58ಕ್ಕೆ ಇಳಿಮುಖವಾಗಿತ್ತು. 

 

ಬಿಪಿಎಲ್ ಒಳರೋಗಿಗಳ ಸೇವೆ ಶೇ 94.7ರಿಂದ ಶೇ 21.4ರಷ್ಟು ಹೊರರೋಗಿಗಳ ಸೇವೆಯಲ್ಲಿ ಶೇ 92.8ರಿಂದ ಶೇ 7.5ರಷ್ಟು ಇಳಿಮುಖವಾಗಿದ್ದು ಕಂಡುಬಂದಿತು. ಬಡ ರೋಗಿಗಳಿಗೆ ಗುಣಮಟ್ಟದ ಆರೋಗ್ಯ ಸೇವೆ ನೀಡುವುದೇ ಸರ್ಕಾರಿ ಆಸ್ಪತ್ರೆ ಖಾಸಗೀಕರಣದ ಮುಖ್ಯ ಉದ್ದೇಶ ಎಂದು ವಾದಿಸುವ ರಾಜಕಾರಣಿಗಳು ವೈಜ್ಞಾನಿಕವಾಗಿ ಸಮೀಕ್ಷೆಗೊಳಪಟ್ಟ ಉದಾಹರಣೆಗಳನ್ನಾದರೂ ತಿಳಿಯಬೇಕು.