... ಅಚ್ಚ ಬಿಳಿ ಮನಸ್ಸು ಇಲ್ಲವೇ?

ಭಾರತವಾಸಿ ಭಾರತೀಯ ಪ್ರಜೆಗಳು ವಿದೇಶಿ ಬ್ಯಾಂಕು ಖಾತೆಗಳಲ್ಲಿ ಇರಿಸಿರುವ ಹಣಕ್ಕೆ ಸಂಬಂಧಿಸಿದ ಸರ್ವ ವಿವರವನ್ನು ಆ ಬ್ಯಾಂಕುಗಳಿಂದ ಪಡೆಯುವ ಪ್ರಯತ್ನದಲ್ಲಿ ಭಾರತ ಸರ್ಕಾರ ಸಫಲವಾಗಿದೆಯೇ? ‘ಹೌದು’ ಎಂದಾದರೆ, ಎಷ್ಟರಮಟ್ಟಿಗೆ ಸಫಲವಾಗಿದೆ ಎಂಬ ವಿವರಗಳು ಈ ದೇಶದ ಪ್ರಜೆಗಳಾಗಿರುವ ನಮಗಂತೂ ಸಿಗುತ್ತಿಲ್ಲ.

ಒಂದು ವೇಳೆ ವಿದೇಶಿ ಬ್ಯಾಂಕುಗಳಲ್ಲಿ ಹಣ ಇರಿಸಿದ ಎಲ್ಲಾ  ಭಾರತೀಯ ಪ್ರಜೆಗಳ ಹೆಸರು, ಅವರ ಬ್ಯಾಂಕ್‌ ಖಾತೆ ನಂಬರ್, ಖಾತೆಯಲ್ಲಿರುವ ಒಟ್ಟು ಮೊತ್ತ ಇತ್ಯಾದಿ ಎಲ್ಲಾ ವಿವರಗಳನ್ನು ಪಡೆದುಕೊಂಡರೂ ಆ ಮಾಹಿತಿಯಿಂದ ಮಾಡುವುದಾದರೂ ಏನು? ಆ ಬ್ಯಾಂಕಿನ ಒಡೆಯರು ಆ ಹಣವನ್ನು ಭಾರತ ಸರ್ಕಾರಕ್ಕೆ ಕಳಿಸಲು ಸಿದ್ಧರಿರುತ್ತಾರೆಯೇ? ಸಿದ್ಧರಿರದಿದ್ದರೆ ಬಲವಂತವಾಗಿ ಬ್ಯಾಂಕಿನಿಂದ ನೇರವಾಗಿ ಪಡೆದುಕೊಳ್ಳಲು ಸಾಧ್ಯವಿದೆಯೇ? ಬಹುಶಃ ಅದು ಯಾವತ್ತೂ ಸಾಧ್ಯವಿಲ್ಲ. ಖಾತೆದಾರ ಮಾತ್ರ ಆ ಹಣವನ್ನು ನೀಡಲು ಸಾಧ್ಯ. 

ವಾಸ್ತವದಲ್ಲಿ, ವಿದೇಶದಲ್ಲಿ ಹಣ ಇಟ್ಟುಕೊಂಡವರಲ್ಲಿ ಎಲ್ಲರದೂ ಕಪ್ಪು ಹಣವಲ್ಲ. ಅದು, ಅಲ್ಲಿ ವಾಸ ಮಾಡುತ್ತಿರುವ ಎಷ್ಟೋ ಮಂದಿ ಅಲ್ಲಿ ದುಡಿದು ಸಂಪಾದಿಸಿದ ಹಣವಾಗಿರುತ್ತದೆ. ಅವರ ಪೈಕಿ ತಮ್ಮ ಬ್ಯಾಂಕ್ ಖಾತೆಯಲ್ಲಿ ಹಣ ಕೂಡಿಡುತ್ತಾ ಲಕ್ಷ ಲಕ್ಷ ದಾಟಿ ಕೋಟಿ ಕೋಟಿಗಳಾಚೆ ಮುಂದೆ ಸಾಗುತ್ತಲೇ  ಇರುವವರ ಒಂದೇ ಒಂದು ಕೊರತೆಯೆಂದರೆ, ‘ತಾವು ಇನ್ನೆಷ್ಟು ಕಾಲ ಹೀಗೆ ಇಲ್ಲಿ ಜೀವಿಸಬಹುದು, ತಮಗೆ ಇನ್ನು ಎಷ್ಟು ಆಯಸ್ಸು ಇರಬಹುದು’ ಎಂಬ ಯೋಚನೆ ಇಲ್ಲದಿರುವುದು. 

ಅಲ್ಲಿಯೇ ಇರುವುದೋ ಹುಟ್ಟಿದ ನೆಲಕ್ಕೆ ಮರಳುವುದೋ, ಮರಳುವುದಿದ್ದರೆ ಯಾವಾಗ ಎಂದು ನಿರ್ಧರಿಸಲಾಗದಿರುವುದು! ಅವರಲ್ಲೆಷ್ಟೋ ಮಂದಿಯ ಬಳಿ ಡಾಲರಿನಲ್ಲಿ ಲಕ್ಷಗಟ್ಟಲೆ, ಕೋಟಿಗಟ್ಟಲೆ ಹಣ ಇರಬಹುದು. ಪಾಪ, ಆ ಹಣವನ್ನು ಯಾವತ್ತು, ಎಲ್ಲಿ, ಹೇಗೆ ಏನು ಮಾಡುವುದು ಎಂಬ ಪ್ರಶ್ನೆ ಅವರ ಮನಸ್ಸಿನಲ್ಲಿ  ಹುಟ್ಟಿರುವುದಿಲ್ಲ! ಸ್ವಾಭಾವಿಕವಾದ ಸಾವು ಅಥವಾ ಯಾವುದೋ ಆಕಸ್ಮಿಕದಿಂದ ಆ ಹಣ ಅನಾಥವಾಗುಳಿದು, ಬ್ಯಾಂಕಿನ ಪಾಲಾಗಬಹುದು ಎನ್ನುವ ಯೋಚನೆ ಕೂಡ ಬಂದಿರುವುದಿಲ್ಲ! ಅದರಂತೆಯೇ ಅಲ್ಲಿ ಅವರು ಕೊಂಡ ಆಸ್ತಿಪಾಸ್ತಿ ಕೂಡ ವ್ಯರ್ಥವಾಗಬಹುದು! 

ವಿದೇಶದಲ್ಲಿರುವ ಭಾರತ ಪ್ರಜೆಗಳು ಭಾರತವಾಸಿಗಳಾದ ನಂತರ ತಮ್ಮ ಹೆಸರಿನಲ್ಲಿ ಅಥವಾ ಬೇರೆ ಹೆಸರುಗಳಲ್ಲಿ ವಿದೇಶದಲ್ಲಿ ಮನೆ, ಹೋಟೆಲು ಮತ್ತೇನೋ ಖರೀದಿಸಲು ಡಾಲರನ್ನು ಹೂಡುವುದಾದರೆ ಅಂಥ ವ್ಯವಹಾರಗಳ ಮೇಲೆ ನಿರ್ಬಂಧ ಹೇರಲು ಭಾರತ ಸರ್ಕಾರದಿಂದ ಸಾಧ್ಯವಿಲ್ಲ. ತಮ್ಮ ಹೆಸರಿನಲ್ಲಿ ಮತ್ತು ಬೇನಾಮಿ ಖಾತೆಗಳಲ್ಲಿ ಅವರು ಇರಿಸಿರುವ ಲಕ್ಷಗಟ್ಟಲೆ, ಕೋಟಿಗಟ್ಟಲೆ ಡಾಲರುಗಳನ್ನು ಸಾವು ಬರುವವರೆಗೆ ಜಾಗತಿಕ ಪ್ರವಾಸಗಳಿಗೆ, ದುಬಾರಿ ವೆಚ್ಚದ ವೈದ್ಯಕೀಯ ಚಿಕಿತ್ಸೆಗೆ ಬಳಸಬಹುದು. ತಮ್ಮ ಮಕ್ಕಳು– ಮೊಮ್ಮಕ್ಕಳಿಗೆ ವಿದೇಶದಲ್ಲಿ ಶಿಕ್ಷಣ ಪಡೆಯಲು ಬಳಸಬಹುದು.

ಹಾಗೆಲ್ಲ ಮಾಡಿಯೂ ಲಕ್ಷಗಟ್ಟಲೆ ಡಾಲರುಗಳು ಅವರ ಖಾತೆಯಲ್ಲಿ ಬಿದ್ದುಕೊಂಡಿದ್ದರೆ ಅದಕ್ಕೆ ಏನು ಸಂಭವಿಸುತ್ತದೆ? ಖಾತೆದಾರನ ಮರಣದ ಬಳಿಕ ಅದು ಬ್ಯಾಂಕಿನಲ್ಲೇ ಉಳಿದು ಬ್ಯಾಂಕಿನ ತಿಜೋರಿ ಸೇರುತ್ತದೆ. ಹಾಗೆಯೇ ಅಲ್ಲಿರುವ ತಮ್ಮ ಆಸ್ತಿಪಾಸ್ತಿಯನ್ನು ಕೂಡ ಮಾರಿ ಹಣವನ್ನು  ಕೂಡ ಸ್ವದೇಶಕ್ಕೆ ತರಬಹುದು. ಎಲ್ಲಾ ಬಗೆಯಲ್ಲಿ ಎಲ್ಲಾ ಡಾಲರು ಭಾರತಕ್ಕೆ ಬಂದರೆ ಭಾರತದ ವಿದೇಶಿ ವಿನಿಮಯ ಸಂಗ್ರಹ ಥಟ್ಟನೆ ದುಪ್ಪಟ್ಟಾಗಬಹುದು!

ಭಾರತವಾಸಿಗಳ ವಿದೇಶಿ ಬ್ಯಾಂಕು ಖಾತೆಗಳಲ್ಲಿರುವ ಹಣ ಭಾರತಕ್ಕೆ ಬರುವಂತೆ ಮಾಡಲು ಸಾಧ್ಯವಿಲ್ಲವೇ? ಇದೆ. ಅವರನ್ನು ‘ಕಳ್ಳರು, ದೇಶದ್ರೋಹಿಗಳು ಎಂದು ಕರೆಯುವುದನ್ನು ನಿಲ್ಲಿಸಬೇಕು’. ಅವರ ಮನವೊಲಿಸಿ, ‘ಹಣವನ್ನು ಕಾನೂನು ರೀತ್ಯಾ ನೇರವಾಗಿ ಆ ದೇಶದ ಬ್ಯಾಂಕಿನಿಂದ ತಮ್ಮ ಭಾರತದ ಬ್ಯಾಂಕ್ ಖಾತೆಗೆ ತರಲು ಸಾಧ್ಯವಿದೆ. ಹಾಗೆ ತಂದರೆ, ಈ ದೇಶದಲ್ಲಿ ಅದು ಅವರದಾಗಿ ಉಳಿದು ಹೇಗೆ ಸದ್ಬಳಕೆಯಾಗುತ್ತದೆ’ ಎಂದು ಅವರಿಗೆ ಮನವರಿಕೆ ಮಾಡಿಸಬೇಕು.