ಮೌಲ್ಯಗಳ ಅಧಃಪತನ ಆತಂಕಕಾರಿ ವಿದ್ಯಮಾನ

ಲೈಂಗಿಕ ಹಗರಣದಿಂದಾಗಿ ರಾಜ್ಯದ ಅಬಕಾರಿ ಸಚಿವ ಎಚ್.ವೈ.ಮೇಟಿ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕಾದ ಪ್ರಸಂಗ ಸಾರ್ವಜನಿಕ ಬದುಕಿನಲ್ಲಿ ನೈತಿಕತೆಯ ಕುಸಿತಕ್ಕೆ ಸಂಕೇತ. ಸಮಾಜದ ಎಲ್ಲಾ ಕ್ಷೇತ್ರಗಳಲ್ಲೂ ಮೌಲ್ಯಗಳ ಅಧಃಪತನಕ್ಕೆ ರೂಪಕವಾಗಿದೆ ಈ ಘಟನೆ. 1973ರಲ್ಲಿ  ರಾಜ್ಯದ ಗೃಹ ಮಂತ್ರಿಯಾಗಿದ್ದ ಆರ್.ಡಿ.ಕಿತ್ತೂರ  ಅವರ ನಿವಾಸದಿಂದ  ಮಹಿಳೆಯೊಬ್ಬರು ನಾಪತ್ತೆಯಾಗಿದ್ದಾರೆ ಎಂಬ ವಿಚಾರ  ಪತ್ರಿಕೆಗಳಲ್ಲಿ ಪ್ರಕಟವಾದ ನಂತರ ಹಲವು ವದಂತಿಗಳಿಗೆ ಕಾರಣವಾಗಿತ್ತು. ಬರೀ ಈ ವದಂತಿಗಳಿಗಾಗಿಯೇ   ಅವರ ರಾಜೀನಾಮೆಯನ್ನು ಅಂದಿನ ಮುಖ್ಯಮಂತ್ರಿ  ಡಿ. ದೇವರಾಜ ಅರಸು ಅವರು ಪಡೆದಿದ್ದರು.   ಆಗಿನ ಕಾಲದ ಮೌಲ್ಯ ವ್ಯವಸ್ಥೆಗೂ ಈಗಿನ ಕಾಲದ ಮೌಲ್ಯ ವ್ಯವಸ್ಥೆಗೂ ವ್ಯತ್ಯಾಸಗಳಿವೆ ಎಂಬುದು ನಿಜ. ಹೀಗಿದ್ದೂ ಆಡಳಿತಾರೂಢರಲ್ಲಿ ಈಚಿನ ದಿನಗಳಲ್ಲಿ ಭಂಡತನ ಎಷ್ಟೊಂದು ಹೆಚ್ಚಾಗಿದೆ ಎಂದರೆ ಲೈಂಗಿಕ ಹಗರಣದ ಸಿ.ಡಿ. ಸಾರ್ವಜನಿಕವಾಗಿ ಪ್ರದರ್ಶನಗೊಳ್ಳುವವರೆಗೂ ಅಧಿಕಾರ ಸ್ಥಾನವನ್ನು ಉಳಿಸಿಕೊಳ್ಳಲು  ಕಸರತ್ತುಗಳು ನಡೆದಿವೆ.