ರಾಷ್ಟ್ರೀಯ ತಂಡದಲ್ಲಿ ರಾಜ್ಯದ ಲೀಲಾವತಿ

ಅಂದು ಪುರುಷರ ಜೊತೆ ಸೇರಿ ಹಾಕಿ ಆಡುತ್ತಾ ಗೋಲು ಗಳಿಸಿ ಗಮನ ಸೆಳೆದಿದ್ದ ಹುಡುಗಿ ಇಂದು ಅಂತರರಾಷ್ಟ್ರೀಯ ಟೂರ್ನಿಯಲ್ಲಿ ಪದಕಕ್ಕೆ ಮುತ್ತಿಟ್ಟಿದ್ದಾಳೆ..!

ಆ ಹುಡುಗಿಯ ಹೆಸರು ಎಂ.ಜೆ.ಲೀಲಾವತಿ. ಥಾಯ್ಲೆಂಡ್‌ ರಾಜಧಾನಿ ಬ್ಯಾಂಕಾಕ್‌ನಲ್ಲಿ ಕಳೆದ ವಾರ ನಡೆದ 18 ವರ್ಷದೊಳಗಿನವರ ಏಷ್ಯಾಕಪ್‌ ಹಾಕಿ ಟೂರ್ನಿಯಲ್ಲಿ ಭಾರತ ತಂಡ ಕಂಚಿನ ಪದಕ ಜಯಿಸುವಲ್ಲಿ ಕೊಡಗಿನ ಈ ಹುಡುಗಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

ವಿರಾಜಪೇಟೆ ತಾಲ್ಲೂಕಿನ ಬೆಕ್ಕೆಸೊಡ್ಲೂರಿನ ಲೀಲಾವತಿ ಅವರು ಕೊಡವ ಕುಟುಂಬಗಳ ವಾರ್ಷಿಕ ಹಾಕಿ ಉತ್ಸವದಲ್ಲಿಯೂ ಆಡಿದ್ದಾರೆ. ಮಲ್ಲಮಡ ಕುಟುಂಬ ಪ್ರತಿನಿಧಿಸುವ ಅವರು ಈ ಹಾಕಿ ಉತ್ಸವದಲ್ಲಿ ಪುರುಷರೊಂದಿಗೆ ಆಡಿದ್ದರು. ಫಾರ್ವರ್ಡ್‌ ಆಟಗಾರ್ತಿ ಆಗಿರುವ ಅವರು ಕೆಲವು ಗೋಲು ಗಳಿಸಿದ್ದರು.

ಮಲ್ಲಮಡ ಕುಟುಂಬದವರೇ ಆದ ಎಂ.ಎನ್‌.ಪೊನ್ನಮ್ಮ ಈಗಾಗಲೇ ರಾಷ್ಟ್ರೀಯ ತಂಡ ಪ್ರತಿನಿಧಿಸಿದ್ದಾರೆ. ಅಲ್ಲದೆ, ಜೂನಿಯರ್‌ ವಿಶ್ವಕಪ್‌ನಲ್ಲಿ ಆಡಿ ದೇಶಕ್ಕೆ ಕಂಚಿನ ಪದಕ ಗೆದ್ದುಕೊಟ್ಟಿದ್ದಾರೆ. ಈಗ ಅದೇ ಕುಟುಂಬದ ಆಟಗಾರ್ತಿ ಲೀಲಾವತಿ ರಾಷ್ಟ್ರಮಟ್ಟದಲ್ಲಿ ಮಿಂಚುತ್ತಿದ್ದಾರೆ.

ಜೂನಿಯರ್‌ ಏಷ್ಯಾಕಪ್‌ನಲ್ಲಿ ಭಾರತ ತಂಡ ಉತ್ತಮ ಪ್ರದರ್ಶನ ನೀಡಿದೆ. ಲೀಗ್‌ನಲ್ಲಿ ಆಡಿದ ಮೂರೂ ಪಂದ್ಯಗಳಲ್ಲಿ ಗೆದ್ದು ಸೆಮಿಫೈನಲ್‌ಗೆ ಅರ್ಹತೆ ಪಡೆದಿತ್ತು. ಆದರೆ, ಜಪಾನ್ ಎದುರಿನ ನಾಲ್ಕರ ಘಟ್ಟದ ಪಂದ್ಯದಲ್ಲಿ ಶೂಟೌಟ್‌ನಲ್ಲಿ 2–3 ಗೋಲುಗಳಿಂದ ಸೋಲು ಕಂಡಿತು. ನಿಗದಿತ ಅವಧಿಯಲ್ಲಿ ಪಂದ್ಯ 1–1 ಗೋಲಿನಿಂದ ಸಮಬಲವಾಗಿತ್ತು. ಮೂರನೇ ಸ್ಥಾನಕ್ಕಾಗಿ ನಡೆದ ಪಂದ್ಯದಲ್ಲಿ 3–0 ಗೋಲುಗಳಿಂದ ಕೊರಿಯಾ ಎದುರು ಗೆದ್ದು ಕಂಚಿನ ಪದಕಕ್ಕೆ ಕೊರಳೊಡ್ಡಿದರು.

18ರ ಹರೆಯದ ಲೀಲಾವತಿ ಎಲ್ಲಾ ಪಂದ್ಯ ಆಡಿದರು. ಅದಕ್ಕೂ ಮೊದಲು ಅವರು ಭೋಪಾಲ್‌ನಲ್ಲಿ ನಡೆದ ಶಿಬಿರದಲ್ಲಿ ಪಾಲ್ಗೊಂಡಿದ್ದರು. ಭಾರತ ತಂಡದ ಸಾರಥ್ಯವನ್ನು ಹರಿಯಾಣದ ಉದಿತಾ ವಹಿಸಿದ್ದರು. ದಕ್ಷಿಣ ಭಾರತದಿಂದ ಆಯ್ಕೆ ಆಗಿದ್ದ ಏಕೈಕ ಆಟಗಾರ್ತಿ ಕರ್ನಾಟಕದ ಲೀಲಾವತಿ. ಈ ಟೂರ್ನಿಯಲ್ಲಿ ಚೀನಾ, ಜಪಾನ್‌, ಥಾಯ್ಲೆಂಡ್‌, ಚೀನಾ ತೈಪೆ, ಕೊರಿಯಾ, ಸಿಂಗಪುರ ಹಾಗೂ ಮಲೇಷ್ಯಾ ತಂಡಗಳು ಪಾಲ್ಗೊಂಡಿದ್ದವು.

ಮಡಿಕೇರಿಯ ಫೀಲ್ಡ್‌ ಮಾರ್ಷಲ್‌ ಕೆ.ಎಂ.ಕಾರ್ಯಪ್ಪ ಕಾಲೇಜಿನಲ್ಲಿ ಪ್ರಥಮ ಬಿ.ಕಾಂ ಓದುತ್ತಿರುವ ಲೀಲಾವತಿ ದಕ್ಷಿಣ ಭಾರತ ಅಂತರ ವಿ.ವಿ ಹಾಕಿ ಚಾಂಪಿಯನ್‌ಷಿಪ್‌ನಲ್ಲಿ ಮಂಗಳೂರು ವಿ.ವಿ ಪ್ರತಿನಿಧಿಸಿ ಗಮನ ಸೆಳೆದಿದ್ದಾರೆ. ಈಗಾಗಲೇ ರಾಷ್ಟ್ರೀಯ ಸಬ್‌ ಜೂನಿಯರ್‌ ಹಾಗೂ ಜೂನಿಯರ್‌ ಮಟ್ಟದಲ್ಲಿ ರಾಜ್ಯ ತಂಡದ ಪರ ಆಡಿದ್ದಾರೆ. ಅಂತರ ಭಾರತ ಕ್ರೀಡಾ ಪ್ರಾಧಿಕಾರ (ಎಸ್ಎಐ) ಹಾಕಿ ಟೂರ್ನಿಯಲ್ಲಿ ದಕ್ಷಿಣ ವಲಯ ಪ್ರತಿನಿಧಿಸಿದ್ದಾರೆ.