ಸುಮಧುರ ಸುಗಂಧರಾಜ

* 30 ಸೆಂ.ಮೀ. ಅಂತರದಲ್ಲಿ ಬೋದುಗಳನ್ನು ರಚಿಸಿಕೊಂಡು ಬೋದುಗಳ ಒಂದು ಬದಿಯಲ್ಲಿ ಸುಗಂಧರಾಜ ಹೂವಿನ ಗಡ್ಡೆಗಳನ್ನು ನಾಟಿ ಮಾಡಬೇಕು. ಸಸಿಯಿಂದ ಸಸಿಗೆ 22.5 ಸೆಂ.ಮೀ ಅಂತರವು ಬರುವಂತೆ ಗಡ್ಡೆಗಳನ್ನು ಊರಬೇಕು. ನಂತರ ಸಾವಯವ ಗೊಬ್ಬರ ಹಾಕಬೇಕು.

* ಪ್ರತಿ ತಿಂಗಳು ಗಿಡಗಳ ಸುತ್ತಲೂ ಅಂತರ ಬೇಸಾಯ ಮಾಡಿ ಮಣ್ಣು ಏರಿಸಬೇಕು. ಪ್ರತಿ 5 ರಿಂದ 7 ದಿನಗಳಿಗೊಮ್ಮೆ ವಾತಾವರಣಕ್ಕೆ ತಕ್ಕಂತೆ ನೀರನ್ನು ಕೊಟ್ಟು ಈ ಹೂ ಬೆಳೆ ಬೇಸಾಯ ಮಾಡಬಹುದು.

* ಗಡ್ಡೆಗಳನ್ನು ನಾಟಿ ಮಾಡಿದ ಮೂರರಿಂದ ಮೂರೂವರೆ ತಿಂಗಳಲ್ಲಿ ಸುಗಂಧರಾಜ ಹೂವಿನ ಗಿಡಗಳಲ್ಲಿ ಹೂಗಳು ಕೊಯ್ಲಿಗೆ ಬರುತ್ತವೆ.

* ಹೂಗಳು ಕೊಯ್ಲು ಮಾಡುವಾಗ ಹೂ ಅರಳಿದ ದಿನವೇ ಬೆಳಿಗ್ಗೆ ಎಂಟು ಗಂಟೆಯ ಒಳಗಾಗಿ ಹೂಗಳನ್ನು ಕೀಳಬೇಕು. ಕೊಯ್ಲು ಮಾಡಿದ ಹೂಗಳನ್ನು ಮೂರು ದಿನಗಳವರೆಗೂ ಇಡಬಹುದು. ಈ ಸುಗಂಧರಾಜ ಹೂವಿನ ಬೆಳೆಯಲ್ಲಿ ನಾವು ನಿರಂತರವಾಗಿ ಹೂಗಳನ್ನು ಪಡೆಯಬೇಕಿದ್ದಲ್ಲಿ ಗಡ್ಡೆಗಳನ್ನು ನಾಟಿ ಮಾಡುವಾಗಲೇ ಕೆಲವು ವಾರಗಳ ಅಂತರಕೊಟ್ಟು ಸುಪ್ತಾವಸ್ಥೆಯಲ್ಲಿರುವ ಗಡ್ಡೆಗಳನ್ನು ನಾಟಿ ಮಾಡಬೇಕು.

* ಗಿಡಗಳಿಂದ ಹೂಗಳನ್ನು ಕೊಯ್ಲು ಮಾಡಿದ ಕೆಲ ದಿನಗಳ ನಂತರ ಎಲೆಗಳು ಒಣಗಲು ಪ್ರಾರಂಭಿಸುತ್ತವೆ. ಈ ಹಂತದಲ್ಲಿ ಗಡ್ಡೆಗಳನ್ನು ಸಂಗ್ರಹಿಸಿ ಬಿತ್ತನೆಗಾಗಿ ಕಾಯ್ದಿಡಬೇಕು.